Ezek. 46 - Bhaibheri Rakachena muChindau

Mutongi neMadhiri

¹ “Izvi ndizvo zvinoronza Mambo Mwari, Mwari: Musiwo woruwanze rwomukati uwo wakaringira kumabvazuva unozogara wakakonywa mazuva matanhatu okushanda evhiki; asi ngezuva reSabatha unozobeurwa, nezuva romwedzi mutsva unozobeurwa.

² Mutongi unozopotera ngenjira yomuberere romusiwo wokubanze, naye unozoema pasika dzomusiwo. Vapristi vanozopira mudiro wake wokupisha, nemidiro yake yokunyarara, naye unozodira akagwadama padimba romusiwo. Zvino unozobuda kubanze, asi musiwo uwo auzokonywi metsa madeekoni.

³ Vanhu venyika vanozodira vari pokupinda ndipo pamusiwo pamberi paMambo Mwari ngemaSabatha neyokutawa kwomwedzi mitsva.

⁴ Mudiro wokupisha waanozopira mutongi kunaMambo Mwari ngezuva reSabatha unozoita zvimakwai zvitanhatu zvisina ndemo negondohwe risina ndemo.

⁵ Nomudiro wezviyo negondohwe unozoita efa rimwe nomudiro wezviyo nezvimakwai unozoita kudai ngezvaanokona kupa, pamwepo nehini remafuta kuefa rimwe ngarimwe roufu.

⁶ Pazuva rokutawa kwomwedzi unozopira mukono mutsva usina ndemo, nezvimwakwai zvitanhatu negondohwe, zvinozoita zvisina ndemo.

⁷ Kudai ngomudiro wezviyo unozonasirira efa nomukono, kugondohwe rimwe, nokune zvimakwai unozopa kudai ngezvaanokona kupa, pamwepo nehini ramafuta rinozopirwa kuefa rimwe ngarimwe.

⁸ Naapo mutongi echipotera, unozopotera mukati ngenjira yomuberere romusiwo, naye unozobuda ngenjira imweyo.

⁹ “Naapo vanhu venyika vechiuya pamberi paMambo Mwari kumadhiri akaemeswa, kunyazwi ndiani unopinda ngenjira yomusiwo wedera koodira, unozobuda ngenjira yomusiwo wokubani; kunyazwi ndiani unopinda ngenjira yomusiwo wokubani, unozobuda ngenjira yomusiwo wedera; aazopetuki ngenjira iyo yaapinda ndiyo, asi unozobuda ngouwo musiwo wakaringirana newaapinda ndiwo.

¹⁰ Naapo vapinda mukati, mutongi unozopotera navo; naapo voobuda, unozobudawo.

¹¹ Pamadhiri nepanguva dzakaemeswa, mudiro wezviyo efa pamukono mutsva umwe, neefa pagondohwe rimwe, pane kakwai unozopa kudai ngezvaanokona kupa, pamwepo nehini remafuta paefa rimwe.

¹² “Naapo mutongi anasirira mudiro wokupa ngokuda, kunyazvi mudiro wokupisha nokuti midiro yokunyarara, mudiro unopirwa ngokuda kunaMambo Mwari, musiwo wakaringira kumabvazuva unozobeurwa iye; naye unozopira mudiro wake wokupisha nemidiro yake yokunyarara, kudai ngezvaanoita ngezuva reSabatha. Zvino unozobuda kuenda; naapo abuda kubanze, musiwo unozokonywa.

Mudiro weZuva ngeZuva

¹³ “Unozonasirira kakwai kanegore rimwe kasina ndemo, kuita mudiro wokupisha kunaMambo Mwari zuva ngezuva; mangwanani eshe unozoinasirira.

¹⁴ Naye unozonasirira mudiro wezviyo pamwepo nawo mangwanani eshe, rupande rwechitanhatu rweefa, norupande rwechitatu rwehini remafuta, kukanya ufu hwakamotseka, kuita mudiro wezviyo kunaMambo Mwari; ichi chiemeso chisina magumo.

¹⁵ Ndiko kakwai nomudiro wezviyo nemafuta anozonasirirwa mangwanani eshe, kuita mudiro wokupisha nguva dzeshe.

Mutongi neNyika

¹⁶ “Izvi ndizvo zvinoronza Mambo Mwari, Mwari: Kudai mutongi echipa chipo kuneumwe wevakororo vake, chinozoita nhaka yake; chinozoita chevakororo vake, chinozoita chavo ngokuchigara nhaka.

¹⁷ Asi kudai iye echizopa chipo kubva panhaka yake kuneumwe wevaranda vake, chinozoita chake metsa kuguma kugore rokusunhurwa; zvino chinozohwirinzwa kumutongi; vakororo vake vega ndivo vanongwarira chipo kubva kunhaka yake.

¹⁸ Mutongi aazotori nhaka yevanhu kuvadzinga kubva kunhaka yavo; unozopa kuvana vake nhaka inobva kunhaka yake, kuitira kuti pasaa naumwe wevanhu vangu unozoduswa kubva kunhaka yake.”

Makamera oKubikira muTemperi

¹⁹ Wakandiunza ngepokupotera ndipo mukati, apo paiya ngokurutii rwemusiwo wakaringira dera, kupotera mukati mwemakamera akachena evapristi; naapo ndakaonapo ndau ngesure kworutii rwawo rwokumabirirazuva.

²⁰ Wakati kwendiri, “Iyi ndiyo ndau pevanozobikira vapristi midiro yokupauka nemidiro yokushaisha, nepevanozokocha mudiro wezviyo, kuti vasazoibudisa kuruwanze rwokubanze, apo pevanochenesa vanhu.”

²¹ Zvino wakandibudisa kuruwanze rwokubanze, wakaita kuti ndipinde ngepamakhona marongomuna oruwanze; ringira, kumakhona eshe oruwanze kwaiyapo ruwanze,

²² mumakhona marongomuna oruwanze mwaiya nemaruwanze madoko mamitha makumi mairi kureba, nemamitha gumi nemashanu kupamhama; makhona marongomuna aiya nechipimo chakatodzana.

²³ Mukati, kutenderera maruwanze marongomuna paiya nomusara, wakaakiwa ngemapuwe, paiya nezvichoto zvokubikira pashi pemisara yakatendenedza.

²⁴ Zvino wakati kwendiri, “Aya ndiwo makamera okubikira, apo panobikirwa mibairo yevanhu ngeavo vanoshandira mutemperi.”