Ezek. 20 - Bhaibheri Rakachena muChindau

Kuda kwaMwari noKumukira kwoMunhu

¹ Mugore rechinomwe mumwedzi wechishanu, ngezuva regumi remwedzi, vakuru vamweni vaIsuraeri vakauya koobvunza Mambo Mwari, vakagara pamberi pangu.

² Neizwi raMambo Mwari rakauya kwendiri rechiti,

³ “Mukororo womunhu, ereketa kuvakuru veIsuraeri, wechiti kwevari, ‘Izvi ndizvo zvinoronza Mambo Mwari, Mwari: Ngenyi mwauya? Koobvunza here? Kudai ngezvendinopona, unoronza Mambo Mwari, Mwari, andizobvunzwi ndimwi.’

⁴ “Unozovatonga here, mukororo womunhu? Unozovatonga here? Zvino ita kuti vazie zvinyangadzo zvemadzibaba avo,

⁵ newe uti kwevari, ‘Izvi ndizvo zvinoronza Mambo Mwari, Mwari: Pazuva apo pendakatsanangura Isuraeri, ndakapika mhiko kumibarirwana yorudzi rwemhatso yaJakobe, ndikadziita kuti ndiziikanwe kwevari vari munyika yeEgipite,’ ndakapika mhiko kwevari ndechiti, ‘Inini ndini Mambo Mwari, Mwari wenyu.’

⁶ Pazuva iro ndakapika kwevari kuti ndinozovabudisa kubva munyika yeEgipite, kuti vapotere munyika yendakavatsvakira, nyika inoerera mukaka nouchi, nyika iri uthende hwenyika dzeshe.

⁷ Neni ndakati kwevari, ‘Rashai munhu weshe kubva kwaari zvinyangadzo zvinodakadzisa madziso ake, musadzisvipisa pachenyu ngemiedzaniso yokudira yeEgipite; inini ndini Mambo Mwari, Mwari wenyu.’

⁸ Asi vakamukira kurwa neni, nokusikapurutana kwendiri; haiwa naumwe wavo wakarasha zvinyangadzo zvinodakadza madziso ake, nokuti kurekera miedzaniso yokudira yeEgipite. Zvino ndakapinimidza kuti ndaizodurura ushungu hwangu padera pavo, kuti ndipedze ushungu hwangu kwevari mukati mwenyika yeEgipite.

⁹ Asi ndakaita izvi ngendaa yezina rangu, kuti risasvipiswa mukuona kwemadzinza pakati peavo vevaigara navo, mukuona kwavo ndakadziita kuti ndiziikanwe kwevari mukuvabudisa kubva munyika yeEgipite.

¹⁰ “Ndizvo ndakavaita kuti vabude kubva munyika yeEgipite, ndikavaunza mukati mweshango.

¹¹ Ndakavapa zviemeso zvangu, ndikavaonisa zvitongero zvangu, ndizvo kudai munhu echizviita, unozopona ndizvo.

¹² Zve, ndakavapa maSabatha angu, kuti aite chioniso pakati pangu navo, kuti vazie kuti inini ndini Mambo Mwari unovachenesa.

¹³ Asi mhatso yaIsuraeri yakamukira kurwa neni mushango; avazi kuhamba muzviemeso zvangu, asi vakaramba zvitongero zvangu, izvi kudai munhu echizviita, unozopona ndizvo; nemaSabatha angu vakaasvipisa kakurutu. Zvino ndakapinimidza kuti ndaizodurura ushungu hwangu padera pavo mushango, kuti ndivapedze.

¹⁴ Asi ndakaita izvi ngendaa yezina rangu, kuti risasvipiswa mukuona kwemadzinza, mukuona kwavo ndakavabudisa.

¹⁵ Zve, ndakapika kwevari mushango, kuti andizovagumisi munyika yendakavapa, inoerera mukaka nouchi, iyo iri uthende hwenyika dzeshe,

¹⁶ ngokuti vakaramba zvitongero zvangu, vasikazi kuhamba ngezviemeso zvangu, vakasvipisa maSabatha angu; ngokuti mwoyo yavo yakateera miedzaniso yavo yokudira.

