Ezek. 44 - Bhaibheri Rakachena muChindau

Kushandiswa kwoMusiwo woKumabvazuva

¹ Zvino wakandipetudza ngenjira yomusiwo wokubanze wendau yakachena, wakaringira kumabvazuva; nawo waiya wakakonywa.

² Mambo Mwari wakati kwendiri, “Uyu musiwo unozogara wakakonywa; auzobeurwi, apanazve munhu unozopotera ndiwo; ngokuti Mambo Mwari, Mwari waIsuraeri, wapotera mukati ndiwo, ndizvo unozogara wakakonywa.

³ Mutongi ega, ngokuti mutongi, unogara umwo, kudya chingwa pamberi paMambo Mwari; unozopinda ngenjira yeberere romusiwo, naye unozobuda ngenjira imweyo.”

Mitemo yoKuashirwa ndiyo muTemperi

⁴ Zvino wakandiunza ngenjira yomusiwo wedera pamberi petemperi; neni ndakaringira, ringira, uthende hwaMambo Mwari hwakazadza temperi raMambo Mwari; neni ndakawa pashi ngehope yangu.

⁵ Mambo Mwari wakati kwendiri, “Mukororo womunhu, nasa kuzwisisa, unase kuringira ngemadziso ako, unase kuzwisisa ngenzee dzako izvo zveshe zvendinoronza kwouri ngendaa yezviemeso zveshe zvemutemperi raMambo Mwari, nendaa yemipango yaro yeshe; unase kuringira avo vanotenderwa kupinda mutemperi, naavo veshe vanozosiiwa kubanze kwendau yakachena.

⁶ Uti kunemhatso inomukira, kumhatso yaIsuraeri, ‘Izvi ndizvo zvinoronza Mambo Mwari, Mwari: O mhatso yaIsuraeri, ngaapo magumo ezvinyangadzo zvenyu zveshe

⁷ mukutendera vapara, vasikazi kuchekwa mumwoyo nomunyama, kupinda mundau yangu yakachena, kuti vaitsverudze, mutemperi mwangu, apo imwimwi munopira kwendiri chingwa changu, mafuta nengazi. Vagura chitenderano changu ngezvinyangadzo zvavo zveshe.

⁸ Nemwi amuzi kungwarira mupango wemidiro yangu yakachena; asi mwakaemesa vapara kumushandira kuita vangwariri vemipango yangu mundau yangu yakachena ngokwenyu.’

⁹ “Izvi ndizvo zvinoronza Mambo Mwari, Mwari, ‘Akuna mupara usikazi kuchekwa mumwoyo nomunyama, kunyazwi ngouri mupara weavo vari pakati pevanhu vaIsuraeri, unozopotera mundau yangu yakachena.’

VaRevhi Vanobviswa Kubva muUpristi

¹⁰ “Asi vaRevhi avo vakaenda kuretu kubva kwendiri, vechipauka kubva kwendiri kuteera miedzaniso yavo yokudira apo Isuraeri akapauka kubva kwendiri, vanozotwara koororwa kwavo.

¹¹ Vanozoshandira mundau yangu yakachena, vechirinda pamisiwo yetemperi rangu, vechishandira mumhatso; vanozouraya midiro yokupisha nemibairo yevanhu, navo vanozoema pamberi pavo kuvashandira.

¹² Ngokuti vakavashandira pamberi pemiedzaniso yavo yokudira, vakaita kuti mhatso yaIsuraeri iwe mukushata kwayo; ndizvo ngokudaro ndakamirudza nyara yangu kurwa navo, unoronza Mambo Mwari, navo vanozotwara kushata kwavo.

¹³ Avazokwedzeri pasinde kwendiri kuti vaite mushando woupristi kwendiri, nokuti kukwedzera pasinde pemidiro yangu yakachena, zviro zvakapindisisa kuchena; asi vanozotwara kutsveruka kwavo, ngendaa yezvinyangadzo zvavo zvevakaita.

