Ezek. 33 - Bhaibheri Rakachena muChindau

Mwari Unoemesa Ezekieri Kuita Murindi

¹ Izwi raMambo Mwari rakauya kwendiri rechiti,

² “O mukororo womunhu, ereketa kuvanhu vako, wechiti kwevari, ‘Kudai ndechiunza shoti padera penyika, nevanhu venyikayo vechitora munhu umwe kubva pakati pavo nokumuemesa kuita murindi wavo;

³ nokudai murindi echiona shoti yechiuya padera penyika, echiridza gwama, nokunyowedza vanhu;

⁴ zvino kunyazwi ndiani unozozwa bope regwama, asikanyowedzwi ndiro, neshoti yechiguma nokumuuraya, ngazi yake inozogara padera pesoro rake.

⁵ Wakazwa bope regwama, naye aazi kuashira kunyowedzwa; ngazi yake inozogara padera pake. Asi kudai akaashira kunyowedzwa, waizoponesa mweya wake.

⁶ Asi kudai murindi echiona shoti yechiuya, akarekera kuridza gwama, nevanhu vasikanyowedzwi, kudai shoti yechiguma, yechiuraya munhu kunyazwi ngouri pakati pavo, uwo waurawa mukushata kwake, asi ngazi yake ndinozoibvunza kunyara youwo murindi.’

⁷ “Ndizvo iwewe, mukororo womunhu, ndakuemesa kuita murindi wemhatso yaIsuraeri; kunyazwi ngeiri nguva younozwa izwi rinobva kumuromo wangu, unozovapa nyowedzo inobva kwendiri.

⁸ Kuti ndikati kunouwo wakashata, ‘O munhu wakashata, ngegwinyiso unozofa,’ newe usikaereketi kumunyowedza uwo wakashata kuti atenderuke abve munjira yake, wakashata unozofa mukushata kwake, asi ngazi yake ndinozoibvunza kubva kunyara dzako.

⁹ Asi kudai wechinyowedza uwo wakashata kuti atenderuke kubva kunjira yake, naye asikatenderuki kubva munjira yake, wakashata unozofira mukushata kwake, asi iwewe unozoponesa mweya wako.

Mushando woMunhu Umwe ngaUmwe

¹⁰ “Zvino iwewe, mukororo womunhu, ereketa kumhatso yaIsuraeri wechiti, ‘Izvi ndizvo zvounoereketa: Kupauka kwedu nezvishaishi zvedu zviri padera pedu, nesu tinoperezeka ngendaa yazvo; tinozoita maponerenyi zvino?’

¹¹ Ereketa kwevari uti, ‘Kudai ngezvendinopona, unoronza Mambo Mwari, Mwari, andina kudakara ngorufu rwowakashata, asi kuti wakashata atenderuke kubva munjira yake, apone; tenderuka, tenderuka kubva munjira yako yakashata; ngokuti unoda kufa ngenyi, O mhatso yaIsuraeri?’

¹² “Newe, mukororo womunhu, ereketa kuvanhu vako, ‘Kururama kwowakarurama akuzomununuri apo apauka; asingendaa yokushaisha kwowakashata, iye aazowiswi ndikwo ngeiro zuva raanotenderuka kubva mukushaisha; wakarurama aazokoni kupona ngokururama kwake ngeiro zuva raanoshaisha.’

¹³ Kunyazwi ndinoti kunouwo wakarurama kuti, ‘Ngegwinyiso unozopona; asi kudai iye echigonda kururama kwake kwemene, kuti akaita zvakashata, apana nachimwe chezviito zvakarurama zvinokarakadzwa; asi mukushaisha ukwo kwaakaita, unozofiramwo.’

¹⁴ Zve, kunyazwi ndikati kunowakashata kuti, ‘Ngegwinyiso iwewe unozofa,’ asi kudai iye echitenderuka kubva mukushaisha kwake, akahamba ngomutemo nokuita zvakarurama;

¹⁵ kudai wakashata echipetudza chibatiso, nokupetudza izvo zvakatorwa ngokubira, nokuhamba muzviemeso zvokupona, asikaiti zvakashata, ngegwinyiso unozorarama, aazofi.

¹⁶ Akuna nachimwe chezvishaishi zvaakaita chinokarakadzwa kumuitira ndaa; wakaita izvo zvinotenderwa nezvakarurama; ngegwinyiso unozorarama.