¹⁷ “Zvakanyadaro madziso angu akavakungurira neni andizi kuvaparadza nokuti kuvapedza yaamho mushango.

¹⁸ Ndakati kunevana vavo mushango, ‘Musateera muzviemeso zvevabereki venyu, nokuti kungwarira zvitongero zvavo, nokuti kudzisvipisa pachenyu ngemiedzaniso yavo yokudira.

¹⁹ Inini Mambo Mwari, ndini Mwari wenyu; teerai muzviemeso zvangu, munase kungwarira zvitongero zvangu, muzviite,

²⁰ muchenese maSabatha angu, kuti aite chioniso pakati pangu nemwi, kuti muzie kuti inini ndini Mambo Mwari, Mwari wenyu.’

²¹ Asi vana vakamukira kurwa neni; avazi kuteera muzviemeso zvangu, navo avazi kunasa kungwarira zvitongero zvangu, kudai munhu echizviita, unozopona ndizvo; vakasvipisa maSabatha angu. Zvino ndakapinimidza kuti ndaizodurura ushungu hwangu padera pavo, kurwa navo kuti ndipedze ushungu hwangu kwevari mushango.

²² Asi ndakapfinyisa nyara yangu, ndikaita ngendaa yezina rangu, kuti risasvipiswa mukuona kwemadzinza, avo mukuona kwavo ndakavabudisa.

²³ Zve, ndakapika mhiko kwevari mushango, kuti ndinozovaparadzira pakati pemadzinza, ndivatatanise mukati mwenyika dzeshe,

²⁴ ngokuti avazi kuita zvitongero zvangu, asi vakaramba zviemeso zvangu nokusvipisa maSabatha angu, nemadziso avo airingira kumiedzaniso yokudira yemadzibaba avo.

²⁵ Ndizvo ndakavapa zviemeso zvaiya zvisikazi kunaka nezvitongero zvevasaikona kupona ndizvo.

²⁶ Ndakavasvipisa kubudikidza ngezvipo zvavo zvemene, mukupira mudiro womuriro avo veshe vari matangwe avo, kuitira kuti ndivazadze ngokutyiswa, kuti vazie kuti inini ndini Mambo Mwari.

²⁷ “Ndizvo, mukororo womunhu, ereketa kunevemhatso yaIsuraeri wechiti kwevari, ‘Izvi ndizvo zvinoronza Mambo Mwari, Mwari: Muizvizve madzibaba enyu akandituka, vakaita ngourimbwi kwendiri.’

²⁸ Ngokuti apo ndaiya ndavaunza munyika, yendakapika kuti ndiipe kwevari, zvino kunyazwi ngepari pevakaona zvimitunhu zvakakwirira nemimbiti yeshe yakatsikana mashakani, vakapira mibairo yavopo, vakapira midiro yavo yokundinyangadza; naapozve vakapisha mitombo yavo inegwema rakanaka, vakadururapo midiro yavo yokumwa.

²⁹ Ndakati kwevari, ‘Munoronzenyi ngeiyo ndau yakawirira kwomunoenda imwimwi?’ Ndizvo zina reiyo ndau inozodaidzwa kuti, ‘Bhama,’ metsa nanyamashi.

³⁰ Ndizvo ronza kumhatso yaIsuraeri kuti, ‘Izvi ndizvo zvinoronza Mambo Mwari, Mwari: Munozodzisvipisa kudai ngemiitiro yemadzibaba enyu here? Nokupauka kuteera zviro zvavo zvinonyangadza here?

³¹ Naapo mwoopira zvipo zvenyu, nokuita kuti vana venyu vapotye mumuriro, munodzisvipisa pachenyu ngemiedzaniso yenyu yeshe metsa nanyamashi. Neni ndingazobvunzwa ndimwi here, O mhatso yaIsuraeri? Kudai ngezvendinopona, unoronza Mambo Mwari, Mwari, inini andizobvunzwi ndimwi.’

³² Izvo zviri mumipinimidzo yenyu azvizoitiki akadi, mupinimidzo, munoti, ‘Ngatidai ngemadzinza, kudai ngemadzinza enyika, kudira matanda nemapuwe.’ ”

Mwari Unoorora noKukungurira

³³ “Kudai ngezvendinopona, unoronza Mambo Mwari, Mwari, ngegwinyiso ngenyara inesimba, nomuoko wakatambanudzwa, noushungu hwakadururwa, ndinozoita mambo padera penyu.