¹⁴ Asi ndinozovaemesa kuti vaite vangwariri vetemperi, kuita mushando weshe waro, zveshe zvinoshandwa mukati mwaro.

Vapristi

¹⁵ “Asi vapristi vevaRevhi, vakororo vaZadhoki, avo vakangwarira mushando wendau yangu yakachena apo vanhu vaIsuraeri vapauka kubva kwendiri, vanozokwedzera kwendiri kuti vandishandire; vanozoema pamberi pangu, kuti vandipe mafuta nengazi, unoronza Mambo Mwari, Mwari.

¹⁶ Ndivo vanozopotera mundau yangu yakachena, ndivo avo vanozokwedzera patafura rangu kuti vandishandire; vanozongwarira mushando wangu.

¹⁷ Naapo vapinda ngepamisiwo yoruwanze rwomukati, vanozopfeka machira orukangaza; avazopfeki zvine mamviri padera pavo, apo vechishanda pamisiwo yoruwanze rwomukati, nomukati.

¹⁸ Vanozosunga madhuku orukangaza musoro mwavo, nemabhuruku orukanganza mizviunu zvavo; vasazodzisimidza ngechiro nokuti ngechiri chinobudisa ziya.

¹⁹ Naapo vechibuda kuenda kuruwanze rwokubanze kunevanhu, vanozokhumura zvokupfeka zvavo zvevaishanda ndizvo, nokuzviisa mumakamera akachena; vanozopfeka zvokusimira zvimweni, kuti vasazochenesa vanhu vanezvokufuka zvavo.

²⁰ Avazopari masoro avo, nokuti kutendera nyunzu kuti dzikure; kwega vanozogunda bvudzi padera pemasoro avo.

²¹ Apana mupristi unozomwa vhini, apo paanopinda muruwanze rwomukati.

²² Avazoroori shirikadzi nokuti uwo wakarambwa; asi vanozoroora mhandara dzorudzi rwemhatso yaIsuraeri, nokuti shirikadzi yaiya yakaroorwa ngomupristi.

²³ Vanozodzidzisa vanhu vangu muparadzaniso pakati pezvakachena nezvisikazi kuchena, nokuvaonisa muparadzaniso pakati pezvisikazi kusukika nezvakasukika.

²⁴ Mukuphikisana mundaa vanozoema kudai ngevatongi, navo vanozoigura kudai ngezvitongero zvangu.Vanozongwarira mipango yangu nezviemeso zvangu mumishongano yangu yeshe yokudya yendakaemesa, vanozongwarira maSabatha angu akachena.

²⁵ “Vasazokwedzera kunomunhu wakafa, kuti vasadzisvipisa; asi baba nokuti mai, eya, nokuti mukororo nokuti mwanasikana, nokuti mukoma nokuti mukunda usina kuroorwa, vangadzisvipisa.

²⁶ Ngesure apo asukika, vanozomuerengera mazuva manomwe.

²⁷ Pazuva raanozopinda mundau yakachena, muruwanze rwomukati, kuti ashandire mundau yakachena, unozopira mudiro wake wokushaisha, unoronza Mambo Mwari, Mwari.

²⁸ Ichi chinozoita nhaka yavo: Inini ndiri nhaka yavo, nemwi amuzovapi nhaka muIsuraeri, inini ndini nhaka yavo.

²⁹ Vanozodya midiro yezviyo, midiro yokushaisha, midiro yokupauka; zveshe zvakapirwa muIsuraeri zvinozoita zvavo.

³⁰ Mitanguro yemichero yeshe, yembeu dzeshe, nomudiro weshe wembeu yeshe, nokubva kumidiro yenyu yeshe, zvinozoita zvevapristi; imwimwiwo munozopa vapristi chikanya chimwe chokutanga, kuitira kuti zvifumiso zviuye mumhatso yenyu.

³¹ Vapristi avazodyi nokuti ngechiri chakadzifira, nokuti icho chakabvajurwa, kunyazwi iri shiri nokuti mhuka.”