Ezek. 36 - Bhaibheri Rakachena muChindau

Zvifumiso zvaMwari padera paIsuraeri

¹ “Newe, mukororo womunhu, profeta kumitunhu yaIsuraeri wechiti, ‘O mitunhu yaIsuraeri, izwanyi izwi raMambo Mwari.’

² Izvi ndizvo zvinoronza Mambo Mwari, Mwari: Ngokuti gaa rakaereketa rechimuitira ndaa kuti, ‘Aha,’ ‘Ndau dzekare dzakwirira dzaita dzedu, kudzigara nhaka.’

³ “Ndizvo, profeta wechiti, ‘Izvi ndizvo zvinoronza Mambo Mwari, Mwari: Ngokuti vakamuita matongo yaamho, nokumupwanya kundau dzeshe, kuti muite nhaka yemadzinza evakasara, nemwi mwakareiwa mumiromo yevaereketi, mukaitwa vanyepi pakati pevanhu;

⁴ ndizvo, O mitunhu yaIsuraeri, izwanyi izwi raMambo Mwari, Mwari: Izvi ndizvo zvinoronza Mambo Mwari kumitunhu nokuzvimitunhu, nokumikova nokumapani, nokundau dzakaita matongo akaparadzwa, nokumadhorobha akasiiwa, akaita kuti apambwe nokuita chishekedzo kumadzinza awo akasara akatendenedza;

⁵ ndizvo izvi ndizvo zvinoronza Mambo Mwari, Mwari: Ndinoereketa mukupisha kwendurumwa dzangu kuitira ndaa avo vakasara vemadzinza, nokuitira ndaa Edhomu reshe, avo vakadzitorera nyika yangu kuita nhaka yavo, ngokudakara kwomwoyo yavo yeshe, nokugutiswa kweshe, kuti vairashe kuti ipambwe.’

⁶ Ndizvo, profeta ngendaa yenyika yaIsuraeri, newe uti kumitunhu, nokuzvimitunhu, nokumikova, nokumapani, uti, ‘Izvi ndizvo zvinoronza Mambo Mwari, Mwari: Ringira, ndinoereketa muushungu hwomundurumwa dzangu, ngokuti imwimwi mwakatwara kutukwa ngemadzinza.

⁷ Ndizvo izvi ndizvo zvinoronza Mambo Mwari, Mwari: Ndinopika kuti madzinza akakutendenedza kweshe iwo pachawo anozotwara kutukwa.’

⁸ “Asi imwimwi, O mitunhu yaIsuraeri, munozomerera matai enyu, mwechibereka michero yenyu kunevanhu vangu Isuraeri; ngokuti vachakasira kuuya kanyi.

⁹ Zvino, ringira, ndiri wenyu; ndinozokunukukira kwomuri, nemwi munozorimwa nokukushwa;

¹⁰ ndinozowanza vanhu kwomuri, mhatso yeshe yaIsuraeri, yeshe yayo; madhorobha anozogarwa, nendau dzakaparadzwa dzinozoakiswa;

¹¹ ndinozowanza kwomuri vanhu nezvifuyo. Zvinozowanziswa nokubereka; neni ndinozoita kuti mugare kudai ngekare, ndiite kwomuri zvakapinda kunaka pane zvokutanga kwenyu. Zvino munozozia kuti inini ndini Mambo Mwari.

¹² Ndinozoita kuti vanhu vahambe padera penyu, vanhu vangu Isuraeri; navo vanozokugara nhaka, newe unozoita nhaka yavo. Auchazoiti kuti vafirwe ngevana.

¹³ “Izvi ndizvo zvinoronza Mambo Mwari, Mwari: Ngokuti vanoti kwouri, ‘Nyika iyo inopedza vanhu, nayo yakaita kuti madzinza ako afirwe ngevana,’

¹⁴ ndizvo auchazopedzi vanhu, madzinza ako aachazofirwi ngevana, unoronza Mambo Mwaro, Mwari.

¹⁵ Andichazoiti kuti vanhu vazwe kutuka kwemadzinza, auchazotwari kutsverudzwa kwevanhu nakamwe; auchazoiti kuti madzinza ako apumhunwe, unoronza Mambo Mwari, Mwari.”

Kupona Kutsva kwaIsuraeri

¹⁶ Izwi raMambo Mwari rakagumazve kwendiri rechiti,

¹⁷ “Mukororo womunhu, apo vemhatso yaIsuraeri vaigara munyika yavo, vakaisvipisa ngenjira yavo nezviito zvavo; kuita kwavo pamberi pangu kwaiya kwakadai ngokusvipiswa kwomukadzi uri mukusikasukika kwake uri kumwedzi.

¹⁸ Ndizvo ndakadurura ushungu hwangu padera pavo ngendaa yengazi yevaiya vaparadza padera penyika, nendaa yemiedzaniso yavo yokudira yevaiya vakasvipisa ndiyo.

