Ezek. 28 - Bhaibheri Rakachena muChindau

Chiprofeti ngendaa yaMambo weThire

¹ Izwi raMambo Mwari rakauya kwendiri rechiti,

² “Mukororo womunhu, ereketa kunamambo weThire: uti, ‘Izvi ndizvo zvinoronza Mambo Mwari, Mwari: Ngokuti mwoyo wako unodzikurisa,’ newe wati, ‘Inini ndiri chimwari, ndinogara pachigaro chezvimwari, pakati pamwoyo pamaruandhle; zvakanyadaro asi iwewe uri munhu, haiwa Mwari akadi, kunyazwi unoemesa mwoyo wako kudai ngowaMwari.

³ Iwewe ngegwinyiso uri muungwaru kupinda Dhanieri; akuna chakafishika chingafishwa kubva kwouri.

⁴ Ngoungwaru hwako nokuzwisisa kwako wakadzionera upfumi pachako, wakadziunganidzira mukore nesirivha mukati mwoupfumi hwako.

⁵ Ngoungwaru hwako hukuru mukutengesa kwako wakawandisa upfumi hwako, nomwoyo wako wakadzikudza ngendaa youpfumi hwako.’

⁶ “Ndizvo izvi ndizvo zvinoronza Mambo Mwari, Mwari: Ngokuti wakaedzanisa mwoyo wako nomwoyo waMwari,

⁷ ndizvo, ringira, ndinozounza vapara padera pako, vanozotyisa vemadzinza; vanozoshwamura shoti dzavo kurwa nounaku hwoungwaru hwako, vanozosvipisa kun'anikira kwako.

⁸ Vanozokukandira pashi murindi, newe unozofa kudai ngokufa kweavo vanourawa mukati mwemaruandhle.

⁹ Unozoangira kuronza here pamberi pouwo unokuuraya, kuti, ‘Inini ndiri mwari,’ kunyazwi iwewe uri munhu, haiwa mwari akadi, mukati mwenyara dzouwo unokuremadza?

¹⁰ Iwewe unozofa kufa kweavo vasikazi kuchekwa ngenyara dzevapara; ngokuti inini ndaereketa, unoronza Mambo Mwari.”

Kuwa kwaMambo weThire

¹¹ Zve, izwi raMambo Mwari rakauya kwendiri rechiti,

¹² “Mukororo womunhu, ita chiriro ngendaa yamambo weThire, wechiti kwaari, ‘Izvi ndizvo zvinoronza Mambo Mwari, Mwari: Iwewe waiya chionero chezvakaperera, wakazara ngoungwaru, newakaperera muunaku.

¹³ Iwewe waiya muEdheni, mumunda waMwari; buwe reshe rinomutengo mukuru ndiro raiya kufukidzwa kwako, kharneriani, khrisorite, buwe remwedzi, bheriri, onikisi, jasipa, safire, thukwoise, neemeraridhi; mapuwe aya eshe akabatwa nomukore, nokunangura kwako. Pazuva iro rewakasikwa, aiya akatonasirwa.

¹⁴ Nekherubhi rakadzodzwa, kudai ngomurindi, ndakakuemesa; iwewe waiya padera pomutunhu wakachena waMwari; waihamba pakati pemapuwe omuriro.

¹⁵ Iwewe waiya wakaperera munjira dzako kubvira pazuva rewakasikwa, metsa kushata kwaoneka mwouri.

¹⁶ Ngouwandu hwezvokutengesa zvako, wakazadzwa ngokugebenga, newe wakashaisha; ndizvo ndakakurasha kubanze kudai ngechiro chakasvipiswa kubva kumutunhu waMwari; nekherubhi rokurinda rakakudzinga kubva pakati pemapuwe omuriro.

¹⁷ Mwoyo wako waidzikudza ngendaa younaku hwako; iwewe wakaorisa ungwaru hwako ngendaa yokun'anikira kwako. Ndakakukandira pashi pamavhu, ndakakubudisa pamberi pemadzimambo, kuti vadakadze madziso avo ndiwe.

¹⁸ Ngouwandu hwokushaisha kwako, ngokusikarurama kwezvokutengesa zvako, wakasvipisa ndau dzako dzakachena. Ndizvo ndakakubudisira muriro kubva pakati pako, nawo wakakupedza; ndakakupetudza kuita marota padera penyika mukuona kwavo veshe vakakuona.

¹⁹ Veshe vanokuzia pakati pevanhu vanoshamiswa ndiwe; waguma kumagumo anotyisa newe auchazoapopi mhera nariini.’ ”

Chiprofeti ngendaa yeSidhoni

²⁰ Izwi raMambo Mwari rakauya kwendiri rechiti,

²¹ “Mukororo womunhu, ringisa hope yako kuSidhoni, uprofete kweriri kuriitira ndaa,

²² wechiti, ‘Izvi ndizvo zvinoronza Mambo Mwari, Mwari: Ringira ndinorwa newe, O Sidhoni; ndinozoirikidzwa pakati pako. Vanozozia kuti inini ndini Mambo Mwari, apo ndazopedza kuita kutonga kwangu mukati mwaro, nokuonesa kucheneswa kwangu mukati mwaro;

²³ ngokuti ndinozotumira nhenda mweriri nokuparadzwa kwengazi mumapato aro; nevakabaiwa vanozowa mukati mwaro ngeshoti, iyo inorwa padera pavo kumarupande eshe. Navo vanozozia kuti inini ndini Mambo Mwari.’

Isuraeri Unozofumiswa

²⁴ “Mhatso yaIsuraeri aichazoonizve rukato runobaya, nokuti munzwa unokuvadza pakati pavo veshe vakavatendenedza, avo vakavanyenya. Navo vanozozia kuti inini ndini Mambo Mwari.

²⁵ “Izvi ndizvo zvinoronza Mambo Mwari, Mwari: Apo pendinounganidza mhatso yaIsuraeri kubva pakati pevanhu pevakaparadzirwa, nokuonisa kucheneswa kwangu mukati mwavo mukuona kwemadzinza, zvino vanozogara munyika yavo yendakagondisa kunomuranda wangu Jakobe.

²⁶ Vanozogara mukungwaririka mukati mwayo; vanozoaka mhatso nokusima minda yemivhini. Vanozogaramwo mukungwaririka, apo ndazopedza kuita kutonga kwangu padera pavo veshe vaakirwana vavo vanovanyenya vakavatendenedza. Navo vanozozia kuti ndini Mambo Mwari, Mwari wavo.”