Ezek. 7 - Bhaibheri Rakachena muChindau

Kuguma kwaIsuraeri Kwaapasinde

¹ Izwi raMambo Mwari rakauya kwendiri rechiti,

² “Iwewe mukororo womunhu, izvi ndizvo zvinoronza Mambo Mwari, Mwari kunyika yaIsuraeri: Magumo! Magumo aguma padera pemakhona marongomuna enyika.

³ Zvino magumo aguma padera pako, neni ndinozorekeredza ushungu hwangu padera pako; ndinozokutonga kudai ngezviito zvako, ndinozokuorora ngendaa yezvinonyangadza zvako zveshe.

⁴ Dziso rangu arizokukunguriri, andizokusvipiri mwoyo. Ndinozokuorora ngendaa yenjira dzako, naapo zvinonyangadza zvako zvichagara pakati pako. Zvino unozozia kuti inini ndini Mambo Mwari.”

⁵ “Izvi ndizvo zvinoronza Mambo Mwari, Mwari: Kushata kunoteera kushata! Ringira, kunoguma.

⁶ Magumo aguma, magumo aguma. Kunokumukira; ringira, aguma.

⁷ Rufu rwako rwaguma kweuri, O iwewe mugari wenyika. Mukuwo waguma, zuva rokutambudzika riri pasinde, akuchina kudakara kumitunhu.

⁸ “Ngokukasira ndinozodurura ushungu hwangu padera pako, ndinozopedzera ushungu hwangu padera pako. Ndinozokutonga kudai ngenjira dzako, nokukuorora kudai ngezvinyangadzo zvako zveshe.

⁹ Dziso rangu arizokukunguriri, andizokusvipiri mwoyo. Ndinozokuorora kudai ngenjira dzako, naapo zvinyangadzo zvako zvichagara mukati mwako. Zvino munozozia kuti inini ndini Mambo Mwari uwo unochaya.

¹⁰ “Ringirai zuva! Ringirai, rinouya! Rufu rwako rwabuda. Ndonga yatsenenekera, kudzikudza kwaburuikira.

¹¹ Bopoto ramuka kuita ndonga yokushata. Akuna naumwe wavo unozosara, haiwa muuwandu hwayo, haiwa muupfumi hwavo; apana chakanaka pakati pavo.

¹² Nguva yaguma, zuva rinokwedzera pasinde; musatendera kuti mutengi adakare, nokuti mutengesi acheme, ngokuti ushungu huri padera pembungano yavo yeshe.

¹³ Ngokuti mutengesi aazohwiriri kuneizvo zvaakatengesa, kunyazwi vachapona. Ngokuti chioniso chiri kwevari veshe vazhinji, achichazopetuki; ngendaa yokushata kwavo, akuna unokona kungwarira kupona kwake.

¹⁴ Varidza gwama nokunasirira zveshe; asi akuna naumwe wavo unobuda kuenda kwoorwa, ngokuti ushungu hwangu huri padera pembungano yavo yeshe.

Kuororwa kweZvishaishi zvaIsuraeri

¹⁵ “Shoti iri kubanze, nhenda nenzara zviri ngomukati; nouwo uri mushango unozofa ngeshoti; nouwo uri mudhorobha, nzara nenhenda zvinomupedza.

¹⁶ Kudai varipo vanopona vanopokonyoka, vanozooneka padera pemitunhu, vakadai ngemagora omumapani, veshe vechibonda, umwe ngaumwe ngendaa yokushata kwake.

¹⁷ Nyara dzeshe dzinozorungunuka, mabvi eshe anozonyunguruka kupera simba kudai ngemvura.

¹⁸ Vanozodzisimidza ngemachira emasaka, kutyisa kukuru kunozovafukidza. Kutsveruka kunozoa padera pehope dzeshe, mhanza dzinozoa padera pemasoro eshe.

¹⁹ Vanozokandira sirivha yavo mumapato, nomukore wavo unozoita chiro chakasvipiswa. Sirivha yavo nomukore wavo azvizoa nesimba rokuvanunura ngezuva roushungu hwaMambo Mwari. Avazogutisi mweya yavo nokuti kuzadza maura avo. Ngokuti ndicho chaiya chipumhuniso chokushaisha kwavo.

²⁰ Kubva kuunaku hwechinemeso chavo, vakaita manyau ndicho, ivo vakanasira miedzaniso yavo yainyangadza, zviro zvavo zvinoshooreka; ndizvo ndinozonasira ndicho chiro chakasvipiswa kwevari.

²¹ “Ndinozochipira munyara dzevapara kuita chiro chokuchakatwa, kunevakashata venyika kuita chakapambwa; vanozochisvipisa.

²² Ndinozofuratira hope yangu kubva kwevari, vanozosvipisa ndau yangu yakafishika, ngokuti vabvuki vanozopotera mukati mwayo, vanozoisvipisa.

²³ “Nasira ketani! Ngokuti nyika yazara ngendaa dzengazi, dhorobha razara ngokugebenga.

²⁴ Ndinozounza madzinza akapinda kushata kuti vatore nhaka yemhatso dzavo. Ndinozogumisa manyau evakagwinya, nendau dzavo dzakachena dzinozosvipiswa.

²⁵ Naapo kuurawa kwaguma, vanozotsvaka kunyarara, asi avazokuoni.

²⁶ Kutambudzika kunozouya padera pokutambudzika, guhwa rinozoteera sure kweguhwa; vanozoramba vechitsvaka chioniso kubva kumuprofeti; dzidziso dzinozopera kubva kumupristi nokupangwa kubva kuvasharuka.

²⁷ Mambo unozochema, vatongi vanozopera simba, nenyara dzevanhu venyika dzinozohuta. Ndinozoita kwevari kudai ngenjira dzavo, kudai ngokutonga kwavo ndinozovatonga, navo vanozozia kuti inini ndini Mambo Mwari.”