Ezek. 40 - Bhaibheri Rakachena muChindau

Ezekieri Unotorwa Kuenda Jerusarema

¹ Mugore remakumi mairi nemashanu ouhloko hwedu, mukuamba kwegore, ngezuva regumi romwedzi, mugore regumi nemarongomuna ngesure kwokuputswa kwedhorobha, ngezuva ririro, nyara yaMambo Mwari yaiya padera pangu, yakandiunza kweriri.

² Wakandiunza muzvioniso zvaMwari kunyika yaIsuraeri, naye wakandigadzika pashi padera pomutunhu wakakwira yaamho, apo paiya nomuemo wakadai ngedhorobha ngokubani.

³ Naapo andiunza apo, ringira, paiyapo nomunhu, uwo kuoneka kwake kwaiya kwakadai ngokun'anikira kwethusi, anebote rejira nechipimo chorutsanga munyara yake; naye waiya akaema pamusiwo.

⁴ Munhu wakati kwendiri, “Mukororo womunhu, nasa kuringira ngemadziso ako, unase kupurutana ngenzee dzako, uise mwoyo wako padera pazvo zveshe zvendinozokuonisa; ngokuti wakaunzwa pano ngeiyi ndaa, kuitira kuti ndichionise kwouri; ronza zveshe zvounoona kunevemhatso yaIsuraeri.”

Musiwo woKumabvazuva

⁵ Ringira rwaiyapo rukumbati rwakatendenedza ngokubanze kwemhatso yaMwari. Kureba kwechipimo chetsanga chaiya munyara yomunhu, chaiya mamitha matatu kureba, naye wakapima rukumbati. Rwaiya mamitha matatu kukwira mudenga nemamitha matatu kutimbara.

⁶ Zvino wakapinda pamusiwo wakaringira kumabvazuva, wakakwira pamakwiro awo, akapima dimba romusiwo, raiya mamitha matatu kudzama.

⁷ Aiyapo makamera, kamera rimwe ngarimwe raiya nemarupande akaedzana, kamera rimwe ngarimwe raiita mamitha matatu kupamhama nokudzama, nepandau yepakati pemarukumbati yaiita mamitha mairi nehafu kutimbara.

⁸ Zvino wakapima berere romusiwo ngomukati, naro raiya mamitha marongomuna kudzama.

⁹ Zvino wakapima berere romusiwo, rakaita mitha rimwe kutimbara.

¹⁰ Aiyapo makamera matatu madoko kumarutii eshe okumusiwo wokumabvazuva; matatu aiya nokupimwa kumwekwo; nesika dzaiya nokupimwa kumwekwo.

¹¹ Zvino wakapima kupamhama kwopokupinda pamusiwo, pakaita mamitha matanhatu nehafu, nourebu pamusiwo mamitha mashanu.

¹² Waiyapo mukana pamberi pemakamera madoko, masendimitha makumi mashanu kumarutii eshe; nemakamera madoko aiya nemarutii akaedzana, echiita mamitha matatu rutii rumwe ngarumwe.

¹³ Zvino wakapima musiwo kubva ngepadenga pekamera rimweni, kuguma padenga pekamera rimweni, kupamhama kwaiita mamitha gumi nemairi nehafu, kubva pamusiwo kuguma pamusiwo.

¹⁴ Wakaipima sika dzinemamitha gumi kupamhamha, noruwanze rwakagumira pasika dzaitendenedza musiwo.

¹⁵ Kubvira pamberi pemusiwo pokupotera ndipo metsa kumagumo eberere romukati pamusiwo paiita mamitha makumi mairi nemashanu.

¹⁶ Makamera nesika dzawo aiya nemafasitera, nezvikonyiso ngomukati mwemusiwo kutendenedza mweshe, nemaruwanzewo aiya nemafasitera ngomukati akatendenedza mweshe; nepadera pesika imwe ngaimwe paiya nemiti yemijindwi.

