Ezek. 32 - Bhaibheri Rakachena muChindau

Mambo weEgipite Unoedzaniswa neNgwena

¹ Mugore regumi nemairi, mumwedzi wegumi nemiiri, pazuva rokutanga remwedzi, izwi raMambo Mwari rakaguma kwendiri rechiti,

² “Mukororo womunhu, ita chiriro ngendaa yaFaro mambo weEgipite, newe uronze kwaari kuti, ‘Iwewe unodziedzanisa pachako nemhondoro itsva pakati pemadzinza, asi wakadai ngengwena muruandhle; unobinyauka mundwizi dzako, unovhundura mvura ngetsoka dzako, nokuvhundura ndwizi dzavo.

³ Izvi ndizvo zvinoronza Mambo Mwari, Mwari: Mumbungano yevanhu vazhinji ndinozokandira chitaa changu padera pako; vanozokukwidza kukubudisa muchitaa changu.

⁴ Ndinozokukandira pashi pamavhu, pamhene panyika yakaoma ndinozokurasha, ndechiita kuti shiri dzeshe dzomudenga dzimate padera pako, ndinozoita kuti zvikara zveshe zvomunyika zvidzigutise ndiwe.

⁵ Ndinozotatanisa nyama yako padera pemitunhu, nokuzadza mabani nemiiri yakafa yako.

⁶ Ndinozodiridzira nyika ngengazi yako inoerera yechiguma metsa kumitunhu, nendwizi dzinozozadzwa ndiwe.

⁷ Naapo ndinokudzima, ndinozofukidzira matenga, nokuita nyeredzi dzawo chidima; ndinozofukidzira zuva ngegore, nomwedzi auzojeki.

⁸ Zveshe zvinojeka zvomumatenga ndinozozvidzima padera pako, nokuisa chidima padera penyika yako, unoronza Mambo Mwari, Mwari.’

⁹ “Ndinozotambudza mwoyo yevanhu vazhinji, apo pendinozounza kuparadzwa kwako pakati pemadzinza, mukati mwenyika dzousikazi kuzia iwewe.

¹⁰ Ndinozoita kuti vanhu vazhinji vashamiswe ndiwe, madzimambo avo anozotyiswa kakurutu ndiwe. Apo pendinoemesa shoti yangu pamberi pavo, vanozohuta nguva yeshe, munhu weshe ngendaa yokupona kwake, ngezuva rokuwa kwako.

¹¹ “Ngokuti izvi ndizvo zvinoronza Mambo Mwari, Mwari: Shoti yamambo weBhabhuroni inozoguma padera pako kurwa newe.

¹² Ndinozoita kuti mbungano yako iwe ngeshoti dzevanesimba, veshe vavo vanopinda kutyisa pakati pemadzinza. Vanozoparadza kudzikudza kweEgipite kuita matongo, mbungano yavo yeshe inozoparadzwa.

¹³ Ndinozoparadza mhuka dzayo dzeshe kubva pasinde pemvura zhinji; apana rutsoka rwomunhu runozoivhundurazve, nokuti madondova emhuka aazoivhunduri.

¹⁴ Zvino ndinozoita kuti mvura yavo iere, nokuita kuti ndwizi dzavo dzierere kudai ngemafuta, unoronza Mambo Mwari, Mwari.

¹⁵ Apo pendinoita nyika yaEgipite matongo, naapo nyika peinobvisirwa zveshe izvo zvinoizadza, apo pendinochaya veshe avo vanogara mweiri, zvino vanozozia kuti inini ndini Mambo Mwari.

¹⁶ Ichi ndicho chiriro chevanozochema ndicho. Madzimai emadzinza anozochiemba. Padera peEgipite nembungano dzayo, dzeshe dzichachiemba dzechiichema, unoronza Mambo Mwari.”

Nyika yeVakafa

¹⁷ Mugore regumi nemairi, mumwedzi wokutonga, ngezuva regumi nemashanu romwedzi, izwi raMambo Mwari rakauya kwendiri rechiti,

¹⁸ “Mukororo womunhu, bonda ngendaa yembungano yeEgipite, nokuitumira pashi, nevanasikana vemadzinza anembirikira, kuti vadzake kunyika iri pashi, pamwepo naavo vanodzaka murindi.

