Ezek. 24 - Bhaibheri Rakachena muChindau

Hari yoKubikira IneNgura

¹ Mugore rechipfumbamwe, ngomwedzi wegumi, ngezuva regumi romwedzi, izwi raMambo Mwari rakauya kwendiri rechiti,

² “Mukororo womunhu, nyora zina rezuva iri, nyamashi uno.” Mambo weBhabhuroni wadziemesera kurwisa Jerusarema ngezuva iri.

³ Uerekete muedzaniso kunemhatso inomukira, wechiti kweiri, “Izvi ndizvo zvinoronza Mambo Mwari, Mwari: Terekai hari, itereke, udurure mvura mukati mwayowo;

⁴ isa zvigurwa mukati mwayo, zvigurwa zveshe zvakanaka, chizva nebandauko; uizadze ngemagodo akatsanangurwa.

⁵ Tora dzakatsanangurwa dzezvifuyo, uronge matanda pashi pemagodo, nasa kuabika, zvigurwa zvayo, magodo ngaabikwe mukati mwayo.”

⁶ Ndizvo izvi ndizvo zvinoronza Mambo Mwari, Mwari: “Ihehe kunedhorobha rengazi, hari inengura mukati mwayo, ngura yayo aizi kubuda kubva kweiri! Budisai kubva kweiri chigurwa ngechigurwa; usatendera kuti zviitirwe mabhigidha.

⁷ Ngokuti ngazi yerakaparadza iri mukati mwaro; rakaigadzika padera poruware; arizi kuidurura padera pamavhu, kuti aifushire ngemavhu.

⁸ Kumusira ushungu hwangu kuti huunzidzire, ndagadzika ngazi yerakaparadza padera poruware kuti isafushirika.”

⁹ Ndizvo izvi ndizvo zvinoronza Mambo Mwari, Mwari: “Ihehe kudhorobha rengazi! Ndinozoita kuti murwi ukure.

¹⁰ Unganidza murwi wehuni, basa muriro, unase kubika nyama, ita muto wakakora, ubvengedze nezvinonuhwira, magodo ngaapishwe.

¹¹ Zvino igadzike isina chiro padera pemasimbe kuti ipishe, thusi rayo ritsvuke, ritsve, kuti tsvina yayo inyunguruke mukati mwayo, kuti ngura yaro ipedzwe.

¹² Ndadzirembesa pachangu ngokushanda zvisina shwiro; ngura yaro yakabatira aibvi. Kumuriro nengura rayo!

¹³ Asi apo pendakakuchenesa mutsvina yokuemura kwenyama, auzi kusukika kubva mutsvina yako; auchazosukwizve nakamwe, metsa ndapedza ushungu hwangu padera pako.

¹⁴ Inini Mambo Mwari ndakaereketa; nguva iri kuuya, ndinozochiita. Andizorekeri, andizokunguriri, andizokunukuki. Kudai ngenjira dzako nezviito zvako, ndinozokutonga,” unoronza Mambo Mwari, Mwari.

Rufu rwoMukadzi woMuprofeti

¹⁵ Izwi raMambo Mwari rakauya kwendiri rechiti,

¹⁶ “Mukororo womunhu, ringira, ngendonga imwe ndinozodusa kubva kwouri chidakadziso chemadziso ako; asi auzotsumbi nokuti kuchema, masodzi ako aazoereri kudzaka.

¹⁷ Gomera, asi usadaidzira, usazoita chiriro chowafa. Sunga dhuku musoro mwako, upfeke magwada ako mutsoka dzako, usazofukidzira muromo wako wedera nokuti kudya chingwa chevachemi.”

¹⁸ Ndizvo ndakaereketa kunevanhu mumangwanani, nomumadeekoni mukadzi wangu wakafa. Nomumangwanani aiteera ndakaita kudai ngezvendakapangwa.

¹⁹ Zvino vanhu vakati kwendiri, “Auzotironzeri here kuti izvi zviro zvounoita zvinoronzenyi kwetiri?”

²⁰ Zvino ndakati kwevari, “Izwi raMambo Mwari rakauya kwendiri rechiti,

²¹ ‘Ereketa kunemhatso yaIsuraeri, izvi ndizvo zvinoronza Mambo Mwari, Mwari: Ringira, ndinozosvipisa ugaro hwangu hwakachena, kudzikudza kwesimba renyu, chidakadziso chemadziso enyu, nechidisiso chomweya yenyu; vakororo venyu nevanasikana venyu vemwakasiya sure vanozourawa ngeshoti.

²² Nemwi munozoita kudai ngezvendaita inini; amuzofukidzi muromo wenyu wedera, nokuti kudya chingwa chevachemi.

²³ Maduku enyu anozosungwa padera pemasoro enyu, nemagwada enyu anozopfekwa patsoka dzenyu; amuzotsumbi nokuti kuchema; asi munozoperezeka muzvishaishi zvenyu, mwechidemberana umwe kunoumweni.

²⁴ Ngokudaro Ezekieri unozoita chioniso kwomuri; munozoita kudai ndizvo zveshe zvaaita. Naapo izvi zvoitika, zvino munozozia kuti inini ndini Mambo Mwari, Mwari.’

²⁵ “Newe, mukororo womunhu, ngezuva iro rendinozodusa simba ravo kubva kwevari, kudakara kwavo nouthende hwavo, nechidakadziso chemadziso, nomwoyo yavo, vakororo vavo nevanasikana vavo,

²⁶ pazuva iro, umwe unopokonyoka, unozouya kwouri kooshuma kuti uzwe ngenzee dzako.

²⁷ Ngeiro zuva muromo wako unozobeukira kwaari uwo wakapokonyoka, newe unozoereketa, auchazonyarari. Ndizvo unozoita chioniso kwevari; navo vanozozia kuti inini ndini Mambo Mwari.”