Ezek. 5 - Bhaibheri Rakachena muChindau

Ezekieri Unopara Soro rake

¹ “Neiwewe, O mukororo womunhu, tora shoti yakapinza, ishandise kudai ngechisvo chomugundi, para ndiro bvudzi resoro rako nendebvu dzako; zvino tora zvipimo zvokupima, uparadzanise bvudzi.

² Unozopisha rupande rwaro rwechitatu ngomuriro mukati mwedhorobha, apo mazuva okukombiwa apera; unozotora rupande rumweni rwechitatu rwaro, nokuruchaya ngeshoti kutendenedza dhorobha; norupande rwechitatu rumweni unozoparadzira mudutu, neni ndinozoshwamura shoti sure kwaro.

³ Zvino unozotora shomani raro kubva kweriri, unozorisungira muzvokusimira zvako.

⁴ Kubva kuneiri unozoritora, urikandire mukati mwomuriro nokuripishapo mumuriro; ngokuti kubva kweriri muriro unozobuda kurwisana nemhatso yeshe yaIsuraeri.”

⁵ Izvi ndizvo zvinoronza Mambo Mwari, Mwari: “Iri ndiro Jerusarema; ndariemesa pakati pemadzinza nenyika dzeshe dzakaritendenedza.

⁶ Asi ramukira mitemo nezvitongero zvangu rechiita zvakashata kupinda madzinza nenyika dzeshe dzakaritendenedza, kuramba mitemo yangu risikadi kuteera kuhamba muzviemeso zvangu.

⁷ Izvi ndizvo zvinoronza Mambo Mwari, Mwari: Ngokuti imwimwi munomukira kupinda madzinza akamutendenedza, nemwi amuzi kuhamba muzviemeso zvangu nokuti kungwarira zvitongero zvangu, asi mwakaita kudai ngezviemeso zvemadzinza akamutendenedza,

⁸ izvi ndizvo zvinoronza Mambo Mwari, Mwari: Ringira, inini, inini pachangu ndinouya kurwa nemwi, neni ndinozotonga pakati penyu mukuona kwemadzinza.

⁹ Ngendaa yezvinonyangadza zvenyu zveshe ndinozoita kwomuri icho chendisati ndaita, chendisikachazoitazve chakadaro.

¹⁰ Ndizvo vabereki vanozodya vana vavo pakati penyu, nevana vanozodya vabereki vavo, neni ndinozotonga padera penyu, nevanosara venyu ndinozovaparadzira kumadutu eshe.

¹¹ “Ndizvo kudai ngezvendinopona, unoronza Mambo Mwari, Mwari, ngegwinyiso ngokuti imwimwi mwakasvipisa ndau yangu yakachena ngezviro zvenyu zveshe zvinonyenyisa nezvinonyangadza, ndizvo inini ndinozomutemera pashi; dziso rangu arizomukunguriri, neni andizomusvipiri mwoyo.

¹² Rupande rumwe rwechitatu rwenyu runozofa ngenhenda nokuti kupedzwa ngenzara pakati penyu; norupande rumweni rwechitatu runozourawa ngokupinza kweshoti kumutendenedza, norumweni rupande rwechitatu ndinozoruparadzira kumadutu eshe, nokurumbirira ngeshoti yakashwamurwa sure kwavo.

¹³ “Ngokudaro ushungu hwangu hunozodzipedza pachawo, noushungu hwangu ndichahugumisa padera pavo, ndinozoembedzerwa; navo vanozozia kuti inini Mambo Mwari ndazviereketa mundurumwa dzangu, apo pendinopedzera ushungu hwangu padera pavo.

¹⁴ Zve, ndinozokuita dongo nechiro chinoshekedza pakati pemadzinza anomutendenedza, mukuona kwavo veshe vanopindapo.

¹⁵ “Chichaita chiro chinoshoorwa nechinoshekwa, nyowedzo nechinotyisa kunemadzinza anomutendenedza, apo ndinotonga kutonga kwangu padera penyu muushungu hwangu nomukushishwa kwangu, nokuorora kunoushungu. Inini Mambo Mwari ndazviereketa.

¹⁶ Apo ndinoposhera padera pavo misee yangu inouraya yenzara, misee yokuparadza, iyo yendinozoposhera kuti imupedze, naapo ndinoangira kuunza nzara padera penyu, ndinogura mudondoro wechingwa chenyu.

¹⁷ Ndinozotumira nzara nemhuka dzomushango padera penyu, nazvo zvinozomubira vana venyu; nhenda nokuparadzwa kwengazi zvinozopinda ngepakati penyu; ndinozounza shoti padera penyu. Inini Mambo Mwari ndazviereketa.”