¹⁹ ‘Ndiani uwo wounopinda ngounaku? Dzaka pashi! Radzikwa kuzorora pamwepo nevasikazi kuchekwa!’

²⁰ Vanozozwa pakati paavo vanourawa ngeshoti. Iyo yapirwa kushoti; twarai zveshe iyo nembungano yayo.

²¹ Madzimambo akagwinya anozoereketa ndivo, nevadetseri vavo, vari pakati peSheori: ‘Vadzaka pashi, vanoata kuti mwii, vasikazi kuchekwa, vakaurawa ngeshoti.’

²² Asiria iripo nechikwata chayo cheshe, maiba ayo akaitendenedza, veshe vavo vakaurawa, vakawiswa ngeshoti.

²³ Maiba avo akaiswa kumarutii eshe erindi. Chikwata chayo chinotendenedza marupande eshe eiba rayo, veshe vavo vakaurawa, vakawiswa ngeshoti, vanoparadzira kutyisa munyika yevanopona.

²⁴ Eramu iripo nembungano yayo yeshe yakatendenedza iba rayo, veshe vavo vakaurawa, vakawiswa ngeshoti, avo vakadzaka pashi, vasikazi kuchekwa, kuenda munyika iri pashi, vanoparadzira kutyisa munyika yevanopona. Vanotwara kutsveruka kwavo pamwepo naavo vanodzaka pashi murindi.

²⁵ Vakamunasirira mubhedhi pakati pevakaurawa pamwepo nembungano yake yeshe; maiba avo eshe anomutendenedza; veshe vavo avazi kuchekwa, vakaurawa ngeshoti; ngokuti kutyisa kwavo kwaiya kwapararira munyika yevanopona, vanotwara kutsveruka kwavo pamwepo naavo vanodzaka murindi; vakaiswa pakati paavo vakaurawa.

²⁶ “Meshekhi naThubhari varipo nembungano yavo yeshe, maiba avo anovatendenedza, veshe vavo avazi kuchekwa, vakaurawa ngeshoti, ngokuti vakaparadzira kutyisa munyika yevanopona.

²⁷ Navo avazoati pamwepo nevanesimba, vakawiswa vasikazi kuchekwa, avo vakadzaka muSheori vane zvokurwa ndizvo zvavo; navo vakatsamira shoti dzavo pashi pemasoro avo, asi kushata kwavo kunozoa padera pemagodo avo, ngokuti kutyisa kwevanesimba kwaiya munyika yevanopona.

²⁸ Ndizvo iwewe unozogurwa nokuata pakati pevasikazi kuchekwa, naavo vanourawa ngeshoti.

²⁹ Edhomu uripo, madzimambo ayo nevatongi vayo veshe, avo musimba ravo reshe vanoradzikwa pamwepo naavo vakaurawa ngeshoti; vanoata pamwepo nevasikazi kuchekwa, pamwepo naavo vanodzaka murindi.

³⁰ Vatongi vedera varipo, veshe vavo nevaSidhoni veshe avo vadzaka pashi mukutsveruka nevakaurawa, mukutyisa kweshe kwakaitwa ngesimba ravo; vanoata vasikazi kuchekwa pamwepo naavo vakaurawa ngeshoti, vanotwara kutsveruka kwavo pamwepo naavo vanodzaka murindi.

³¹ “Naapo Faro paanovaona, unozoembedzerwa ngendaa yembungano yake yeshe, Faro nehondo yake yeshe vakaurawa ngeshoti, unoronza Mambo Mwari.

³² Ngokuti ndakaparadzira kutyisa munyika yevanopona; ndizvo unozoradzikwa kuzorora pakati pevasikazi kuchekwa, pamwepo naavo vakaurawa ngeshoti, Faro nembungano yake yeshe, unoronza Mambo Mwari, Mwari.”