Ezek. 39 - Bhaibheri Rakachena muChindau

Kunyiswa kwaGogi

¹ “Iwewe, mukororo womunhu, profeta kuitira ndaa Gogi wechiti, ‘Izvi ndizvo zvinoronza Mambo Mwari, Mwari: Ringira, ndinorwa newe, O Gogi, mutongi mukuru waMeshekhi naThubhari.

² Ndinozokupetudza sure, ndikukweye, ndinozoita kuti ukwidzwe kubva kundau dzenyika dzedera, ndinozokuunza padera pemitunhu yaIsuraeri.

³ Ndinozochaya uta wako kubva munyara yako yokumuoshwe, ndiite kuti misee yako iwe pashi kubva munyara yako yokumudyo.

⁴ Iwewe unozowira padera pemitunhu yaIsuraeri, iwewe nehondo dzako dzeshe, nevanhu avo vanewe; ndinozokupira kuneshiri dzinokara dzembeu dzeshe nokuzvikara zvomushango, kuti udyiwe.

⁵ Unozowa murubaya pamhene; ngokuti inini ndaereketa, unoronza Mambo Mwari, Mwari.

⁶ Ndinozotumira muriro padera paMagogi, nepadera paavo vanogara ngokungwaririka muzviwi, navo vanozozia kuti inini ndini Mambo Mwari.’

⁷ “Ndinozoita kuti zina rangu riziikanwe pakati pevanhu vangu Isuraeri; andizotendi kuti zina rangu rakachena ritsverudzwezve; nemadzinza anozozia kuti inini ndini Mambo Mwari, Wakachena waIsuraeri.

⁸ Ringira, chauya! Chaitika, unoronza Mambo Mwari, Mwari. Iri ndiro zuva rendaereketa ndiro.

⁹ Zvino avo vanogara mumadhorobha aIsuraeri vanozobuda nokubasa muriro nokupisha zveshe zvokurwa ndizvo, zveshe zvihlangu zvikuru nezvidoko, nouta nemisee, nemikhondo mikuru nemidoko, navo vanozozvipisha ngomuriro makore manomwe.

¹⁰ Ndizvo avazotezi huni kubva mushango, nokuti kutema muti nokuti ngouri mugwasha, ngokuti vanozobasa muriro ngezvokurwa ndizvo; navo vanozochakata avo vakavachakata, nokupamba avo vakavapamba, unoronza Mambo Mwari, Mwari.

Kutsirwa kwaGogi

¹¹ “Pazuva iro ndinozopa kunaGogi ndau yokutsira vakafa muIsuraeri, muBani reVahambi vanobva ngokumabvazuva kworuandhle; inozorambidza kupinda avo vahambi vanohamba, ngokuti apo Gogi nehondo yake yeshe vanozotsirwapo rinozodudzwa kuti, ‘Bani reHamonigogi.’

¹² Nevemhatso yaIsuraeri vanozopedza mwedzi minomwe vechivatsira, kuitira kuti vachenese nyika.

¹³ Vanhu veshe venyika vanozovatsira; nacho chinozoita mbiri kwevari ngeiro zuva rendinozoonisa ukuru hwangu, unoronza Mambo Mwari, Mwari.

¹⁴ Vanozoemesa vanhu vanozohambamwo munyika vechitsira vapambi vanosara padera penyika, kuti vaichenese; kwemwedzi minomwe vanozotsvakisisa.

¹⁵ Apo vatsvakisisi vechihamba munyika iyi, kunyazwi ndiani unoona godo romunhu, unozoemesa chioniso periri, metsa vatsiri varitsira muBani reHamonigogi.

¹⁶ Dhorobha iro rinozodudzwa kuti Hamona riripowo. Ngokudaro vanozochenesa nyika.

¹⁷ “Newe, mukororo womunhu, izvi ndizvo zvinoronza Mambo Mwari, Mwari: Ereketa kunembeu dzeshe dzeshiri nokuzvikara zveshe zvomushango: Dziunganidzei, muuye, unganidzanai kubva kumarutii eshe kudhiri rendinomunasirira, dhiri gurutu padera pemitunhu yaIsuraeri, mudye nyama nokumwa ngazi.

¹⁸ Munozodya nyama yevanesimba, nokumwa ngazi yevatongi venyika, yemagondohwe neyemakwayana, yembudzi neyemikono, zveshe zvakanuna zveBhashani.

¹⁹ Munozodya mafuta metsa mugute, nokumwa ngazi metsa muraradze, padhiri iro rendinomunasirira.

²⁰ Munozogutiswa patafura rangu, ngemahachi nengoro, nevarwi vanesimba, nevarwi vehondo vembeu dzeshe, unoronza Mambo Mwari.

Kupetudzwa kwaIsuraeri

²¹ “Ndinozoonesa uthende hwangu pakati pemadzinza, nemadzinza eshe anozoona kutonga kwangu kwendakaita, nenyara yangu yendakaisa padera pavo.

²² Mhatso yaIsuraeri inozozia kuti inini ndini Mambo Mwari, Mwari wavo, kubvira pazuva iro kuende mberi.

²³ Nemadzinza anozozia kuti mhatso yaIsuraeri yakaenda muuhloko ngendaa yezvishaishi zvavo, ngokuti vakaita ngokuchengedzera kwendiri. Ndizvo ndakafisha hope yangu kubva kwevari, ndikavapa munyara dzemagaa avo; ndizvo vakawa veshe ngeshoti.

²⁴ Ndakaita kwevari kudai ngokusikasukiki kwavo, nokudai ngokupauka kwavo nokufisha hope yangu kubva kwevari.

²⁵ “Ndizvo izvi ndizvo zvinoronza Mambo Mwari, Mwari: Zvino ndinozopetudza upfumi hwaJakobe, nokuitira nyasha vemhatso yeshe yaIsuraeri; ndinozoita ndurumwa ngendaa yezina rangu rakachena.

²⁶ Vanozoriyarwa kutsveruka kwavo, nezvipauko zvavo zveshe zvevakapauka ndizvo kurwa neni, apo vakagara ngokungwaririka munyika yavo, pasina naumwe unovatyisidzira,

²⁷ apo ndavaunzazve sure kubva pakati pemadzinza, nokuvaunganidza kubva munyika dzemagaa avo, kubudikidza ndizvo ndaonesa kucheneswa kwangu mukati mwavo mukuona kwemadzinza mazhinji.

²⁸ Zvino vanozozia kuti inini ndini Mambo Mwari, Mwari wavo, ngokuti ndakavatumira kuenda muuhloko pakati pemadzinza; zvino ndakavaunganidza kuvaunza kunyika yavo yemene. Andizosiyi naumwe wavo sure;

²⁹ neni andichazofishizve hope yangu kubva kwevari, apo pendinodurura mweya wangu padera pevemhatso yaIsuraeri, unoronza Mambo Mwari.”