Ezek. 43 - Bhaibheri Rakachena muChindau

Mambo Mwari Unopetuka kuTemperi

¹ Zvino wakandiunza kumusiwo, musiwo wakaringira kumabvazuva.

² Ringira, uthende hwaMwari waIsuraeri hwaiuya kubva ngenjira yokumabvazuva; kutinhira kwokuuya kwake kwaiya kwakadai ngokutinhira kwemvura zhinji inesimba, nenyika yakan'anikira ngouthende hwake.

³ Chioniso chendakaona chakadai ngechioniso chendakaona apo akauya kooparadza dhorobha, nechioniso chakadai ngechioniso chendakaona ndiri parwizi Khebhari; neni ndakawa ngehope yangu.

⁴ Naapo uthende hwaMambo Mwari hwakapotera mumhatso ngenjira yomusiwo wakaringira kumabvazuva,

⁵ Mweya wakandimirudza, ukandiunza muruwanze rwomukati; ringira, uthende hwaMambo Mwari hwakazadza temperi.

⁶ Apo munhu akaema pasinde pangu, ndakazwa umwe echiereketa kwendiri kubva mutemperi.

⁷ Wakati kwendiri, “Mukororo womunhu, iyi ndiyo ndau yedendemaro rangu, nendau yokutambararira tsoka dzangu, apo pendinozogara pakati pevanhu vaIsuraeri mhera nariini. Mhatso yaIsuraeri aichazosvipisi zina rangu rakachena, kunyazwi iyo nokuti madzimambo ayo, ngouhure hwayo, nokuti ngemiiri yakafa yemadzimambo ayo mundau dzayo dzakakwirira.

⁸ Naapo vakagadzika dimba ravo pasinde pedimba rangu, nesika dzavo pasinde pesika dzangu, norukumbati rwega pakati pangu navo, vaisvipisa zina rangu rakachena ngezvinyangadzo zvavo zvevakaita; ndizvo ndavapedza muushungu hwangu.

⁹ Zvino ngavarashe uhure hwavo, nemiiri yemadzimambo avo yakafa, kuretu kubva kwendiri, neni ndinozogara pakati pavo mhera nariini.

¹⁰ “Asi iwewe, mukororo womunhu, nasa kududzira ngetemperi kunevemhatso yaIsuraeri, ngavapime chiemo chayo, kuti vatsveruke ngendaa yezvinonyangadza zvavo.

¹¹ Naapo vanotsveruka ngeizvo zveshe zvevakaita, ita kuti vazie urongwa hwetemperi, nokurongedzwa kwaro, njira yokubuda kubva kweriri, nedzokupotera kweriri, nechiemo charo cheshe, zviemeso zvaro nourongwa hwaro hweshe, nemipango yaro yeshe; uzvinyore mukuona kwavo, kuti vangwarire nokuteera urongwa hweshe nemitemo yaro yeshe.

¹² Ichi ndiwo mupango wetemperi; nyika yeshe padera pomutunhu nokuitendenedza inozoita yakachenesesa. Ringira, uyu ndiwo mupango wetemperi.”

Arita

¹³ Izvi ndizvo zvipimo zvearita ngokupima kwemasendimitha; (hafu yemitha nechipimo chenyara) kutenderera kwaro kunozoita masendimitha makumi mashanu kureba, nokupamhama kwaro masendimitha makumi mashanu, nokumagumo kwaro ngokurutii rwokubanze raiya negomo rimwe kuritendenedza. Ichi chinozoita urebu wearita kubva pashi kuenda mudenga:

¹⁴ Kubvira pachigadzikiro pamavhu metsa kuguma pamusara wepashi, mitha rimwe kureba, nokupamhama kwaro masendimitha makumi mashanu; nokubva pamusara mudoko kuenda pamusara mukuru mamitha mairi, nokupamhama kwaro kutenderera kweshe masendimitha makumi mashanu;

¹⁵ nechoto chearita mamitha mairi kureba mudenga; nokubva pachoto chearita kukwira, nyanga murongomuna.

¹⁶ Choto chearita chinozoita chipimo chimwe chakaedzana, mamitha matanhatu kurutii rumwe ngarumwe.

¹⁷ Musarawo unozoita marutii akatodzana mamitha manomwe rutii rumwe ngarumwe, marutii marongomuna akaedzana; negomo ngokumuchoto kwaro, masendimitha makumi mairi nemashanu kureba, chigadzikiro charo masendimitha makumi mashanu kupamhama. Madanho aro anoringira kumabvazuva.

Kupirwa kweArita

¹⁸ Zvino wakati kwendiri, “Mukororo womunhu, izvi ndizvo zvinoronza Mambo Mwari, Mwari: Iyi ndiyo mitemo yearita: Pazuva apo perinozoitwa, kuti vapirepo midiro yokupisha, nokufafaza ngazi padera paro,

¹⁹ unozopa kuvapristi vaRevhi vemhuri yaZadhoki, avo vanokwedzera kwendiri kundishandira, unoronza Mambo Mwari, Mwari, mukono mutsva kuita mudiro wokushaisha.

²⁰ Unozotora ngazi yawo imweni, nokuiisa panyanga murongomuna dzaro, nokumakhona marongomuna omusara, nepadera pegomo reshe kuritendenedza; ngokudaro unozorisuka nokurichenesa nokuita kupirwa kwaro.

²¹ Unozotorazve mukono wokuita mudiro wokushaisha, nawo unozopishwa mundau yakaemeswa yetemperi, kubanze kwendau yakachena.

²² Pazuva rechipiri unozopira gotokoto risina gotsa kuita mudiro wokushaisha, navo vanozochenesa arita, kudai ngezvevakarichenesa ngomukono.

²³ Naapo wapedza kurichenesa, unozopira mukono mutsva usina gotsa, negondohwe risina gotsa pakati pomutanga.

²⁴ Unozozviunza pamberi paMambo Mwari, nevapristi vanozokandira munyu padera pazvo, vanozozvipira kuita mudiro wokupisha kunaMambo Mwari.

²⁵ Mumazuva manomwe unozopira mbudzi imwe zuva rimwe ngarimwe yokuita mudiro wokushaisha; zve, mukono mutsva negondohwe kubva pakati pomutanga zvisina gotsa.

²⁶ Mumazuva manomwe vanozosukisa arita kurichenesa nokuripira kunaMambo Mwari.

²⁷ Naapo aya mazuva apera, zvino kubvira pazuva rechisere kuendemberi, vapristi vanozoita midiro yokupisha padera pearita, nemidiro yenyu yokunyarara, neni ndinozomuashira, unoronza Mambo Mwari.”