Ezek. 29 - Bhaibheri Rakachena muChindau

Chiprofeti ngendaa yeEgipite

¹ Mugore regumi, mumwedzi wegumi, pazuva regumi nemairi romwedzi, izwi raMambo Mwari rakauya kwendiri rechiti,

² “Mukororo womunhu, ringisa hope yako padera paFaro mambo weEgipite, uprofete kumuitira ndaa, nokuitira ndaa Egipite reshe,

³ uerekete wechiti, ‘Izvi ndizvo zvinoronza Mambo Mwari, Mwari: Ringira, ndinorwa newe, iwewe Faro mambo weEgipite, iwewe goko guru, rinoata pakati pendwizi dzaro,’ rechiti, ‘Naire ngerwangu, ndakadziitira pachaangu.’

⁴ Ndinozoisa zviedzo mutsaya dzako, ndinozoita kuti hove dzendwizi dzako dzinamire pamapande ako. Ndinozokukweya kukubudisa kubva mundwizi yako, nehove dzeshe dzomundwizi dzako dzikakatire kumarakasha ako.

⁵ Ndinozokukandira mushango, iwewe nehove dzeshe dzendwizi dzako; newe unozowira murubaya pamhene, newe auzounganidzwi pamwepo nokutsirwa. Ndakakupira kuti uite chokudya chemhuka dzomushango neshiri dzomudenga.

⁶ Zvino vagari veshe veEgipite vanozozia kuti inini ndini Mambo Mwari, ngokuti vakaita mudondoro worutsanga kumhatso yaIsuraeri.

⁷ Apo pevakakubata ngenyara, iwewe wakavhunika, nokuphazuka pamapfudzi avo eshe; naapo vakatseyama kwouri, iwewe wakaguka nokuita kuti mirenje yavo yeshe ieme.

⁸ “Ndizvo izvi ndizvo zvinoronza Mambo Mwari, Mwari: Ringira, ndinozounza shoti padera pako, nokuuraya kubva kwouri vanhu nemhuka;

⁹ nenyika yeEgipite inozoita matongo nokuparadzwa. Zvino vanozozia kuti inini ndini Mambo Mwari. Ngokuti iye wakati, ‘Rwizi Naire ngerwangu, ndini ndakaruita,’

¹⁰ ndizvo, ringira, ndinorwa newe nendwizi dzako, ndinozoita kuti nyika yeEgipite iparadzwe nokuita matongo, kubvira Migidhori kuenda Siene metsa kuguma kumugano weEthiopia.

¹¹ Akuna rutsoka rwomunhu runozohamba ndimwo, nokuti rutsoka rwemhuka runozohamba ndimwo, aitongozogarwizve makore makumi marongomuna.

¹² Ndinozoita nyika yeEgipite matongo pakati penyika dzakaitwa matongo; nemadhorobha ayo pakati pemadhorobha akaparadzwa anozoita matongo makore makumi marongomuna. Ndinozoparadzira vaEgipite pakati pemadzinza, ndinozovatatanisa mukati mwenyika dzeshe.

¹³ “Asi izvi ndizvo zvinoronza Mambo Mwari, Mwari: Kumagumo emakore makumi marongomuna ndinozounganidza vaEgipite kubva pakati pevanhu apo pevakaparadzirwa.

¹⁴ Ndinozounza avo vakatorwa kuita hloko veEgipite, ndinozovaunza kunyika yePhathrosi, munyika yokubarwa kwavo; unozoapo umambo uri pashi.

¹⁵ Unozoita umambo huri pashi kupinda umambo hweshe, ahuchazodzimirudzizve padera pemadzinza; ngokuti ndinozovatsonza, kuti vasazotonga padera pemadzinza.

¹⁶ Avachazoiti magondero emhatso yaIsuraeri, avo vanozoita kuti kushata kwavo kukarakadzwe, apo vakakunukuka kutsvaka kudetserwa kubva kwevari. Zvino vanozozia kuti inini ndini Mambo Mwari, Mwari.”

Mambo Nebhukadhineza Unozonyisa Egipite

¹⁷ Mugore remakumi mairi nemanomwe, mumwedzi wokutanga, ngezuva rokutanga romwedzi, izwi raMambo Mwari rakaguma kwendiri rechiti,

¹⁸ “Mukororo womunhu, Nebhukhadhineza mambo weBhabhuroni wakaita kuti hondo yake ishande ngesimba guru mukurwa neThire; masoro eshe akaitwa mhanza, nemapfudzi eshe akaphazurwa; asi kunyazwi iye nokuti hondo yake apana chiro chevakaashira kubva Thire, kuripira mishando yaakashandisa kurwa naro.

¹⁹ Ndizvo izvi ndizvo zvinoronza Mambo Mwari, Mwari: Ringira, ndinozopa nyika yeEgipite kunaNebhukhadhineza mambo weBhabhuroni, naye unozotwara upfumi hwaro, kuenda nahwo nokutora zvakachakatwa zvaro; zvinozoita muthuso wehondo yake.

²⁰ Ndamupa nyika yeEgipite kuita muthuso wake waakashandira, ngokuti vakandishandira, unoronza Mambo Mwari, Mwari.

²¹ “Ngeiro zuva ndinozoita kuti runyanga rumerere mhatso yaIsuraeri, ndinozobeura miromo yako pakati pavo.Zvino vanozozia kuti inini ndini Mambo Mwari.”