Ezek. 8 - Bhaibheri Rakachena muChindau

Miedzaniso yoKudira muJerusarema

¹ Mugore rechitanhatu, mumwedzi wechitanhatu, ngezuva rechishanu romwedziwo, apo ndakagara mumhatso yangu, nevakuru vaJudha vakagara pamberi pangu, nyara yaMambo Mwari, Mwari yakawirapo padera pangu.

² Ndakaringira, ndikaona muemo wakaringirika wakadai ngomuemo womunhu; pashi pakadai ngepachiunu chake, waiya akadai ngomuriro; padera pechiunu paiya pakadai ngokuringirika kwokujeka kudai ngethusi rinon'anikira.

³ Wakatambanudza chiemo chairingirika chakadai ngenyara nokunditora ngebvudzi resoro rangu; noMweya wakandimirudza padera pakati penyika nedenga, nawo wakandiunza muzvioniso zvaMwari muJerusarema, kumusiwo wokupinda muruwanze rwomukati wakaringira dera, kuchigaro chomuedzaniso wendurumwa, icho chaimusira ndurumwa.

⁴ Ringira, uthende hwaMwari waIsuraeri waiyapo, hwakadai ngechioniso icho chendaiya ndaona mushango.

⁵ Zvino wakati kwendiri, “O mukororo womunhu, mirudza madziso ako zvino uringire dera.” Ndizvo ndakamirudza madziso angu kuringira dera, naapo ringira, ngedera kwomusiwo wearita waiyapo uyu muedzaniso wendurumwa.

⁶ Naye wakati kwendiri, “Mukororo womunhu, unoona here izvo zvevanoita, zvinonyangadza zvinopinda kukura izvo zvinoitwa ngevemhatso yaIsuraeri pano, kundidzinga kuti ndiende kuretu kubva pandau yangu yakachena? Asi unozoangira kuona zvinyangadzo zvikurutu.”

⁷ Naye wakandiunza kumusiwo woruwanze; naapo ndaringira, ringira, ndakaona murindi parukumbati.

⁸ Zvino wakati kwendiri, “Mukororo womunhu, itsa udure rukumbati.” Naapo ndadura rukumbati, ringira, ndakaona musiwo.

⁹ Naye wakati kwendiri, “Poteremwo, uone zvinonyangadza zvakashata zvevanoita pano.”

¹⁰ Ndizvo ndakapoteremwo, ndikaringira; ndakaonapo zvakanyorwa parukumbati kurutendenedza miemo yeshe yezviro zvinotamanda neyemhuka dzinonyangadza, nemiedzaniso yeshe yokudira yemhatso yaIsuraeri.

¹¹ Pamberi pazvo pakaema vakuru makumi manomwe vemhatso yaIsuraeri, naJaazania mukororo waShafani akaema pakati pavo. Umwe ngaumwe waiya nechidziyo chake munyara yake chokupishira mutombo unegwema rakanaka, negore rechiushi rakakura raipwititika.

¹² Zvino wakati kwendiri, “Mukororo womunhu, waona here icho chinoitwa ngevakuru vemhatso yaIsuraeri muchidima, munhu weshe mukamera romuedzaniso wake? Ngokuti vanoti, ‘Mambo Mwari aationi, Mambo Mwari wasiya nyika.’ ”

¹³ Wakatiwo kwendiri, “Unozoona kunyangadza kwakapinda kukura kwevanoita.”

¹⁴ Zvino wakandiunza pokupinda ndipo pamusiwo wedera wemhatso yaMambo Mwari; ringira, madzimai aiya akagara echichemera Thamuzi.

¹⁵ Zvino wakati kwendiri, “Waona izvi here, O mukororo womunhu? Unozoonazve zvinonyangadza zvikuru kupinda izvi.”

¹⁶ Naye wakandiunza muruwanze rwomukati rwemhatso yaMambo Mwari; ringira, pamusiwo wemhatso yaMambo Mwari, apo pokupinda ndipo mutemperi raMambo Mwari, pakati peberere nearita, vaiyapo vamuna vaida kukwana makumi mairi navashanu, nemishana yavo yakafuratira temperi raMambo Mwari, nehope dzavo dzairingira kumabvazuva, vaiata pashi kudira zuva, vechiringira kumabvazuva.

¹⁷ Zvino iye wakati kwendiri, “Waona izvi here, O mukororo womunhu? Chiro chakareruka here kunevemhatso yaJudha kuti vaite izvi zvinonyangadza zvevanoita pano? Vanosisira here kuzadza nyika ngougebengwa, nokuangira kumusa ushungu hwangu? Ringira, vanoisa dai kumiro dzavo.

¹⁸ Ndizvo ininiwo ndinozovaitira ngoushungu; dziso rangu arizokunguriri, andizovasvipiri mwoyo; kunyazwi vanozochema munzee dzangu ngeizwi gurutu, andizovapurutani.”