Ezek. 3 - Bhaibheri Rakachena muChindau

¹ Wakati kwendiri, “O mukororo womunhu, idya icho chapuwa kweuri; idya iri bhuku rinopetwa, uende uerekete kumhatso yaIsuraeri.”

² Ndizvo ndakabeura muromo wangu, naye wakandipa bhuku rinopetwa kuti ndidye.

³ Wakati kwendiri, “Mukororo womunhu, idya bhuku rinopetwa rendinokupa, uzadze ndani yako ndiro.” Zvino ndakaridya; nomukanwa mwangu raitapira kudai ngouchi.

⁴ Wakati kwendiri, “Mukororo womunhu, enda kumhatso yaIsuraeri, uerekete kwevari mazwi angu emene.

⁵ Ngokuti auzi kutumwa kudzinza rinokuereketa kusikaziikanwi nendimi yakakonza, asi kumhatso yaIsuraeri,

⁶ haiwa kuvanhu vazhinji vanokuereketa kusikaziikanwi nevanendimi dzakakonza, avo mazwi avo ousikakoni kuzwa. Ngegwinyiso kudai ndakutuma kwevari vaizokupurutana.

⁷ Asi mhatso yaIsuraeri aizokupurutani, ngokuti avadi kundipurutana; ngokuti mhatso yeshe yaIsuraeri inehuma yakaoma nomwoyo wakakukutara.

⁸ Ringira, ndakaita hope yako kuti ikonze imukire hope dzavo, nehuma yako kuti ikonze imukire huma dzavo.

⁹ Kudai ngebuwe rakaomesesa kupinda eshe, rakaoma kupinda frinti, ndizvo zvendaita huma yako; usavatya nokuti kupera simba ngokuringirika kwavo, ngokuti imhatso inomukira.”

¹⁰ Wakati kwendiri, “Mukororo womunhu, mazwi angu eshe endinozoereketa kwouri aashire mumwoyo mwako, uazwe ngenzee dzako.

¹¹ Zvino, enda kuuhloko, kuvanhu vako, uerekete kwevari uti, ‘Izvi ndizvo zvinoronza Mambo Mwari, Mwari;’ kunyazwi vanozopurutana nokuti kuramba kupurutana.”

¹² Zvino Mweya wakandimirudza padera, naapo uthende hwaMambo Mwari hwamirudzwa kubva pandau pahwo, ndakazwa sure kwangu gwechekweche rokutinhira.

¹³ Kwaiya kutinhira kwemaphaphiro ezvisikwa zvinopona aigwamana rimwe kunerimweni, nokutinhira kwemavhiri pasinde pazvo, nokutinhira kukuru kwemavhiri.

¹⁴ Mweya wakandimirudza padera, ukanditwara, ukaenda neni ndakanyangadzwa; ndakaenda ndiri mukupisha mumweya wangu, nyara yaMambo Mwari yaiya nesimba padera pangu.

¹⁵ Ndakaguma kwevari vouhloko muTherabhibhu, avo vaigara ngepasinde perwizi Khebhari. Neni ndakagara apo pevaigara, ndechishamiswa pakati pavo mazuva manomwe.

Mambo Mwari Unoemesa Ezekieri Kuita Murindi

¹⁶ Mukupera kwemazuva manomwe, izwi raMambo Mwari rakauya kwendiri rechiti,

¹⁷ “Mukororo womunhu, ndakuita murindi wemhatso yaIsuraeri; nguva dzeshe dzounozwa izwi rinobva mumuromo wangu, unozovapa kupangwa kunobva kwendiri.

¹⁸ Dai ndechiti kunewakashata, ‘Ngegwinyiso unozofa,’ newe auzi kumungwadza, nokuti kuereketa kungwadza wakashata kuti abve munjira yake yakashata, kuti aponese ndaramo yake; nouwo munhu wakashata unozofa mukushata kwake; asi ngazi yake ndinozoibvunza panyara yako.

¹⁹ Asi kudai wechimupanga uwo wakashata, naye asikatenderuki kubva mukushata kwake, nokuti kubva munjira yake yakashata, iye unozofa mukushata kwake; asi iwewe waponesa mweya wako.

²⁰ “Zve, kudai munhu wakarurama echikunukuka kubva mukururama kwake nokuita zvinonyangadza, neni ndikaisa chipumhuniso pamberi pake, iye unozofa; ngokuti iwewe wakarekera kumupanga, unozofa mukushaisha kwake, nokururama kwake kwaakaita akuchazokarakadzwi; asi ndinozobvunza ngazi yake panyara yako.

²¹ Kudai zvakanyadaro wapanga munhu wakarurama, kuti uwo munhu wakarurama asashaisha, naye asikashaishi, ngegwinyiso unozopona, ngokuti wakatenda kupangwa; newe unozoponesa mweya wako.”

Ezekieri Unoitwa Chimbungumbungu

²² Zvino nyara yaMambo Mwari yaiya padera pangu; naye wakati kwendiri, “Miruka, ubude, uende mubani, umwo ndinozoereketa newe.”

²³ Ndizvo ndakamiruka, ndikaenda mubani; ringira, uthende hwaMambo Mwari hwaiyapo, kudai ngouthende hwendakaona ndiri pasinde porwizi Khebhari, neni ndakawa ngehope yangu.

²⁴ Mweya wakapotera mwendiri, nawo wakandiemesa ngetsoka dzangu; naye wakaereketa neni, akati kwendiri, “Enda, udzikonyere mumhatso mwako.

²⁵ Asi iwewe, O mukororo womunhu, mapote anozoiswa padera pako, vanozokusunga ndiwo, newe auzokoni kubuda kuenda pakati pevanhu,

²⁶ neni ndinozoita kuti rurumi rwako runamire dera kwomukanwa mwako, kuti uite chimbungumbungu, newe auzokoni kuvapangira; ngokuti imhatso inomukira.

²⁷ Asi apo ndooereketa newe, ndinozobeura muromo wako, newe unozoti kwevari, ‘Izvi ndizvo zvinoronza Mambo Mwari, Mwari;’ uwo unozozwa, ngaazwe, nouwo unoramba ngaarambe kuzwa; ngokuti imhatso inomukira.”