Ezek. 26 - Bhaibheri Rakachena muChindau

Chiprofeti ngendaa yeThire

¹ Mugore regumi narimwe, ngezuva rokutanga romwezi, izwi raMambo Mwari rakauya kwendiri rechiti,

² “Mukororo womunhu, ngokuti Thire rakaereketa ngendaa yeJerusarema rechiti, ‘Aha, wapwanywa musiwo wevanhu; wabeurirwa kwendiri; ndinozozadzwa, zvino raitwa matongo,’

³ ndizvo izvi ndizvo zvinoronza Mambo Mwari, Mwari: Ringira ndinorwisana newe, O Thire! Ndinozokwidza madzinza mazhinji kurwa newe, kudai ngoruandhle runokwidza mafungu arwo.

⁴ Anozopwanya marukumbati eThire nokuputsira pashi marusvingo aro. Ndinozokoropa bukuta raro kubva kweriri, ndiriite kudai ngepadera poruware.

⁵ Rinozoita ndau yokuanikira zvitaa pakati poruandhle. Ndaereketa, unoronza Mambo Mwari, Mwari. Rinozoita zvakachakatwa kunemadzinza,

⁶ nevanasikana varo, madhorobha ari munyika, vanozourawa ngeshoti. Zvino vanozozia kuti inini ndini Mambo Mwari.

⁷ “Ngokuti izvi ndizvo zvinoronza Mambo Mwari, Mwari; ‘Ringira, ndinozounza padera peThire kubva dera Nebhukhadhineza mambo weBhabhuroni, mambo wemadzimambo, pamwepo nemahachi, ngoro, vagadhi vemahachi, nehondo yakakura yakagwinya.

⁸ Vanasikana vako, madhorobha ari munyika, unozouraya ngeshoti. Unozokuemesera rusvingo rwokurwa newe, unozoemesa mirwi yemavhu kurwa newe, nokumirudza denga rezvihlangu kurwa newe.

⁹ Unozomirudza matanda okuputsa ndiwo marukumbati ako unozoputsira pashi marusvingo ako, ngematemo ake.

¹⁰ Mahachi ake anozowanda kakurutu, bukuta rawo rinozomufukidza. Marukumbati ako emene anozozungunyika pakutinhira kwevagadhi vemahachi, mavhiri, nengoro, apo echipotera pamisiwo yako, kudai ngezvevanopotera vanhu mudhorobha rakadurwa uri parukumbati.

¹¹ Unozotsikatsika pashi eshe mapato ako ngetsoka dzemahachi ake. Unozouraya vanhu vako ngeshoti, nesika dzako dzakagwinya dzinozowira pashi pamavhu.

¹² Vanozopamba upfumi hwako, nokuchakata zvinotengeswa zvako; vanozoputsira pashi marukumbati ako, nokuparadza mhatso dzako dzakanaka. Mapuwe ako, mapuranga, nemavhu vanozokandira mumvura.

¹³ Ndinozoita kuti bope rengoma dzako dzokuemba rinyarare; nebope rezvitende zvako arichazozwiki.

¹⁴ Ndinozokuita ruware rusina chiro; iwewe unozoita ndau yokutambanudzira zvitaa. Auchazoakiwizve, ngokuti inini Mambo Mwari ndaereketa, unoronza Mambo Mwari, Mwari.’

¹⁵ “Izvi ndizvo zvinoronza Mambo Mwari, Mwari kuneThire: ‘Zviwi azvizohuti here ngebope rokuwa kwako, apo vakaremadzwa vechizogomera, apo kuurayiwa kunozoitwa pakati pako?

¹⁶ Zvino vatongi veshe voruandhle vanozodzaka pashi kubva kumadendemaro avo, vanozodusa zvokusimira zvavo zvoumambo, nokukhumura zvokusimira zvavo zvakarukwa ngezvinemeso. Vanozodzipfekesa ngokuhuta; vanozobondokota pashi pamavhu, vechihuta mikuwo yeshe, vechishamiswa ndiwe.’

¹⁷ Vanozoita chiriro ngendaa yako, vechiti kwouri, “Wakaita maparadzirwenyi kubva paruandhle, O dhorobha rinembiri, raiya rakagwinya paruandhle, iwewe nevagari varo avo vakaisa kutyisa kwavo padera pevagari varo veshe!

¹⁸ Zvino zviwi zvinohuta ngezuva rokuwa kwako; zviwi zviri muruandhle zvinopera simba ngezuva rokuparadzwa kwako.”

¹⁹ “Ngokuti izvi ndizvo zvinoronza Mambo Mwari, Mwari: ‘Apo pendinokuita dhorobha dongo, kudai ngemadhorobha asikachagarwi, apo pendinokwidza padera pako ruandhle rwakadzama, nemvura yakawanda inokufukidza,

²⁰ zvino ndinozokudzasa pashi pamwepo naavo vanodzaka murindi, kuvanhu vomukuwo wekare, ndinozokuita kuti ugare munyika iri pashi, kundau dzakaita matongo dzekare, pamwepo naavo vanodzaka murindi, kuti usachazogarwa; nokuti kuwane ndau munyika yevanopona.

²¹ Ndinozokuunza kumagumo anotyisa, newe auchazoapopi; kunyazwi iwewe wechizotsvakwa, auchazoonekizve,’ unoronza Mambo Mwari, Mwari.”