Ezek. 34 - Bhaibheri Rakachena muChindau

Vaushi vaIsuraeri

¹ Izwi raMambo Mwari rakauya kwendiri rechiti,

² “Mukororo womunhu, profeta kuitira ndaa vaushi vaIsuraeri, profeta wechiti kwevari, ‘Izvi ndizvo zvinoronza Mambo Mwari, Mwari: A, imwimwi vaushi, vaushi vaIsuraeri vanodzigutisa pachavo! Vaushi avasisiri kugutisa makwai here?

³ Imwimwi munodya mafuta, munodzisimidza machira emamviri, munouraya dzakakora, asi amugutisi makwai.

⁴ Amuzi kugwinyisa akarembedzeka, amuzi kurapa anenhenda, amuzi kusunga akaguka, amuzi kupetudza awo akapepesheka, nokuti kutsvaka akarashika, asi mwakaatonga ngokumanikidza ngorunya.

⁵ Ndizvo akapararira, ngokuti paiya pasina muushi; nokupararirwa akaita kudya kwezvikara zveshe zvomushango.

⁶ Makwai angu akapepesheka padera pemitunhu yeshe, nepadera pezvimitunhu zveshe; makwai angu akapararira padera penyika yeshe, pasina naumwe unoaringira nokuti kuatsvaka.’

⁷ “Ndizvo, imwimwi vaushi, izwanyi izwi raMambo Mwari, Mwari.

⁸ Kudai ngezvendinopona, unoronza Mambo Mwari, Mwari, ngokuti makwai angu aita kudya kwezvikara, nemakwai angu aita kudya kwezvikara zveshe zvomushango, ngokuti paiya pasina muushi, ngokuti nevaushi vangu avazi kutsvaka makwai angu, asi vaushi vakadzigutisa pachavo, vasikazi kugutisa makwai angu;

⁹ ndizvo, imwimwi vaushi, izwai izwi raMambo Mwari.

¹⁰ Izvi ndizvo zvinoronza Mambo Mwari, Mwari: Ringira, ndinorwa nevaushi; ndinozobvunza makwai angu panyara dzavo, nokuvarambidza kugutisa makwai kwavo; vaushi avachazodzigutisi. Ndinozonunura makwai angu kubva kumiromo yavo, kuti asachazoita kudya kwevari.

Muushi Wakanaka

¹¹ “Ngokuti izvi ndizvo zvinoronza Mambo Mwari, Mwari: Ringira, inini pachangu ndinozotsvaka makwai angu nokuaona.

¹² Kudai ngomuushi unotsvaka zvifuyo zvake, apo ari pakati pemakwai ake akapararira, ndizvo ndinozotsvaka makwai angu. Ndinozoabvisa kundau dzeshe paakapararira ngezuva remakore nechidima chakakora.

¹³ Ndinozoaunza kubva pakati pevanhu nokuaunganidza kubva kunyika, ndinozoaunza munyika yawo; ndinozoagutisa padera pemitunhu yaIsuraeri pasinde pendwizi, nokundau dzeshe dzinogarwa ngevanhu venyika.

¹⁴ Ndinozoagutisa ngemafuro akanaka, nepadera pemitunhu yakaturama yaIsuraeri ndipo panemafuro awo; naapo anozoata pashi mukati mwemafuro akanaka, anozodya mafuro akasvipira padera pemitunhu yaIsuraeri.

¹⁵ Inini pachangu ndinozoita muushi wemakwai angu, ndinozoita kuti aate pashi, unoronza Mambo Mwari, Mwari.

¹⁶ Ndinozotsvaka akarashika, ndinozopetudza awo akapauka, ndechisunga awo akaguka, ndechigwinyisa akarembedzeka, asi ndinozouraya akakora neanesimba. Ndinozoagutisa ngokutonga kwakanaka.

¹⁷ “Asi imwimwi, zvifuyo zvangu, izvi ndizvo zvinoronza Mambo Mwari, Mwari: Ringirai, ndinotonga pakati pemakwai nemakwai, pakati pemagondohwe nemagotokoto.

¹⁸ Azvizi kumuringana here kuti mugutiswe ngemafuro akanaka, asi munosisira kutsikira pashi ngetsoka dzenyu mafuro enyu eshe? Naapo pomunomwa mvura yakachena, munosisira kutsikatsika akasara ngetsoka dzenyu here?

¹⁹ Nemakwai angu anosisira kudya zvemwatsikatsika ngetsoka dzenyu here, nokumwa iyo yemwakavhundura ngetsoka dzenyu?

²⁰ “Ndizvo izvi ndizvo zvinoronza Mambo Mwari, Mwari kwevari: Ringirai, inini ndemene ndinozotonga padera pemakwai akakora nemakwai akaonda.

²¹ Ngokuti imwimwi mwatunga ngeparutii nepafudzi, mwechithuthumidza dzeshe mhuka dzinenhenda ngenyanga dzenyu, metsa mwadziparadzira kuretu nokupamhama,

²² ndinozoponesa mutanga wangu, nawo auchazopambwi neni; ndinozotonga pakati pemakwai nemakwai.

²³ Ndinozoemesa muushi umwe padera pawo, muranda wangu Dhavhidha, naye unozoagutisa; unozoausha, unozoita muushi wawo.

²⁴ Neni inini, Mambo Mwari, ndinozoita Mwari wawo, nomuranda wangu Dhavhidha unozoita mutongi pakati pawo; inini Mambo Mwari ndaereketa.

²⁵ Neni ndinozoita chitenderano chokunyarara nawo, ndinozoita kuti zvikara zvomushango zvipere munyika, kuti agare mushango, nemakwai mumakwasha ngokungwaririka.

²⁶ “Ndinozoaita nendau yakatendenedza chimutunhu changu chifumiso; ndinozotumira pashi bumhakamwe ngenguva yaro; rinozoapo bumhakamwe rezvifumiso.

²⁷ Miti yomushango inozobereka michero yayo, nenyika inozobudisa zvakawanda zvayo. Anozongwaririka munyika yawo, anozozia kuti inini ndini Mambo Mwari, apo pendinozogura mipiningidzo yemajoka awo, nokuanunura kubva munyara dzaavo avo vakavaita hloko.

²⁸ Aachazopambwizve ngemadzinza, nokuti zvikara zvomunyika azvizoadyi; anozogara ngokungwaririka; akuna naumwe unozoatyisidzira.

²⁹ Ndinozoasimira zvisimwa zvinembiri, nawo aachazopedzwi ngenzara munyika, nawo aachazotwari kutukwa ngemadzinza.

³⁰ Anozozia kuti inini Mambo Mwari, Mwari wawo ndinawo, nokuti iwo, mhatso yaIsuraeri, vanhu vangu, unoronza Mambo Mwari, Mwari.

³¹ Imwimwi muri makwai angu, mutanga wembusho wangu, muri vanhu vangu, neinini ndiri Mwari wenyu, unoronza Mambo Mwari, Mwari.”