Ezek. 21 - Bhaibheri Rakachena muChindau

Shoti yaMambo Mwari

¹ Izwi raMambo Mwari rakauya kwendiri rechiti,

² “Mukororo womunhu, emesa hope yako kuringira Jerusarema, uchumaire mazwi ako kunendau dzakachena, uprofete kuitira ndaa nyika yaIsuraeri,

³ uronze kunyika yaIsuraeri, ‘Izvi ndizvo zvinoronza Mambo Mwari: Ringira, ndinouya koorwa newe, ndinozoshwamura shoti yangu kubva mumakara ayo, neni ndinozouraya kubva kweuri vakarurama nevakashata.

⁴ Ngokuti ndinozouraya kubva kweuri vakarurama nevakashata, ndizvo shoti yangu inozobuda mumakara ayo, kurwa nenyama yeshe kubvira kubani metsa dera;

⁵ nenyama yeshe inozozia kuti inini Mambo Mwari ndashwamura shoti yangu kubva mumakara ayo, aichazohwirinzwizve.’

⁶ “Ndizvo gomera, iwewe mukororo womunhu, gomera ngokuguka kwemwoyo nokuzangandwa ngokutambudzika pamberi pemadziso avo.

⁷ Naapo vechiti kwouri, ‘Ngenyi wechigomera?’ Unozoti, ‘Ngendaa yemashoko aguma. Mwoyo weshe unozonyunguruka, nyara dzeshe dzinozopera simba, mweya weshe unozodemera, nemabvi eshe anozorembedzeka kudai ngemvura.’ Ringirai, zvinoguma, zvinozoitika,” unoronza Mambo Mwari, Mwari.

⁸ Neizwi raMambo Mwari rakauya kwendiri rechiti,

⁹ “Mukororo womunhu, profeta wechiti, ‘Izvi ndizvo zvinoronza Mambo Mwari, Mwari; uti: Shoti, shoti yarodzerwa, yangwizirwa.

¹⁰ Yarodzerwa kuti iuraye kakurutu, yangwizirwa kuti ipenye kudai ngemheni! Ndizvo tingadakara ngenjiranyi? Washoora ndonga nokupangwa kweshe.

¹¹ Shoti yapirwa kuti ingwizirwe, kuti ibatwe munyara; yarodzerwa, shoti yangwizirwa, kuti ipuwe munyara yomuurayi.

¹² Chema, uboorere, O mukororo womunhu, ngokuti inorwa nevanhu vangu, inorwa nevatongi veshe vaIsuraeri, vanokandirwa pamwepo kushoti nevanhu vangu. A! Chaya chizva!

¹³ Ngegwinyiso kuedzwa kunouya. Ngenyi iwewe washoora ndonga? Aizobudiriri, unoronza Mambo Mwari, Mwari.’

¹⁴ “Ndizvo iwewe, mukororo womunhu, profeta, uchaye nyara dzako pamwepo. Shoti ngaiwe kairi, katatu, ishoti yokuuraya; shoti yokuuraya kukuru, yakavatendenedza.

¹⁵ Ndizvo mwoyo inonyunguruka nevazhinji vanopumhunwa. Pamisiwo yavo yeshe ndaemesa ndau yeshoti. A! Yakaitirwa kupenya kudai ngemheni, yakangwizirwa kuti iuraye.

¹⁶ Rwisa ngokumudyo! Batika ngokumuoshwe! Kweshe kunoenda shoti yako.

¹⁷ Ininiwo ndinozochaya pamwepo nyara dzangu, ndinozogutisa ushungu hwangu; inini Mambo Mwari ndaereketa.”

Shoti yaMambo weBhabhuroni

¹⁸ Izwi raMambo Mwari rakauya kwendiri rechiti,

¹⁹ “Mukororo womunhu, tora mapato mairi eingauya ndiyo shoti yamambo weBhabhuroni; eshe mairi anozobuda kubva kunyika imweyo. Newe uise chioniso, peinoita mhararano yokupinda mudhorobha.

²⁰ Tara pato reshoti kuti igume Rabha revaAmoni, nokuti Judha nomuJerusarema rakashosherwa.

²¹ Ngokuti mambo weBhabhuroni unoema ngepamhararano yepato, ngepakati pemupato mairi, kuti ashandise mabhigidha; unozungunyisa misee, unobvunza kumiedzaniso, unoringisisa muchiropa.

²² Munyara yake yokumudyo munebhighidha reJerusarema, apo paanoemesa zvokuputsisa, kubeura muromo kudaidzira mukuuraya, kumirudza izwi kudaidzira, kuemesa miti yokuputsa marukumbati pamisiwo, kuaka marukumbati, nokuaka thawa.

²³ Asi kwevari zvinooneka zvakadai ngokuringidza kusina shwiro mukuona kwavo; kwavari avo vapika mhiko dzakagwinya; asi unozounza kushata kwavo mumukarakadzo, kuunza pasinde kubatwa kwavo.

²⁴ “Ndizvo izvi ndizvo zvinoronza Mambo Mwari, Mwari: Ngokuti mwakaunza kushata kwenyu mukukarakadzwa, ngenjira iyi zvipauko zvenyu zvaoneka, kuitira kuti zviito zvenyu zveshe nezvishaishi zvioneke; ngokuti mwauya mukukarakadzwa nemwi munozobatwa ngenyara.

²⁵ Asi iwewe O wakashata mambo waIsuraeri uwo zuva rako raguma, nguva yokuororwa kwokupedzisira,

²⁶ izvi ndizvo zvinoronza Mambo Mwari, Mwari echiti, ‘Dusa ngututu, bvisa dzungudza, uriise pashi. Zviro azvizogari zvakaita zvezvakaita. Kwidza icho chakadzaka pashi, udzase icho chakakwirira.

²⁷ Matongo, matongo, matongo ndinozozviita! Zvakadaro azvizikumboitika! Metsa agume uwo unozvisisira; neni ndinozozvipa kwaari.’

Shoti neVaAmoni

²⁸ “Asi iwewe, mukororo womunhu, profeta wechiti, ‘Izvi ndizvo zvinoronza Mambo Mwari, Mwari ngendaa yevaAmoni, nendaa yokutuka kwavo, ronza iwewe, uti: Shoti, shoti, yakashwamurwa kuuraya, yangwizwa kuti ipedze, ipenye kudai ngemheni.

²⁹ Kuonisa zvioniso zvokunyepa, vechiita mabhigidha emanyepo kweuri vanokuisa pamitsipa yevakashata, vakashata avo zuva ravo raguma, nguva yokuororwa kwokupedzisira.

³⁰ Ihwirinze mumakara ayo. Mundau yowakasikirwa, munyika yokubarwa kwako ndinozokutonga.

³¹ Ndinozodurura padera pako ushungu hwangu nomuriro woushungu hwangu ndinozofuridzira padera pako. Ndinozokuisa munyara dzevanhu vakashata, ngwazi dzokuuraya.

³² Iwewe unozoitwa huni dzomuriro; ngazi yako inozopinda mukati mwemavhu; iwewe auchazokarakadzwi nakamwe, ngokuti inini Mambo Mwari ndaereketa.’ ”