Ezek. 6 - Bhaibheri Rakachena muChindau

Mambo Mwari Unoramba Zvimwari Zvemiedzaniso

¹ Izwi raMambo Mwari rakaguma kwendiri rechiti,

² “O mukororo womunhu, ringirisa hope yako kumitunhu yaIsuraeri, uprofete kuvaitira ndaa

³ wechiti, ‘O imwimwi mitunhu yaIsuraeri, izwai izwi raMambo Mwari, Mwari: Izvi ndizvo zvinoronza Mambo Mwari, Mwari kumitunhu, nokuzvimitunhu, kumakwenga, nokumabani; ringira, inini, inini ndemene, ndinozounza shoti padera penyu, ndinozoparadza ndau dzenyu dzakakwirira.

⁴ Maarita enyu anozoita matongo, midziyo yemitombo yokupishira midiro inozoputswa; ndinozokandira pashi vanhu venyu vakaurawa pamberi pemiedzaniso yenyu yokudira.

⁵ Ndinozoradzika pashi miiri yakafa yevanhu vaIsuraeri pamberi pemiedzaniso yavo yokudira neni ndinozotatanisa magodo enyu kutendenedza maarita enyu.

⁶ Peshe pomunogara, madhorobha enyu anozoparadzwa, nendau dzenyu dzakakwirira dzinozoita matongo, kuitira kuti maarita enyu aite akaparadzwa nokuita matongo, miedzaniso yenyu yokudira kuti iputswe nokuparadzwa nemaarita enyu okupishira mitombo inegwema rakanaka aputsirwe pashi, nemishando yenyu idzimwe.

⁷ Vakaurawa vanozowa pakati penyu; zvino munozozia kuti inini ndini Mambo Mwari.’

⁸ “Asi ndinozoponesa vamweni vevanosara. Vamweni venyu vanozopokonyoka kushoti pakati pemadzinza nokuparadzirwa mukati mwenyika dzeshe.

⁹ Avo venyu vanopokonyoka vanozondikarakadza vari pakati pemadzinza, apo pevanotorwa kuitwa hloko; ndakapwanyiwa ngomwoyo yavo inodisisa umhombo, iyo yakapauka kubva kwendiri, nemadziso avo akaita mhombo ngokutenderukira kumiedzaniso yavo yokudira. Navo vanozodzinyenya pachavo mukuona kwavo ngokushata ukwo kwevakaita muzvinyangadzo zvavo zveshe.

¹⁰ Navo vanozozia kuti inini ndini Mambo Mwari. Andizi kutyisidzira pasina shwiro, kuti ndiunze uku kushata padera pavo.”

¹¹ “Izvi ndizvo zvinoronza Mambo Mwari, Mwari: Chaya ngenyara yako, utsike ngetsoka yako wechiti, ‘Ihehe ngendaa yezveshe zvakashata zvinonyangadza zvemhatso yaIsuraeri!’ Ngokuti vanozowa ngeshoti, ngenzara nenhenda.

¹² Uwo uri kuretu unozofa ngenhenda, nouwo uri pasinde unozourawa ngeshoti, nouwo unosara nokukombwa unozofa ngenzara. Ngokudaro ndinozopedza ushungu hwangu hunotyisa padera pavo.

¹³ Naapo munozozia kuti inini ndini Mambo Mwari, naapo vakafa vavo vanozoata pakati pemiedzaniso yavo yokudira kutendenedza maarita avo, padera pezvimitunhu zveshe zvakakwirira, nepadera pemitunhu yeshe, nepashi pemiti yeshe yakasvipirika, nepashi pemiti yeshe yemiokhi inemashakani, kundau dzeshe dzevakapira mitombo inegwema rakanaka kumiedzaniso yavo yeshe yokudira.

¹⁴ Ndinozotambanudza nyara yangu padera pavo, ndiite nyika matongo, nokuparadzwa muugaro hwavo hweshe kubvira mushango kuenda Dhibhira. Zvino vanozozia kuti inini ndini Mambo Mwari.”