Ezek. 23 - Bhaibheri Rakachena muChindau

Vakadzi Vairi Vakashata

¹ Izwi raMambo Mwari rakauya kwendiri rechiti,

² “Mukororo womunhu, vaiyapo vakadzi vairi, vanasikana vamai umwewo,

³ vakaita uhure muEgipite; vakaita uhure vachimuutsva hwavo; mazamo avo akabatwa batwa, vakapukutwa tsungu dzoumhandara hwavo.

⁴ Mazina avo aiya Ohora taita, naOhoribha munun'una wake. Vakaita vangu, vakabereka vakororo navanasikana. Ndaa yemazina avo, Ohora ndiye Samaria, naOhoribha ndiye Jerusarema.

⁵ Ohora wakaita uhure apo ari wangu; naye wakaemura vadikani vake, vaAsiria varwi vehondo

⁶ vaipfekeswa zvakasvipirika, vaiya vatongi nenduna dzehondo, veshe vavo vaiya majaha akanaka anoemurika, vagadhi vemahachi.

⁷ Wakaita uhure hwake padera pavo, veshe vavo vamuna vakatsanangurwa veAsiria; naye wakadzisvipisa ngemiedzaniso yeshe yewakaemura.

⁸ Aazi kurekera uhure hwake hwaakaita kubvira Egipite; ngokuti muutsva hwake vamuna vakaata naye, vakapukuta tsungu dzoumhandara hwake, navo vakadururira kuemura kwavo padera pake.

⁹ Ndizvo ndakamupira munyara dzevadikani vake, munyara dzevaAsiria, avo vaakaemura.

¹⁰ Ava vakafukura utitinini hwake: vakatora vakororo vake nevanasikana vake, vakamuuraya ngeshoti. Kutonga kwakatongwa padera pake, naye wakaita chishekedzo pakati pemadzimai.

¹¹ “Munun'una wake Ohoribha aona ichi, asi iye waiya akashata kupinda kwake mukuemura, nomuuhure hwake, kwaiya kwakashata kupinda kwataita wake.

¹² Iye wakaemura vaAsiria vatongi, nduna nevarwi vehondo, vaipfeka zvehondo, vagadhi vemahachi, veshe majaha akanaka anoemurika.

¹³ Neni ndakaona kuti iye waiya asvipiswa, veshe vevairi vakatora njira imweyo.

¹⁴ Asi wakaangira kuenda mberi neuhure hwake; wakaona miemo yevamuna yakanangurwa parukumbati, miedzaniso yevaKharadhea yakanyorwa mukutsvuka,

¹⁵ vanemabhande muzviunu zvavo, vanemaduku akanaka anemiara akasungwa mumasoro avo, veshe avo vairingirika vakadai ngevatongi vanechiemo chevamuna veBhabhuroni reKharadhea, nyika yokubarwa kwavo.

¹⁶ Ngokukasira apo avaona ngemadziso ake, wakavaemura, naye wakatuma nhumwa kwevari muKharadhea.

¹⁷ NevaBhabhuroni vakauya kwaari mumubhedhi worudo, navo vakamusvipisa ngokuemura kwavo; apedza kudzisvipisa pachake ndivo, wakapetuka kubva kwevari mukurambana.

¹⁸ Naapo aangira uhure hwake pamhene, wakaonisa utitinini hwake, ndapetuka kwaari kumuramba, kudai ngezvendakapetuka kuramba taita ake.

¹⁹ Asi wakaangira kuwanzisa uhure hwake, echikarakadza ngemazuva outsva hwake, paakaita uhure navo munyika yeEgipite.

²⁰ Wakaemurapo vadikani vake, avo vaneumwamuna hwakareba kudai ngehwembongoro, awo anobudisa uhwamuna hwawo hwakadai ngouhwamuna hwemahachi.

²¹ Ngokudaro iwewe waidisisa kuemura kwenyama kwoutsva hwako, apo vaEgipite vaiphuzura tsungu dzemazamo outsva hwako.

Munun'una Unotongwa naMwari

²² “Ndizvo, O Ohoribha, izvi ndizvo zvinoronza Mambo Mwari, Mwari: Ringira, ndinozomusa vadikani vako kuti varwe newe, avo vewakapetukira kurambwa ngomweya wako, neni ndinozovaunza kuti varwe newe vechibva kumarutii eshe:

²³ vaBhabhuroni, nevaKharadhea veshe, vaPhekodhi, vaShoa, nevaKoa, nevaAsiria veshe pamwepo, majaha akanaka anoemurika, vatongi nenduna, veshe pamwepo, vakuru nevarwi ngwazi, vanogadha mahachi.

²⁴ Vanozouya kurwa newe, vanendonga dzokurwa, ngoro dzehondo, nengoro dzokutwara zviro nehondo yevanhu; vanozodziemesa kurwa newe, kubva kumarutii eshe vanezvokuvhika ndizvo, zvihlangu, nezviquoko, neni ndinozoemesa kutonga kwevari, navo vanozokutonga kudai ngezvitongero zvavo.

²⁵ Ndinozoemesa ushungu hwangu kurwa newe, kuitira kuti vakuitire muushungu. Vanozodusa miro yako nenzee dzako, nevanosara vako vanozowa ngeshoti. Vanozotora vakororo vako nevanasikana vako, nevanosara vako vanozopedzwa ngomuriro.

