Firimoni 1 - Bhaibheri Rakachena muChindau

Kuchingamidza

¹ Phauri, bhanditi raKristu Jesu, naThimothi hama yedu, ndinonyorera kunaFiremoni mungani wedu unodikanwa nounoshanda pamwepo nesu,

² nokunaAfia mukunda wedu, naAkhipusi uri soja pamwepo nesu, nokuchiara chiri mumhatso yako.

³ Nyasha nokunyarara ngazvigare nemwi zvinobva kunaMwari Baba edu nokunaMambo Jesu Kristu.

Rudo noKugonda kwaFiremoni

⁴ Naapo pendinopinimidza ndiwe mumikumbiro yangu, ndinobonga Mwari wangu ngenguva dzeshe,

⁵ ngokuti ndinozwa ngorudo rwako kwavari veshe vakacheneswa nokugonda kwako kunaMambo Jesu.

⁶ Ndinokumbira kuti kukoaniswa kwegonda rako kushande mukuzia zveshe zvakanaka zviri mukati mwedu munaKristu.

⁷ Ngokuti ndinodakara kakurutu nokugwinyiswa murudo rwako, ngokuti mwoyo yevakacheneswa yakagwinyiswa kubudikidza ndiwe, hama yangu.

Phauri Unokumbira Firemoni kuti Aashire Onesimusi

⁸ Ngeiyi ndaa, kunyazwi ndinakwo kushinga kweshe munaKristu kuti ndikupange kuita izvo zvinodiwa,

⁹ asi ngendaa yorudo ndinokupota, inini Phauri ndinoita kudai ngomunhu musharuka, nazvino kudaiwo ngebanditi raKristu Jesu.

¹⁰ Ndinokupota ngendaa yomwana wangu, Onesimusi, uwo wendakaita baba ake muusungwa hwangu.

¹¹ Uwo karetu waiya asikadetseri kwouri, asi zvino unodetsera iwewe neni.

¹² Ndamutumira kwouri, iye emene, mwoyo wangu wemene.

¹³ Ndaida kuti agare neni, kuti andishandire pandau yako mukusungwa kwangu ngendaa yevhangeri;

¹⁴ asi ndaiya ndisikadi kuita chiro ndisati ndatenderwa ndiwe, kuti kunaka kwako kusazoita kwokumanikidzwa, asi ngokuda kwako.

¹⁵ Ngokuti pamweni ndiyo ndaa yakaita kuti aparadzaniswe newe nguva doko, kuti ungaa naye mhera nariini,

¹⁶ aasichiri hlokopi, asi unopinda hloko, waita hama inodikanwa, kakurutu kwendiri, asi zvinozopinda kwakaitawani kwouri, mumuiri nomuna Mambo.

¹⁷ Ndizvo kudai wechindierenga kuti ndiri mungani wako, muashire kudai ngezvewaizondiashira inini.

¹⁸ Asi kudai akakushaishira, kunyazwi zvakanyaita mashatirenyi nokuti anechikwereti kwouri, wechiisa icho pazvikwereti zvangu.

¹⁹ Inini, Phauri, ndinonyora izvi ngenyara yangu; ndinozochibhadhara. Inini andironzi chiro kwouri ngendaa yezvikwereti zvako kwendiri kunyazwi iwewe wemene uri chikwereti kwendiri.

²⁰ Eya, hama, nditendere kuti ndidakadzwe ndiwe munaMambo! Musirira mwoyo wangu munaKristu.

²¹ Ndechigonda kupurutana kwako ndinonyora kwouri, ndechizia kuti unozoita zvinopinda zvendaronza.

²² Panguva imweyo ndinasirire kamera revaeni, ngokuti ndinogonda kuti kubudikidza ngemikumbiro yenyu ndinozopirwa kwomuri.

Mazwi aPhauri oKugumisira

²³ Ephafrasi, bhanditi pamwepo neni munaKristu Jesu, unokutambisa,

²⁴ ngokudaro Marako, Aristakhusi, Dhemasi naRuka, vendinoshanda navo.

²⁵ Nyasha dzaMambo wedu Jesu Kristu ngadzigare nomweya yenyu.