Ezek. 4 - Bhaibheri Rakachena muChindau

Ezekieri Unoita Kukombwa kweJerusarema

¹ “Neiwewe, O mukororo womunhu, dzitorere chidhina uchiemese pamberi pako, unyore padera pacho dhorobha, Jerusarema;

² urikombe ngorukumbati, uake rukumbati rwokurwa naro, uemese kweriri murwi wokurwa naro; uemese matende okurwa naro, udzimike matanda okuputsa rukumbati ndiwo kuritendendza.

³ Zvino dzitorere ndiro yesimbi, uemese kudai ngorukumbati rwesimbi pakati pako nedhorobha; uemese hope yako kweriri, naro ngariwe nechiemo chokukombwa, iwewe rikombe. Ichi chinozoita chioniso kunevemhatso yaIsuraeri.

⁴ “Zvino, ata ngorutii rwako rwokumuoshwe, uise kushata kwemhatso yaIsuraeri padera pako; unozotwara kushata kwavo kudai ngouwandu hwemazuva ounozoatapo.

⁵ Ngokuti ndakaisa padera pako uwandu hwemazuva, mazana matatu nemakumi mapfumbamwe (390) emazuva, kunoedzana nouwandu hwemakore okuororwa kwavo; ndizvo unozotwara kuororwa kwemhatso yaIsuraeri.

⁶ Naapo wapedza aya, unozoata kwechipiri, asi ngorutii rwako rwokumudyo, nokutwara kuororwa kwemhatso yaJudha; makumi marongomuna emazuva ndinokuemesera, zuva rimwe ngarimwe riite gore.

⁷ Unozoemesa hope yako kuringira kukombwa kweJerusarema, nomuoko wako wakunyirwa, newe unozoprofeta kuriitira ndaa.

⁸ Ringira, ndinoisa mapote padera pako, kuti usazokona kukunukuka kubva kurutii rumwe kuenda kunorumweni, metsa wapedza mazuva okukombwa kwako.

⁹ “Newe tora koroni, bhare, nyimo, nyemba, mafunde nesipereti; uzviise muchidziyo chimwe, udzinasirire chingwa ndizvo. Muuwandu hwemazuva ounozoata ndiwo ngorutii rwako, mazana matatu nemakumi mapfumbamwe (390) emazuva, unozochidya.

¹⁰ Kudya kwako kwounodya unozopimirwa magramu ezvingwa anoita mazana mairi nemakumi matatu (230) ngezuva; ngemikuwo yakaemeswa unozochidya.

¹¹ Newe unozomwa mvura yakapimwa, tsani mbiri ngezuva rimwe; ngemikuwo yakaemeswa unozoimwa.

¹² Unozochidya kudai ngemakhekhe ebhare, unozochibika mukuona kwavo padera pemadisa omunhu.”

¹³ Mambo Mwari wakati, “Ndizvo, vanhu vaIsuraeri vanozodya chingwa chavo chakasvipiswa pakati pevemadzinza, apo pendinozovadzingira.”

¹⁴ Zvino ndakati, “A Mambo Mwari! Ringira, andizi kumbodzisvipisa; kubvira muutsva hwangu metsa zvino andizi kutongombodya icho chadzifira, nokuti icho chakarumwa ngezvikara; amuzi kutongopinda mumuromo wangu nyama inonuhwa.”

¹⁵ Zvino wakati kwendiri, “Wona, ndakupa disa ren'ombe pandau pedisa romunhu, newe unozonasira chingwa chako ndiro.”

¹⁶ Zvino wakati kwendiri, “Mukororo womunhu, ringira, ndinozogura mudondoro wechingwa muJerusarema; vanozodya chingwa chinopimwa nokutyiswa kukurutu; vanozomwa mvura yakapimwa nomukupera simba.

¹⁷ Vatama chingwa nemvura, vazoringirana umwe noumweni nomukupera simba, vanozoperezeka mukushaisha kwavo.”