³⁴ Ndinozomubudisa kubva kumadzinza, nokumuunganidza kubva kunyika dzeshe kwemwakaparadzirwa, ngenyara inesimba, nomuoko wakatambanudzwa, noushungu hwakadururwa;

³⁵ neni ndinozomuunza mushango revanhu, naapo ndinozomutonga hope kuhope.

³⁶ Kudai ngezvendakatonga madzibaba enyu mushango renyika yeEgipite, ndizvo ndinozomutonga, unoronza Mambo Mwari.

³⁷ Ndinozomuita kuti mupinde ngepashi pendonga, nokuzomuunza muchisungo chechitenderano.

³⁸ Ndinozoparadzanisa kubva pakati penyu vamukiri, naavo vanondishaishira; ndinozovabudisa kubva munyika yevanogara kudai ngevanhu, vapara asi avazopindi munyika yaIsuraeri. Zvino muchazia kuti inini ndini Mambo Mwari.

³⁹ “Asi imwimwi, O mhatso yaIsuraeri, izvi ndizvo zvinoronza Mambo Mwari, Mwari: Endai, mudire miedzaniso yenyu yokudira, zvinopano umwe ngaumwe wenyu, zvinopano nesure kweizvo, kudai musikazondipurutani; asi zina rangu rakachena amuchazorisvipisi ngezvipo zvenyu nemiedzaniso yenyu yokudira.

⁴⁰ Ngokuti pamutunhu wangu wakachena, mutunhu wakareba waIsuraeri, unoronza Mambo Mwari, Mwari, apo veshe vemhatso yaIsuraeri veshe avo vanozodira inini munyika; apo ndinozovaashira, naapo ndipo pendinozoda michero yenyu nezvipo zvenyu zvakapinda kunaka nezvakachena.

⁴¹ Kudai ngegwema rakanaka ndinozomuashira, pendinozomubudisa kubva pakati pemadzinza, nokumuunganidza kubva kunyika dzemwakaparadzirwa; ndinozoonisa kucheneswa kwangu pakati penyu mukuona kwemadzinza.

⁴² Munozozia kuti inini ndini Mambo Mwari, apo pendinomuunza mukati mwenyika yaIsuraeri, munyika yendakapika mhiko kuipa kumadzibaba enyu.

⁴³ Naapo munozokarakadza njira dzenyu, nezviito zveshe zvemwadzisvipisa ndizvo pachenyu; munozodzinyenya pachenyu ngendaa yokushata kwenyu kweshe kwemwakaita.

⁴⁴ Nemwi munozozia kuti inini ndini Mambo Mwari, apo pendinoita nemwi ngendaa yezina rangu, haiwa kudai ngokushata kwenjira dzenyu, nokuti kudai ngokushata kwezviito zvenyu, O mhatso yaIsuraeri, unoronza Mambo Mwari, Mwari.”

Muriro Uri ngoKubani

⁴⁵ Izwi raMambo Mwari rakauya kwendiri rechiti,

⁴⁶ “Mukororo womunhu, emesa hope yako kuringira kubani, chumaira mazwi ako kubaniyo, uprofete kuitira ndaa nyika yegwasha yokubani;

⁴⁷ wechiti kugwasha rokubani, ‘Izwa izwi raMambo Mwari: Izvi ndizvo zvinoronza Mambo Mwari, Mwari: Ndinozobasa muriro mwouri, nawo unozopedza miti yeshe yakasvipirika mukati mwako, nemiti yeshe yakaoma; mirazvu inobaka aizodzimwi, nehope dzeshe kubvira kubani metsa dera dzinozopishwamwo ndiwo.

⁴⁸ Nenyama yeshe inozoona kuti inini Mambo Mwari ndini ndaubasa; auzodzimwi.’ ”

⁴⁹ Naapo ndakati, “A Mambo Mwari, Mwari! Vanoereketa ndini, kuti, ‘Aasiri muereketi wemiedzaniso here?’ ”