Ezek. 9 - Bhaibheri Rakachena muChindau

Jerusarema Rinoororwa

¹ Zvino wakachema mukuzwa kwangu ngeizwi guru echiti, “Ita kuti vaurayi vedhorobha vakwedzere pasinde, munhu weshe anendonga yake yokuuraya ndiyo munyara yake.”

² Ringira, kwakabuda vamuna vatanhatu vechibva ngenjira yomusiwo wedera, wakaringira dera, munhu weshe anendonga yokuuraya ndiyo munyara yake; pakati pavo paiya nomunhu wakafuka jira rorukangaza, anegonanyanga reikhi romunyori parutii rwake. Vakapoteramwo vakaema ngepasinde pearita rethusi.

³ Zvino uthende hwaMwari waIsuraeri hwakabuda kubva pakherubhi apo pohwaiya kuenda kudimba remhatso. Mambo Mwari wakadaidzira kunomunhu wakafuka jira rorukangaza, uwo waiya negonanyanga reikhi parutii pake;

⁴ naye wakati kwaari, “Enda ngomukati mwedhorobha, nomukati mweJerusarema, uise chioniso pahuma dzevanhu vanofemurika nokugwimba ngendaa yezvinyangadzo zveshe zvinoitwa pakati paro.”

⁵ Kunevamweni wakati mukuzwa kwangu, “Endai mukati mwedhorobha ngesure kwake, muuraye; madziso enyu asikaitiri nyasha, musasvipira mwoyo.

⁶ Muuraye vanhu vakuru nevadoko, veshe vasikana nevana vadoko, nevakadzi, asi musakwedzera pasinde pomunhu nokuti ngouri waiswa chioniso. Mutangire pandau yangu yakachena.” Ndizvo vakatanga ngevasharuka vaiya pamberi pemhatso.

⁷ Zvino wakati kwevari, “Svipisai mhatso yaMwari, muzadze muruwanze ngevakaurawa. Endai!” Ndizvo vakabuda kuenda, vakauraya mudhorobha.

⁸ Naapo vachauraya, neni ndasiiwa ndiri ndega, ndakawa pashi ngehope yangu, ndikachema ndechiti, “A Mambo Mwari, Mwari! Unozoparadza here veshe vakasara vaIsuraeri ngokudurura ushungu hwako hukuru padera peJerusarema?”

⁹ Wakati kwendiri, “Kushata kwemhatso yaIsuraeri neyokwaJudha kwakakura yaamho; nyika yakazara ngokuparadzwa kwengazi nedhorobha rakazara ngokusikarurama, ngokuti vanoti, ‘Mambo Mwari wasiya nyika, naMambo Mwari aaoni akadi.’

¹⁰ Asi inini dziso rangu arizokunguriri, nokuti kusvipira mwoyo, asi ndinozounza zviito zvavo padera pemasoro avo.”

¹¹ Ringira, munhu wakafuka jira rorukangaza negonanyanga reikhi parutii rwake, wakashuma ndaa echiti, “Ndaita kudai ngezvewandipanga.”