Ezek. 45 - Bhaibheri Rakachena muChindau

Chikoaniswa chaMambo Mwari cheNyika

¹ Naapo munokoanisa nyika ngemabhigidha kuita nhaka, munozoemesa parutii kuita chipo kunaMambo Mwari chikoaniswa chakachena chenyika, kureba kwayo makhiromitha gumi nemairi nehafu, nokupamhama kwayo makhiromitha gumi. Ichi chinozoita chakachena kumigano yacho yeshe yakatendenedza.

² Kubva kuneichi ndau yakaedzana marutii eshe, mamitha mazana mairi nemakumi mashanu kureba nokupamhama, inozoita ndau yakachena, noruwanze ngemarutii; eshe mamitha makumi mairi nemashanu kupamhama kuitendenedza.

³ Mundau yakachena unozopima kurutii makhiromitha gumi nemairi nehafu kureba, kupamhama makhiromitha mashanu, mukati mwayo munozoita ndau yakachena nendau yakapindisisa kuchena.

⁴ Runozoita rupande rwakachena rwenyika; inozoita yevapristi, avo vanoshandira mundau yakachena, nokukwedzera pasinde naMambo Mwari kumushandira; nayo inozoita ndau yemhatso dzavo, nendau yakachena yougaro hwakachena.

⁵ Ndau imweni, makhiromitha gumi nemairi nehafu kureba, nemakhiromitha mashanu kupamhama, inozoitwa yavaRevhi, avo vanoshandira mutemperi kuita nhaka yavo madhorobha makumi mairi.

⁶ Pasinde pendau yakachena ndau imweni, makhiromitha gumi nemairi nehafu kureba, nemakhiromitha mairi nehafu kupamhama, inozoemeswa parutii kuita dhorobha; rinozoita remhatso yeshe yaIsuraeri.

Nyika yoMutongi

⁷ Mutongi unozowa nechikoaniswa chenyika kumarutii eshe enyika yakacheneswa, neyenhaka yedhorobha, ngepamberi pechipo chakachena, nepamberi penhaka yomudhorobha, ngorupande rwokumabirirazuva nokurupande rwokumabvazuva kuenda kumabvazuva; zvechiedzana muurebu kunechime chezvikoaniswa zvemadzinza, kubvira kumugano wokumabirirazuva kuenda kumugano umwe wokumabvazuva

⁸ enyika. Iyi inozoita nhaka yake muIsuraeri. Nevatongi vangu avachazotambudzi nakamwe vanhu vangu, asi vanozoita kuti vemhatso yaIsuraeri ipuwe nyika kudai ngokuteererana kwemadzinza avo.

Mitemo yoMutongi

⁹ Izvi ndizvo zvinoronza Mambo Mwari, Mwari: “Zvakwana, O vatongi vaIsuraeri! Dusai kugebenga nokutambudza, muite kutonga kwakanaka, nokururama. Rekerai kuangiridzwa kwenyu vanhu vangu, unoronza Mambo Mwari, Mwari.

¹⁰ Munozoa nezvipimo zvakarurama, nechipimo cheefa chakarurama, nechipimo chebhathi chakarurama.

¹¹ Chipimo cheefa nechebhathi zvinozoita zvipimo zvimwezvo, kuti bhathi riano rupande rumwe rwechegumi rwehoma, neefa riano rupande rumwe rwechegumi rwehoma; homa ndicho chipimo chinozoshandiswa.

¹² Nechipimo cheshekeri chinozoita magera makumi mairi. Mashekeri makumi mairi, nemashekeri makumi mairi namashanu, nemashekeri gumi nemashanu, eshe anozoita chipimo chemina chimwe kwomuri.

¹³ Ichi ndicho chipo chomunozopa: rupande rwechitanhatu rweefa kubva kunehoma yekoroni, nemwi munozopa rupande rwechitanhatu rweefa kubva kunehoma yebhare,

¹⁴ nokudai ngechiemeso chechikoaniswa chamafuta, chimwe chegumi chebhathi remafuta, kubva kuhoma imwe, kudai ngehoma imwe inemabhathi gumi;

¹⁵ hwai rimwe kubva mumutanga wemazana mairi, kubva kumufuro wakanasa kusvipira waIsuraeri.Uyu mudiro wezviyo nomudiro wokupisha nemidiro yokunyarara, kuita kuiyaniswa kwevari, unoronza Mambo Mwari, Mwari.

¹⁶ Vanhu veshe venyika vanozobatana pamwepo nomutongi muIsuraeri mukupa chipo ichi.

¹⁷ Asi izvi zvinosisira kuita mushando womutongi, kuti apire midiro yokupisha neyezviyo neyokumwa, ngemikuwo yemadhiri, mwedzi mitsva, nemaSabatha, eshe madhiri akaemeswa emhatso yaIsuraeri: unozonasirira midiro yokushaisha, midiro yezviyo, midiro yokupisha, nemidiro yokunyarara, kuita kuiyaniswa kwevemhatso yaIsuraeri.

Madhiri

¹⁸ “Izvi ndizvo zvinoronza Mambo Mwari, Mwari: Mumwedzi wokutanga, pazuva rokutanga romwedzi, unozotora mukono mutsva usina gotsa, nokuchenesa ndau yakachena.

¹⁹ Mupristi unozotora imweni yengazi yomudiro wokushaisha, nokuiisa padera pesika dzomusiwo wetemperi, nepadera pemakhona marongomuna egomo rearita, nepadera pesika dzomusiwo woruwanze rwomukati.

²⁰ Unozoita zvakatodzana kudaro ngezuva rechinomwe romwedzi ngendaa yomunhu weshe unoshaisha, ngokuphambekwa nokuti unoshaisha ngokusikazia; ndizvo munozoita muripo wetemperi.

²¹ “Mumwedzi wokutanga, pazuva regumi nemarongomuna romwedzi, munozongwarira Phasika, nedhiri remazuva manomwe rechingwa chisina mumera munozoridya.

²² Pazuva iro mutongi unozodzinasirira pachake nevanhu veshe venyika mukono kuita mudiro wokushaisha.

²³ Mumazuva manomwe ehdiri unozonasirira mudiro wokupisha kunaMambo Mwari, mikono minomwe mitsva nemagondohwe manomwe zvisina gotsa; unozozvipira zuva rimwe ngarimwe remazuva manomwe, negotokoto rinozopirwa zuva ngezuva kuita mudiro wokushaisha.

²⁴ Unozonasira mudiro wezviyo efa rimwe roufu kumukono umwe ngaumwe, neefa roufu kugondohwe rimwe ngarimwe, nehini ramafuta kuefa rimwe ngarimwe.

²⁵ Mumwedzi wechinomwe, pazuva regumi nemashanu romwedzi nomumazuva manomwe edhiri, unozonasirira zvakatodzana, kudai ngomudiro wokushaisha, ngomudiro wokupisha, ngomudiro wezviyo, nokudai ngomudiro wemafuta.