Ruwanze rwoKubanze

¹⁷ Zvino wakandiunza kuruwanze rwokubanze; ringira, aiyapo makamera, nezvakaakirwa mumarutii kutendenedza ruwanze; makamera makumi matatu akaringiriswa pakaakirwa mapuwe.

¹⁸ Nokuakirwa ukwo kwaiteera murutii rwemusiwo, rakaedzaniswa nokureba kwemisiwo; uku kwaiya kuakirwa kwaiya ngepashi.

¹⁹ Zvino wakapima urebu kubvira pamberi pemusiwo wepashi metsa kuguma kumapedzisiro pamberi poruwanze rwomukati ngokubanze, mamitha makumi mashanu, kweshe kumabvazuva nedera.

Musiwo weDera

²⁰ Zvino wakapima musiwo woruwanze rwokubanze, uwo wakaringira dera, kudzama kwawo nokupamhama.

²¹ Makamera madoko matatu kurutii urwu, nematatu kurutii urwo; nesika dzawo nemaberere awo aiya akaedzana kudai ngaawo omusiwo wokutanga; urebu hwawo hwaiya mamitha makumi mairi nemashanu, nokupamhama kwaiya mamitha gumi nemairi nehafu.

²² Mafasitera awo, nemaberere awo, nemiedzaniso yemiti yemijindwi yawo zvaiya nechipimo chimwecho, kudai ngechomusiwo wakaringira kumabvazuva. Madanho manomwe aikwira kugumapo; nemaruwanze awo aiya pamberi pazvo.

²³ Pakaringirana nomusiwo wedera, kudai ngokumabvazuva, paiya nomusiwo waipinda muruwanze rwomukati; wakapima kubva pamusiwo kuenda pamusiwo, pakaita mamitha makumi mashanu.

Musiwo woKubani

²⁴ Zvino wakanditungamirira kuenda neni kubani, ringira, waiyapo musiwo wakaringira kubani; naye wakapima sika dzawo nemaberere awo, kudai ngezvipimo zvimweni.

²⁵ Aiyamwo mafasitera kutendenedza mukati mwawo, nomumaberere awo, kudai ngemafasitera amweni; urebu hwawo hwaiya mamitha makumi mairi nemashanu, kupamhama kwawo kwaiya mamitha gumi nemairi nehafu.

²⁶ Aiyapo madanho manomwe okukwira kuguma peuri, nemaberere awo aiya pamberi pawo; waiya nemiedzaniso yemiti yomujindwi pasika dzawo, umwe ngorutii urwu, noumweni ngorutii urwo.

²⁷ Waiyapo musiwo ngokubani kweruwanze rwomukati, naye wakapima kubva pamusiwo kuenda kumusiwo wakaringira kubani, mamitha makumi mashanu.

Ruwanze rwoMukati: Musiwo woKubani

²⁸ Zvino wakandiunza muruwanze rwomukati ngepamusiwo wokubani; wakapima musiwo wokubani, waiya wakatodzana nezvimweni zvipimo.

²⁹ Makamera awo madoko, nesika dzawo, nemaberere awo, aiya akatodzana nezvimweni zvipimo; nawo aiyamwo mafasitera kutendenedza mweshe nomuberere marwo; urebu hwawo mamitha makumi mairi nemashanu, kupamhama mamitha gumi nemairi nehafu.

³⁰ Aiyamwo maberere aitendenedza mamitha gumi nemairi nehafu kureba, mamitha mairi nehafu kupamhama.

³¹ Maberere arwo akaringira kuruwanze rwokubanze; nemiedzaniso yemijindwi yaiya padera pesika dzawo, nokukwira kwapo kuenda mudenga madanho masere.

Ruwanze rwoMukati: Musiwo woKumabvazuva

³² Zvino wakandiunza muruwanze rwomukati rwakaringira kumabvazuva; wakapima musiwo, wakaedzana neimweni.

³³ Makamera awo madoko, sika dzawo, nemaberere awo, aiya akaedzana nezvimweni zvipimo; mwaiya nemafasitera mukati mweshe, nomumaberere akachitendenedza; urebu hwawo mamitha makumi mairi nemashanu, kupamhama mamitha gumi nemairi nehafu.

