Ezek. 30 - Bhaibheri Rakachena muChindau

Mambo Mwari Unozoorora Egipite

¹ Izwi raMambo Mwari rakaguma kwendiri rechiti,

² “Mukororo womunhu, profeta, uti, ‘Izvi ndizvo zvinoronza Mambo Mwari, Mwari: Boorerai imwimwi,’ “Ihehe ngeiro zuva!

³ Ngokuti zuva iro raapasinde, zuva raMambo Mwari raapasinde; rinozoita zuva remakore, nguva yokutambudzika kwemadzinza.

⁴ “Shoti inozouya padera peEgipite, nokurwadziwa kukuru kunozopinda padera peEthiopia, apo vanobayiwa vanowa muEgipite, noupfumi wayo unotorwa, madzeyo ayo anoputsirwa pashi.

⁵ Ethiopia, Phuti, Rudhi, neArabhia reshe, Ribhia, nevanhu venyika yakaita chitenderano nayo, vanozowa pamwepo navo ngeshoti.

⁶ “Izvi ndizvo zvinoronza Mambo Mwari: Avo vanotseya Egipite vanozowa nokudzikudza kwesimba rayo kunozodzaswa pashi; kubvira Migidhori metsa paSiene vanozowira mukati mwayo ngeshoti, unoronza Mambo Mwari.

⁷ Vanozoita matongo mukati mwenyika dzimweni dziri matongo, nemadhorobha ayo anozowa pakati pemadhorobha akaitwa matongo.

⁸ Zvino vanozozia kuti inini ndini Mambo Mwari, apo ndabasa muriro muEgipite, naavo veshe vanoidetsera vaparadzwa. vanozoparadzwa.

⁹ Pairo zuva vanotumwa vanozobuda kubva pamberi pangu, kuenda vari mungarava kootyisa vaEthiopia vanodzirekeredza, nokurwadziwa kukuru kunozouya padera pavo pazuva reEgipite; ngokuti, ringirai, rinouya.

¹⁰ “Izvi ndizvo zvinoronza Mambo Mwari, Mwari: Ndinozoitawo kuti mbungano yeEgipite ipere ngenyara yaNebhukhadhineza mambo weBhabhuroni.

¹¹ Iye nevanhu vake vanaye, vanotyisa yaamho kumadzinza, vanozounzwa kuti vaparadze nyika; vanozoshwamura shoti dzavo kurwa neEgipite, nokuzadza nyika ngevakaurawa.

¹² Ndinozoomesa ndwizi, nokutengesa nyika munyara dzevanhu vakashata; neni ndinozoita nyika matongo, nazvo zveshe zviri mukati mwayo, ngenyara dzevapara. Inini Mambo Mwari ndaereketa.

¹³ “Izvi ndizvo zvinoronza Mambo Mwari, Mwari: Ndinozoparadza miedzaniso yokudira, ndinozoita kuti miedzaniso yavo yokudira ipere kubva Mempfisi; akuchazoapo mutongi munyika yeEgipite; ndinozoisa kutya munyika yeEgipite.

¹⁴ Ndinozoita Phathrosi matongo, nokubasa muriro muZoani, ndinozoita kutonga padera peThebhesi.

¹⁵ Ndinozodurura ushungu hwangu padera pePherusiumu, rusvingo rweEgipite; ndinozouraya mbungano yeThebhesi.

¹⁶ Ndinozobasa muriro padera peEgipite; Pherusiumu rinozowa mukurwadziwa kukuru, Thebhesi rinozopwanywa, Mempfisi rinozopinda mumadambudziko pazuva.

¹⁷ Vamuna vatsva veOni nevePhibhesethi vanozowa ngeshoti; nemadhorobha pachawo anozoenda muuhloko.

¹⁸ PaThafanehesi zuva rinozoita chidima, apo pendinozogurapo majoka eEgipite, nokudzikudza kwesimba rayo kunozopera kweriri; gore rinozorifukidza, nevanasikana varo madhorobha vanozoenda muuhloko.

¹⁹ Ngokudaro ndinozoita kutonga padera peEgipite. Zvino vanozozia kuti inini ndini Mambo Mwari.”

Simba Rakaguka raMambo weEgipite

²⁰ Mugore regumi narimwe, mumwedzi wokutanga waro, ngezuva rechinomwe romwedzi, izwi raMambo Mwari rakaguma kwendiri rechiti,

²¹ “Mukororo womunhu, ndagura muoko waFaro mambo weEgipite; ringira, auzi kupombwa kuti urapwe, upombwe ngebhandichi, kuti ugwinyiswe kubata shoti.

²² Ndizvo izvi ndizvo zvinoronza Mambo Mwari, Mwari: Ringira, ndinorwa naFaro mambo weEgipite; neni ndinozogura mioko yake, yeshe uwo wakagwinya nouwo wakagurwa; ndinozoita kuti shoti ipodzonyoke munyara yake.

²³ Ndinozotatanisa vaEgipite pakati pamadzinza, nokuvaparadzira mukati mwenyika dzeshe.

²⁴ Ndinozogwinyisa mioko yamambo weBhabhuroni, ndiise shoti yangu munyara dzake; asi ndinozogura mioko yaFaro, naye unozogomera ari pamberi pake ngokugomera kwomunhu wakaremadzwa.

²⁵ Ndinozogwinyisa mioko yamambo weBhabhuroni nemioko yaFaro inozorungunuka. Navo vanozozia kuti inini ndini Mambo Mwari, apo pendinozoisa shoti yangu munyara yamambo weBhabhuroni. Unozoitambanudzira padera penyika yeEgipite,

²⁶ neni ndinozoparadzira vaEgipite pakati pemadzinza, nokuvatatanisa pakati penyika. Zvino vanozozia kuti inini ndini Mambo Mwari.”