²⁶ Vanozokhumura zvokusimira zvako, vanozotora zvinemeso zvako zvakanakisa.

²⁷ Ndizvo ndinozoita kuti kuemura kwako kwenyama kupere kwouri, nouhure hwako hwakabva munyika yeEgipite; auchazoringiri kwevari ngemadziso ako nokuvaemura, nokuti kukarakadzazve Egipite.”

²⁸ Ngokuti izvi ndizvo zvinoronza Mambo Mwari, Mwari: “Ringira, ndinozokupira munyara dzaavo vounozonda, munyara dzaavo vakarambwa ngomweya wako;

²⁹ navo vanozoita kwouri mukuzonda, vanozotora yeshe michero yokushanda kwako, vanozokusiya uri mutitinini nomupunu, noutitinini hwouhure hwako hunozobudiswa, pamhene. Kuemura kwako kwenyama nouhure hwako

³⁰ zvaunza izvi padera pako, ngokuti iwewe wakaita uhure nemadzinza evanhu, ukadzisvipisa pachako ngemiedzaniso yavo yokudira.

³¹ Wahamba munjira yataita ako; ndizvo ndinozopa tsani yake munyara yako.”

³² Izvi ndizvo zvinoronza Mambo Mwari, Mwari: “Iwewe unozomwa tsani yataita ako yakadzama nokupamhama; newe unozoshekwa nokudadirwa; inezvakawanda.

³³ Unozozadzwa ngokuradziswa nemadambudziko. Tsani yokushamiswa neyokuparadzwa itsani yataita ako Samaria;

³⁴ unozoimwa nokuisvisvina, unozoinyedura mushuna wayo, nokubvita mazamo ako; ngokuti inini ndazviereketa,” unoronza Mambo Mwari, Mwari.

³⁵ Ndizvo izvi zvinoronza Mambo Mwari, Mwari: “Ngokuti iwewe wandiriyarwa ukandirasha sure kwomushana wako, ndizvo twara kushata kwokuemura kwako kwenyama nouhure hwako.”

Mwari Unotonga Veshe Taita noMunun'una

³⁶ Mambo Mwari wakati kwendiri: “Mukororo womunhu, unozotonga here Ohora naOhoribha? Zvino varonzere zvinyangadzo zvezviito zvavo.

³⁷ Ngokuti vakaita uhure, nengazi iri munyara dzavo, vakahura nemiedzaniso yavo, vakaita kuti vakororo vavo, avo vevakandiberekera, vapotye mumuriro kuti vaite mudiro wezvokudya.

³⁸ Zve, ichi ndicho chevakaita kwendiri: vasvipisa ugaro hwangu hwakachena ngezuva rimwero nokusvipisa maSabatha angu.

³⁹ Ngokuti apo vaiya vauraira miedzaniso yavo yokudira vana vavo, ngezuva rimwero vakauya muugaro hwangu hwakachena kuhusvipisa. Ringira, izvi ndizvo zvevakaita mukati mwemhatso yangu.

⁴⁰ “Vakatumawo nhumwa koodaidza vanhu kuti vabve kuretu, kwevari nhumwa yakatumirwa; ringira, vakauya. Ngendaa yavo iwewe wakadzishamba, ukaisa muara pamadziso ako, ukadzinemesa ngokwako ngezvinemeso.

⁴¹ Wakadzigadzika pamubhedhi wakanaka, unehwarasanza yakachingwa pamberi pawo, padera payo wakagadzika mutombo wangu unegwema rakanaka nemafuta angu.

⁴² Nebope rembungano reavo vaidakara rakamutendenedza, nemadzongoni mazhinji akaunzwa kubva mushango, avo vakaisa mabhengera mumioko yevakadzi, nemadzungudza anoringirika zvakanaka padera pamasoro avo.

⁴³ Zvino ndakati, ‘A wapera ngokuhura,’ asi vanoangira kuhura kwavo naye.

⁴⁴ Ngokuti vapotera kwaari, kudai ngeumwe unopotera munehure. Ndizvo vakapotera munaOhora nomunaOhoribha, kuvakadzi vanoemura zvenyama.

⁴⁵ Asi vamuna vakarurama vanozovatonga kudai ngokutongwa kwevakadzi vanohura nokuparadza ngazi; ngokuti vari mahure nengazi iri munyara dzavo.

⁴⁶ “Ngokuti izvi ndizvo zvinoronza Mambo Mwari, Mwari: Unza chikwata padera pavo kurwa navo, vaite kuti vatyiswe nokuchakatwa.

⁴⁷ Chikwata chinozovaponda ngemapuwe, ngeshoti dzavo vanozovatemera pashi; vanozouraya vakororo vavo nevanasikana vavo, nokupisha mhatso dzavo ngomuriro.

⁴⁸ Ngokudaro ndinozopedza kuemura kwenyama munyika, kuitira kuti vakadzi veshe vadzidziswe, kuti vasazoteera kuemura kwenyu kwenyama kudai ndimwi.

⁴⁹ Vanozomuunzidzira ngendaa yokuemura kwenyu kwenyama, nemwi munozotwara kuororwa kwezvishaishi zvemiedzaniso yenyu yokudira; nemwi munozozia kuti inini ndini Mambo Mwari, Mwari.”