¹⁷ “Asi vanhu vako vanoti, ‘Njira yaMambo Mwari aizi kururama,’ apo iri njira yavo isikazi kururama.

¹⁸ Naapo wakarurama echikunukuka kubva mukururama kwake, echiita zvishaishi, unozofa ndizvo.

¹⁹ Naapo wakashata echitenderuka kubva mukushata kwake, echiita izvo zvinotenderwa nezvakarurama, unozopona ndizvo.

²⁰ Asi munoti, ‘Njira yaMambo Mwari aizi kururama.’ O mhatso yaIsuraeri, ndinozotonga munhu weshe kudai ngenjira dzake.”

Mashoko oKuwa kweJerusarema

²¹ Mugore regumi nemairi ouhloko hwedu, mumwedzi wegumi, ngezuva rechishanu romwedziwo, umwe wakapokonyoka kubva Jerusarema, wakauya kwendiri echiti, “Dhorobha ranyiswa.”

²² Zvino nyara yaMambo Mwari yaiya padera pangu mumadeekoni, uwo wakapokonyoka asati aguma; asi waiya abeura muromo wangu panguva iyo yaakaguma ndiyo kwendiri mumangwanani; nomuromo wangu wakabeurwa, neni andizi kuchazoita uwo usikakoni kuereketa.

Zvishaishi zveVanhu

²³ Izwi raMambo Mwari rakaguma kwendiri rechiti,

²⁴ “Mukororo womunhu, vagari vomundau idzi dzakaparadzwa munyika yaIsuraeri vanoangira kuereketa vechiti, ‘Abrahama waiya munhu umwe, asi wakagara nhaka yenyika; asi isusu tiri vazhinji; nyika yakapuwa kwetiri kuti tigare nhaka.’

²⁵ Ndizvo ereketa kwevari kuti, ‘Izvi ndizvo zvinoronza Mambo Mwari, Mwari: Munodya nyama inengazi, nokumirudza madziso enyu kuringira miedzaniso yenyu yokudira, nokuparadza ngazi; zvino munozogara nhaka yenyika here?

²⁶ Munogonda shoti dzenyu, munoshanda zvinonyangadza, neumwe ngaumwe wenyu unosvipisa mukadzi womuakirwana wake; munozogara nhaka yenyika here?’

²⁷ “Ronza izvi kwevari, uti, ‘Izvi ndizvo zvinoronza Mambo Mwari, Mwari: Kudai ngezvendinopona, ngegwinyiso avo vari mundau dzakaparadzwa vanozowa ngeshoti, naavo vari murubaya, ndinozovapira kuti vadyiwe ngezvikara, naavo vari mumakamba nomumapako vanozofa ngenhenda.

²⁸ Ndinozoita kuti nyika iite matongo nokuparadzwa, nokudzikudza kwesimba rayo kunozopera; nemitunhu yaIsuraeri inozoita matongo, kuti akuna naumwe unozohamba ndimwo.

²⁹ Zvino vanozozia kuti inini ndini Mambo Mwari, apo pendinozoita matongo ngendaa yezvinyangadzo zvavo zveshe zvevakaita.’

Zvinobuda Kubva muIzwi roMuprofeti

³⁰ “Ngendaa yako, iwewe mukororo womunhu, vanhu vako vanoereketa pamwepo ndiwe kukuitira ndaa mumarukumbati, nomumisiwo yemhatso, vanoereketa umwe kunoumweni, munhu weshe kunomuakirwana wake echiti, ‘Uya, uzwe izwi iro rinobuda kubva kumuromo waMambo Mwari.’

³¹ Vanouya kwouri kudai ngokuuya kunoita vanhu, navo vanogara pamberi pako kudai ngezvinoita vanhu vangu, vanozwa mazwi ako, asi avazoapurutani. Ngokuti ngomuromo wavo vanoonisa rudo, asi mwoyo wavo unokara ngokuda kuuyirwa ngezvakawanda.

³² Kwevari iwewe wakadai ngomuembi woruyo rwerudo runoembwa ngoune izwi rakanaka, unokona kunasa kuridza mbira; vanozwa mazwi ako zvaanoronza, asi avaaiti.

³³ Naapo izvi zvinouya (ngegwinyiso zvinozouya), zvino vanozozia kuti muprofeti waiya aripo pakati pavo.”