¹⁹ Ndakavaparadzira pakati pemadzinza, vakatataniswa mukati mwenyika; kudai ngenjira dzavo nokudai ngezviito zvavo ndakavatonga.

²⁰ Asi apo pevakaguma mumadzinza, peshe pevakaenda, vakasvipisa zina rangu rakachena, apo pevakaereketwa ndivo kuti, ‘Ava ndivo vanhu vaMambo Mwari, asi vaiya vabuda kubva munyika yake.’

²¹ Asi ndakakurudzwa ngendaa yezina rangu rakachena, iro raiya rasvipiswa ngevemhatso yaIsuraeri pakati pemadzinza kwevakabva.

²² “Ndizvo ereketa kumhatso yaIsuraeri, uti, ‘Izvi ndizvo zvinoronza Mambo Mwari, Mwari: Andiiti izvi ngendaa yako, O mhatso yaIsuraeri, asi ngendaa yezina rangu rakachena, remwakasvipisa pakati pemadzinza apo pemwakabva.

²³ Ndinozochenesa zina rangu guru iro rakasvipiswa pakati pemadzinza, neiro remwakasvipisa imwimwi pakati pavo; nemadzinza anozozia kuti inini ndini Mambo Mwari, unoronza Mambo Mwari, Mwari, apo kubudikidza ndiwe ndinobudisa kucheneswa kwangu mukuona kwemadziso avo.

²⁴ Ngokuti ndinozomutora kubva pakati pemadzinza, ndimuunganidze kubva kunyika dzeshe, ndimuunze munyika yenyu.

²⁵ Ndinozofafaza mvura yakaera padera penyu, nemwi munozoita vakasukika kubva mukusikasukika kwenyu kweshe, nokubva mukudira miedzaniso yenyu yeshe ndinozomusuka.

²⁶ Ndinozomupa mwoyo mutsva, ndinozoisa mweya mutsva mukati mwenyu; ndinozodusa mwoyo webuwe kubva munyama yenyu, ndimupe mwoyo wenyama.

²⁷ Ndinozoisa mweya wangu mukati mwenyu, ndinozoita kuti muhambe muzviemeso zvangu, nemwi munozonasa kungwarira zvitongero zvangu nokuzviita.

²⁸ Zvino munozogara munyika yendakapa madzibaba enyu; imwimwi munozoita vanhu vangu, neni ndinozoita Mwari wenyu.

²⁹ Ndinozomuponesa kubva mukusikasukika kwenyu kweshe; ndinozodaidza koroni, nokuiita kuti iwandise, andizounzi nzara padera penyu.

³⁰ Ndinozowandisa michero yemiti nokuwandisa zvinomeriswa mumunda, kuti muchatambudzwazve mukutsverudzwa ngendaa yenzara pakati pemadzinza.

³¹ Zvino munozokarakadza kushata kwenjira dzenyu, nezviito zvenyu zvaiya zvisikazi kunaka; munozoita vanodzinyenya mukuona kwenyu ngendaa yokushata kwenyu nezviito zvenyu zvinonyangadza.

³² Andiiti izvi ngendaa yenyu, unoronza Mambo Mwari, Mwari; izvo ngazviziikanwe kwomuri. Itai vanotsverudzwa nokukangaidzwa ngendaa yenjira dzenyu, O mhatso yaIsuraeri.’

³³ “Izvi ndizvo zvinoronza Mambo Mwari, Mwari: Pazuva rendinomusuka kubva kuzvishaishi zvenyu zveshe, ndinozoita kuti madhorobha agarwe nendau dzakaparadzwa dzinozoakiswa.

³⁴ Nyika dzakaita matongo dzinozorimwa, idzo dzaiya matongo mukuona kwaavo veshe vaipinda ndimwo.

³⁵ Navo vanozoti, ‘Iyi nyika yaiya matongo yaita kudai ngomunda weEdheni, nemadhorobha ayo aiya akaparadzwa, aiya matongo, neaiya akaondomoka, anoita ashosherwa nokugarwa.’

³⁶ Zvino madzinza akasara anomutendenedza anozozia kuti inini Mambo Mwari ndakaakisa ndau dzakaondomoka, nokusima ndau dzaiya matongo; inini Mambo Mwari ndaereketa, neni ndinozochiita.”

³⁷ “Izvi ndizvo zvinoronza Mambo Mwari, Mwari: Ngendaa yeichizve ndinozotendera mhatso yaIsuraeri, kuti indikumbire kuti ndivaitire ichi, kuvawanza kudai ngezvifuyo.

³⁸ Kudai ngezvifuyo zvokuita mubairo, kudai ngezvifuyo zvomuJerusarema ngenguva yemishongano yaro yemadhiri, ndizvo madhorobha akaparadzwa anozozadzwa ngezvikwata zvevanhu. Zvino vanozozia kuti inini ndini Mambo Mwari.”