³⁴ Maberere arwo akaringira kuruwanze rwokubanze; nemiedzaniso yemiti yemijindwi padera pesika dzarwo, kumarutii eshe; nokukwira kwapo kuenda mudenga, madanho masere.

Ruwanze rwoMukati: Musiwo weDera

³⁵ Zvino wakandiunza kumusiwo wedera, wakaupima; waiya wakaedzana nezvimweni zvipimo.

³⁶ Makamera madoko arwo, sika dzarwo, maberere arwo, nemafasitera arwo akatendenedza kweshe. Urebu hwawo hwaiya mamitha makumi mairi nemashanu, kupamhama kwawo mamitha gumi nemairi nehafu.

³⁷ Nesika dzawo dzaiya dzakaringira kuruwanze rwokubanze; nemiedzaniso yemiti yemijindwi yaiya padera pesika dzarwo kurutii urwu nokurutii urwo; nokukwirapo kuenda mudenga madanho masere.

Mhatso Pasinde peMusiwo weDera

³⁸ Paiya nekamera musiwo waro wairingira pasika dzemisiwo, apo pevaisukira midiro yokupisha.

³⁹ Nomuberere romusiwo aiyapo matafura mairi, kurutii rumwe nematafura amweni mairi kurutii rumweni, pokuurairapo midiro yokupisha, midiro yokushaisha, nemidiro yokupauka.

⁴⁰ Kurutii rwokubanze, pakukwira kuenda pokupotera pamusiwo wedera, aiyapo matafura mairi; kurutii rumweni rweberere aiyapo matafura mairi.

⁴¹ Matafura marongomuna aiya mukati, nematafura marongomuna aiya ngokurutii rwokubanze, ngeparutii rwomusiwo, matafura masere, padera pawo okuurairapo mibairo yavo.

⁴² Aiyapowo matafura marongomuna emapuwe akatsetswa, emidiro yokupisha, urebu hwawo hwaiya masendimitha makumi mashanu, nokupamhama kwawo kwaiya masendimitha makumi manomwe nemashanu akaedzana; padera pawozve vairadzika zvokushanda ndizvo kuuraya midiro yokupisha neyemibairo.

⁴³ Mwaiya nezvikoreko, kureba kwazvo kwaiya kwakadai ngenyara imwe, zvakasungirwa kuatendenedza mukati mweshe. Nepadera pematafura paiiswa nyama yemidiro.

⁴⁴ Kubanze kwemusiwo womukati kwaiya nemakamera evaembi muruwanze rwomukati, urwo rwaiya kurutii rwomusiwo wedera wairingira kubani, rimwe raiya kurutii rwomusiwo wokumabvazuva wairingira dera.

⁴⁵ Wakati kwendiri, “Iri kamera rakaringira kubani ngerevapristi, vangwariri vemishando yemhatso.

⁴⁶ Nekamera rakaringira dera ngerevapristi, vangwariri vomushando wearita; ava mibarirwana yaZadoki ivo vega pakati pemibarirwana yaRevhi, avo vangakwedzera pasinde paMambo Mwari kumushandira.”

Ruwanze rwoMukati neMhatso yeTemperi

⁴⁷ Zvino wakapima ruwanze, urebu hwarwo mamitha makumi mashanu, marutii marongomuna akaedzana; nearita raiya pamberi pemhatso.

⁴⁸ Zvino wakandiunza kuberere remhatso, akapima sika dzeberere imwe ngaimwe, mamitha mairi nehafu kureba; kupamhama mamitha manomwe, nemarukumbati mitha rimwe nehafu kutimbara kumarutii eshe.

⁴⁹ Urebu hweberere hwaiya mamitha gumi, kupamhama mamitha matanhatu; ngepamadanho anokwira kuenda mudenga kweriri; dzaiapo sika pasinde pesika dzimweni kumarutii eshe.