Ezek. 47 - Bhaibheri Rakachena muChindau

Chinyuka Chinoerera Kubva muTemperi

¹ Zvino wakandipetudzazve sure kumusiwo wetemperi; ringira, mvura yaivheruka kubuda pashi pedimba kuerera kuenda kumabvazuva (ngokuti temperi raiya rakaringira kumabvazuva;) nemvura yakaerera kudzaka kubva kurutii rwokubani rwedimba retemperi, ngokurutii rwokubani rwearita.

² Zvino wakandiunza kubanze ngenjira yomusiwo wedera, naye wakanditungamirira ngokubanze kumusiwo wokubanze wakaringira kumabvazuva; ringira, kwaierera mvura ngokurutii rwokubani.

³ Echienda kumabvazuva nebote munyara mwake, munhu wakapima mamitha mazana mashanu, echidzaka nechinyuka kuenda neni ngomumvura, nemvura yakagumira mumadziso etsoka.

⁴ Zve, wakapima mamitha mazana mashanu amweni, akandipinza ngomumvura; mvura yakagumira mumabvi. Zve, wakapimazve mamitha mazana mashanu, akandipinza pamberi ngomumvura kudzaka; mvura yakagumira muzviunu.

⁵ Zve, wakapima mamitha mazana mashanu kupinda pokutanga; nayo yakaita rwizi rwendisikazi kukona kuambuka, ngokuti mvura yaiya yakwirira; yaiya yadzama kuti mungashambira mukati mwayo, rwizi rusikaambukiki.

⁶ Wakati kwendiri, “Mukororo womunhu, waona izvi here?” Naapo wakandipetudza sure kumahumbikumbi orwizi.

⁷ Naapo ndapetuka, ringira, pamahumbikumbi paiya nemiti yakawanda kurutii rumwe rwehumbikumbi nokurutii rumweni rwehumbikumbi.

⁸ Wakati kwendiri, “Iyi mvura inovheruka kuerera kuenda kunyika dzokumabvazuva, inodzaka kuenda Arabha, naapo peinopinda muruandhle rwemvura isikahambi, mvura inozonakiswa.

⁹ Kunyazwi ngepari panoguma ndwizi mbiri, chisikwa cheshe chinohambamwo chinozopona; kunozoapo hove dzakawanda kakurutu, kamwe iyi mvura inogumapo.Inozoitwa yakanaka nezviro zveshe zvinozorarama kundau dzeshe kweinoguma.

¹⁰ Vanhu vanozoemapo vechibata hove, kubvira Engedhi metsa kuguma Enegiraimu; inozoita ndau dzokuanikira zvitaa; hove dzarwo dzinozoita dzembeu dzakawanda, kudai ngehove dzoRuandhle Rukuru.

¹¹ Asi ndau dzine madhaka dzarwo, nendau dzezviteetee adzizonaswi, dzinozosiiwa kuita dzomunyu.

¹² Pamahumbikumbi, kumarutii eshe endwizi, kunozokura miti yembeu yeshe yemichero inodyiwa. Mashakani ayo aazofoti, nokuti michero yayo aizokoreri; asi inozobereka michero yakanaka mwedzi yeshe, ngokuti mvura yayo inovheruka kuerera kubva kundau yakachena. Michero yayo inozoita yokudya, nemashakani ayo anozoita mutombo.”

Migano yeNyika

¹³ “Izvi ndizvo zvinoronza Mambo Mwari, Mwari: Iyo ndiyo migano, yomunozogura ndiyo nyika, kuita nhaka pakati pemadzinza gumi nemairi aIsuraeri. Josefa unozoita zvikoaniswa zviiri.

¹⁴ Munozoigura ngokuedzanisa; ndakapika kuipa kunemadzibaba enyu, nenyika iyi inozowira kwomuri kuita nhaka yenyu.

¹⁵ “Nouyu unozoita mugano wenyika: Kurutii rwedera, kubva kuRuandhle Rukuru, ngenjira inoenda Hethironi, metsa kuguma Rebhohamathi, nokuenda Zedhadhi;

¹⁶ Bherotha, Sibhiraimu, iro riri pakati pomugano weDhamasekusi nepomugano weHamathi, neHazerihatikoni, riri mumigano yeHaurani.

¹⁷ Ndizvo mugano kubvira kuruandhle kuenda Hazarenoni, pamugano weDhamasekusi ngedera, unozodarika nomugano weHamathi ngedera. Urwo ndirwo rutii rwedera.

¹⁸ “Norutii rwokumabvazuva, munozopima kubvira pakati peHaurani neDhamasekusi, kuteera Jorodhani pakati peGireadhi nenyika yaIsuraeri, munozopima metsa kuguma kuruandhle rwokumabvazuva metsa kuguma Thamari. Urwu ndirwo rutii rwokumabvazuva.

¹⁹ Norutii rwokubani runozodarika kubvira Thamari metsa kuguma kumvura yeMeribhathikadheshi, metsa kuguma kuRwizi rweEgipite, kudarika kuguma kuRuandhle Rukuru. Urwu ndirwo rutii rwokubani.

²⁰ Kurutii rwokumabirirazuva Ruandhle Rukuru runozoita mugano kubvira pakaringirana neRebhohamathi. Urwu ndirwo rutii rwokumabirirazuva.

²¹ “Ndizvo munozogurirana nokukoanisa iyi nyika pakati penyu kudai ngokuteererana kwemadzinza aIsuraeri.

²² Munozoita mabhigidha kuikoanisa pakati penyu kuita nhaka yenyu, nokuvapara vanogara pakati penyu, vane vana vari pakati penyu. Vanozoita kwomuri kudai ngeavo vakabarwa munyika ngevanhu vaIsuraeri; nemwi vanozoita mabhigidha enhaka pakati pedzinza raIsuraeri.

²³ Kunyazwi ngeriri dzinza raanogara mupara, munozomupa nhaka yake,” unoronza Mambo Mwari.