Ezek. 31 - Bhaibheri Rakachena muChindau

Egipite Inoedzaniswa noMuti woMusedhare

¹ Mugore regumi narimwe, mumwedzi wechitatu, pazuva rokutanga romwedzi, izwi raMambo Mwari rakaguma kwendiri rechiti,

² “Mukororo womunhu,” ereketa kunaFaro mambo weEgipite, nokumbungano yake. “Ndiani ungaedzaniswa newe ngoukuru hwako?

³ Ringira muAsiria waiya akadai ngomusedhare womuRebhanoni unematai akanaka, negwasha rinemabvute, nechiemo chakareba; nomwoyo wawo unopinda mumakore akakora.

⁴ Mvura yakawanda yakaugutisa, noruandhle rwakauita kuti ukure kureba nendwizi dzawo dzakaerera kutendenedza pandau powakasimwa, rwechitumira migero yarwo kumiti yeshe yomushango.

⁵ Ndizvo wakakura kureba kuenda mudenga padera pemiti yeshe yomushango; matai awo akakura akapasha, nematai awo akarebeswa ngendaa youwandu hwemvura.

⁶ Dzeshe shiri dzomudenga dzakaita zvisaki zvadzo mumatai awo; pashi pematai awo mhuka dzeshe dzomushango dzakaberekera vana vadzo, nepashi pebvute rawo pakagarwa ngemadzinza eshe makuru.

⁷ Waiya wakanaka mukukura kwawo, mukureba kwematai awo; ngokuti nzinde dzawo dzaidzama pashi pamvura zhinji.

⁸ Misedhare mumunda waMwari aizi kukona kuufisha, nokuti miti yemifiri matai awo aiya asikazi kutodzana nematai awo, nemiti yemiprani yaiya isikakoni kuedzaniswa namatai awo; mwaiya musina nomuti naumwe mumunda waMwari waitodzana nawo ngounaku hwawo.

⁹ Ndakauita kuti unake ngendaa youwandu hwematai awo, kuemura kwemiti yeshe yaiya muEdheni mumunda waMwari.

¹⁰ “Izvi ndizvo zvinoronza Mambo Mwari, Mwari: Ngokuti wakakura kureba kuenda kudenga, nawo wakaemesa mwoyo wawo pakati pemakore, nomwoyo wawo wakadzikudza ngendaa yourebu hwawo,

¹¹ ndakaupira munyara yomutongi wemadzinza; washanda nawo kudai ngezvinosisira kushata kwake. Ndaurasha.

¹² Vapara vanobva pakati pemadzinza anopinda kutyisa vautemera pashi nokuusiya. Pamitunhu nomumabani eshe matai awo awa, nematai awo agukira mumvura dzendwizi dzeshe dzomunyika; nevanhu veshe venyika vaenda kubva mubvute rawo, nokuusiya.

¹³ Padera pedanda rawa dzeshe shiri dzomudenga dzinozogarapo, mhuka dzeshe dzomushango dzinogara pakati pematai awo.

¹⁴ Zveshe izvi kuitira kuti isaapo miti iri pasinde pemvura ingakura kurebesa mudenga nokuti kuguma mwoyo wawo mumakore kuti isaapo miti inomwa mvura ingakwira kugumapo kweiri muurebu, kunyika iri pashi nevakororo vevanhu veshe, pamwepo naavo vanodzaka murindi.

¹⁵ “Izvi ndizvo zvinoronza Mambo Mwari, Mwari: Pazuva rewakadzaka pashi muSheori ndakakonya kudzama ngepadera pake, ndakaifukidza; ndakapinga ndwizi yayo, nemvura yayo zhinji yakaringirwa. Ndakafukidza Rebhanoni mukutsumba, nemiti yeshe yomushango yakademera ngendaa yake.

¹⁶ Ndakaita kuti madzinza ahute ngebope rokuwa kwaro, apo pendakarikandira pashi muSheori pamwepo naavo vanodzaka murindi; nemiti yeshe yomuEdheni, yakatsanangurwa neyakapinda kunaka yeRebhanoni, yeshe yaimwa mvura, yaiembedzerwa munyika yepashi.

¹⁷ Vakadzakawo pashi muSheori pamwepo nawo, kuneavo vakaurawa ngeshoti, pamwepo nehondo yayo, avo vaigara pashi mubvute rawo pakati pemadzinza.

¹⁸ “Ngouri pakati pemiti yeEdheni ungaedzaniswa newe muuthende nomuukuru? Zvino unozodzaswa pashi pamwepo nemiti yomuEdheni kunyika iri pashi; unozoata pakati pevasikazi kuchekwa, pamwepo naavo vakaurawa ngeshoti. Uyu ndiFaro nembungano yake yeshe, unoronza Mambo Mwari.”