Ezek. 25 - Bhaibheri Rakachena muChindau

Chiprofeti ngendaa yaAmoni

¹ Izwi raMambo Mwari rakauya kwendiri rechiti,

² “Mukororo womunhu, ringirisa hope yako kuvaAmoni, nokuprofeta kuvaitira ndaa,

³ wechiti kuvaAmoni, ‘Izwai izwi raMambo Mwari, Mwari: Izvi ndizvo zvinoronza Mambo Mwari, Mwari:’ Ngokuti mwakati, ‘Aha!’ kuitira ugaro hwangu hwakachena, apo hwakasvipiswa, nepadera penyika yaIsuraeri, apapo yakaitwa matongo, nepadera pemhatso yaJudha, apo peyakatorwa kuenda muuhloko,

⁴ ndizvo, ringira, ndinozomupira munyara dzevanhu vokumabvazuva kuita nhaka kwevari.Vanozoaka ngome dzavo pakati penyika yenyu, nokudzimika matende avo mukati mwenyu; vanozodya michero yenyu nokumwa mukaka wenyu.

⁵ Ndinozoita kuti Rabha riite mafuro emangamera, nendau yevaAmoni kuita chibaya chezvifuyo. Zvino munozozia kuti inini ndini Mambo Mwari.

⁶ Ngokuti izvi ndizvo zvinoronza Mambo Mwari, Mwari: Ngokuti imwimwi mwaembera nyara dzenyu, nokutsikatsika ngetsoka dzenyu mukudakara ngendaa yokunyenya kwenyu kweshe kuri mukati mwenyu kuitira ndaa nyika yaIsuraeri,

⁷ ndizvo, ringira, ndinozotambanudza nyara yangu kurwa nemwi, ndinozomupira kumadzinza kudai ngevapambi. Ndinozomugura kubva pakati pevanhu, ndinozoita kuti mupedzwe kubva mukati mwenyika; ndinozomuparadza. Zvino munozozia kuti inini ndini Mambo Mwari.”

Chiprofeti ngendaa yaMoabhi

⁸ “Izvi ndizvo zvinoronza Mambo Mwari, Mwari: Ngokuti Moabhi neSeira vakati, ‘Ringirai mhatso yaJudha yakadai ngemadzinza amweni veshe,’

⁹ ndizvo, ringirai, ndinozobeura rutii rweMoabi kubvira mumadhorobha ari kumigano yayo, uthende hwenyika, ndiBhethijeshimothi, naBhaarimeoni, naKiriathiaimu.

¹⁰ Ndinozoipa pamwepo nevaAmoni kuvanhu vokumabvazuva, kuti vaite nhaka. Ndizvo Amoni aachazokarakadzwi pakati pemadzinza,

¹¹ neni ndinozotonga padera paMoabhi. Zvino vanozozia kuti inini ndini Mambo Mwari.”

Chiprofeti ngendaa yaEdhomu

¹² “Izvi ndizvo zvinoronza Mambo Mwari, Mwari; ‘Ngokuti Edhomu wakashanda ngokuunzidzira kuitira ndaa mhatso yaJudha, ngokudziunzidzira kwevari, wakashaisha kakurutu mukuunzidzira padera pavo,

¹³ ndizvo izvi ndizvo zvinoronza Mambo Mwari, Mwari: Ndinozotambanudza nyara yangu kurwa nevaEdhomu, ndinozouraya kubva kweiri vanhu nemhuka, ndinozoiita matongo; kubvira Themani metsa Dhedhani vanozowa ngeshoti.

¹⁴ Ndinozoisa kuunzidzira kwangu padera peEdhomu ngenyara yevanhu vangu Isuraeri; navo vanozoita muEdhomu kudai ngokunyangadzwa kwangu nokudai ngoushungu hwangu; navo vanozozia kuunzidzira kwangu, unoronza Mambo Mwari, Mwari.’ ”

Chiprofeti ngendaa yeFiristia

¹⁵ “Izvi ndizvo zvinoronza Mambo Mwari, Mwari: ‘Ngokuti vaFiristia vaangira kuita kuunzidzira, vakaunzidzira ngomwoyo unegodo, mukuparadza,

¹⁶ ndizvo izvi ndizvo zvinoronza Mambo Mwari, Mwari: Ringira ndinozotambanudza nyara yangu kurwa nevaFiristia, kuuraya vaKherethi nokuparadza eshe mahumbikumbi oruandhle.

¹⁷ Ndinozounzidzira kuunzidzira kukuru padera pavo ngokuorora kwoushungu hunotyisa. Zvino vanozozia kuti inini ndini Mambo Mwari, apo pendinozotura padera pavo kuunzidzira kwangu.’ ”