Ezek. 22 - Bhaibheri Rakachena muChindau

Ndaa dzeJerusarema

¹ Izwi raMambo Mwari rakauya kwendiri rechiti,

² “Iwewe, mukororo womunhu, unozotonga, unozotonga here dhorobha rengazi? Rironzera zviito zvaro zveshe zvinonyangadza.

³ Unozoti, ‘Izvi ndizvo zvinoronza Mambo Mwari, Mwari: O dhorobha! Rinoparadza ngazi mukati mwaro, nguva yaro yaguma, kunasira miedzaniso yokudzisvipisa.

⁴ Iwewe waita ndaa yengazi iyo yewaparadza, nokudzisvipisa ngemiedzaniso yako yewaita; waita kuti zuva rako rikwedzere pasinde, nguva yakaemeswa yemakore ako yaguma. Ndizvo ndakuita chitsverudzo pamberi pemadzinza, nokuita chishekedzo kunyika dzeshe.

⁵ Avo vari pasinde kwouri, nevari kuretu kubva kwouri, vanozokusheka, iwewe unezina rasvipiswa kuzara ngoudzongoni.

⁶ Ringira, vatongi vaIsuraeri vari mweuri, weshe kudai ngesimba rake, waiya akakotama kuparadza ngazi.

⁷ Baba namai vanoitwa chishekedzo mukati mwako; vapara vanogara mukati mwako vakaangiridzwa; nherera neshirikadzi vanoshaishirwa mukati mwako.

⁸ Iwewe washoora zviro zvangu zvakachena nokusvipisa maSabata angu.

⁹ Mukati mwako varimwo vanegunyengu kuti vaparadze ngazi, avo mukati mwako varipo vanodya padera pemitunhu, avo vanoita kuemura kwenyama mukati mwako.

¹⁰ Mukati mwako vanofukura utitinini hwemadzibaba avo; mukati mwako vanoangiridza vakadzi vari kumwedzi.

¹¹ Umwe unoita zvinonyangadza nomukadzi womuakirwana wake, umweni unosvipiswa ngokuemura kwenyama muzakazi wake, umweni mukati mwako unosvipisa mukunda wake, mwanasikana wababa ake.

¹² Mukati mwako vanoashira zvitengero kuti vaparadze ngazi; iwewe unoashira zveshe kuuyirwa kuchazouya nezvinowanziswa, wakaashira kuuyirwa kusikazi kunaka kubva kumuakirwana wako, newe wandiriyarwa, unoronza Mambo Mwari, Mwari.’

¹³ “Ringira, ndachaya nyara dzangu pamwepo ngendaa yokuuyirwa kwako kwekusikagondeka kwewaita, nendaa yengazi yakaparadzwa pakati pako.

¹⁴ Kutsunga kwako kunogara kuripo here, nokuti nyara dzako dzingagwinya here, mumazuva endinozoshanda kwouri? Inini Mambo Mwari ndaereketa, neni ndinozochiita.

¹⁵ Ndinozokuparadzira pakati pemadzinza, nokukutatanisa munyika, ndinozopedza tsvina yako kubva kwouri.

¹⁶ Naapo wasvipiswa mukuona kwevemadzinza, unozozia kuti inini ndini Mambo Mwari.”

Choto chaMwari choKuchenesa

¹⁷ Izwi raMambo Mwari rakauya kwendiri rechiti,

¹⁸ “Mukororo womunhu, mhatso yaIsuraeri yaita mahundi kwendiri; veshe vavo vakadai ngethusi, thini, simbi nomuthovhi, mukati mwechoto, vaita mahundi esirivha.

¹⁹ Ndizvo izvi zvinoronza Mambo Mwari, Mwari! ‘Ngokuti imwimwi mweshe mwaita mahundi, ndizvo, ringira, ndinozomuunganidza mukati mweJerusarema.

²⁰ Kudai ngevanounganidza sirivha, thusi, simbi, muthovhi nethini, mukati mwechoto, kuti vabasire muriro padera pazvo, kuti vazvinyunguruse; ndizvo ndinozomuunganidza mukunyangadzwa kwangu nomuushungu hwangu, ndinozomuisa nokumunyungurusa.

²¹ Ndinozomuunganidza nokufuridza muriro padera penyu muushungu hwangu, nemwi munozonyunguruka mukati mwaro.

²² Kudai ngesirivha inonyunguruka mukati mwechoto, ngokudaro imwimwi munozonyunguruswa mukati mwacho; nemwi munozozia kuti inini Mambo Mwari ndadurura ushungu hwangu padera penyu.’ ”

Zvishaishi zveVatungamiriri vaIsuraeri

²³ Izwi raMambo Mwari rakauya kwendiri rechiti,

²⁴ “Mukororo womunhu, ronza kweiri, ‘Uri nyika isikazi kusukika, isikazi kunaiwa padera ngezuva roushungu.’

²⁵ Vaprofeti varo mukati mwaro vakadai ngemhondoro inokwanga yechibvajura chokudya; vakapedza vanhu, vakatora upfumi nezvinomutengo mukuru; vakaita kuti shirikadzi dziwande mukati mwaro.

²⁶ Vapristi varo vakagura mutemo wangu, vakasvipisa zviro zvangu zvakachena; avazi kuparadzanisa pakati pezvakachena nezvakasvipiswa, avazi kudzidzisa muparadzaniso pakati pezvisikazi kusukika nezvakasukika. Vakatswatira madziso avo kubva kumaSabatha angu, kuti ndisvipiswe pakati pavo.

²⁷ Vatongi varo vari mukati mwaro vakadai ngemakava anobvajura zvokudya, kuparadza ngazi nokuuraya vanhu kuti vaone kuuyirwa kusikagondeki.

²⁸ Vaprofeti varo vakavasetera ngemasuko asikagwinyi, vechiona zvioniso zvisina shwiro; vanofembera manyepo kwevari vechiti, ‘Izvi ndizvo zvinoronza Mambo Mwari, Mwari,’ apo Mambo Mwari asikazi kuzviereketa.

²⁹ Vanhu venyika vakabvuka pfuma nokuita umbavha; vakatambudza varombo nevatami, vakabvukira vapara upfumi hwavo pasina ndaa.

³⁰ Neni ndakatsvaka munhu pakati pavo, kuti aakise rukumbati, nokuema paburi pamberi pangu ngendaa yenyika, kuti ndisaiparadza; asi andizi kuona naumwe.

³¹ Ndizvo ndadurura ushungu hwangu padera pavo, ndavapedza ngomuriro woushungu hwangu; ndaunzidzira padera pemasoro avo kudai ngezviito zvenjira dzavo,” unoronza Mambo Mwari, Mwari.