Ezek. 18 - Bhaibheri Rakachena muChindau

Mushando woMunhu Umwe ngaUmwe

¹ Izwi raMambo Mwari rakauya kwendiri rechiti,

² “Munoronzenyi imwimwi mwechiereketa chinai ichi ngendaa yenyika yaIsuraeri mwechiti, ‘Vabereki vadya mavhini anozhazha, nemazino evana aita hwadzira?’

³ Kudai ngezvendinopona, unoronza Mambo Mwari, Mwari, chinai ichi achichazoereketwi ndimwi muIsuraeri.

⁴ Ringira, mweya yeshe ngeyangu; mweya womubereki ngewangu, nomweya wemwana ngewangu; mweya uwo wega unoshaisha unozofa.

⁵ “Kudai munhu akarurama, echiita zvinotenderwa ngomutemo nokururama,

⁶ kudai asikadyi padera pemitunhu, nokuti kumirudza madziso ake kuringira miedzaniso yokudira yemhatso yaIsuraeri, nokuti kusvipisa mukadzi womuakirwana wake, nokuti kukwedzera kumukadzi ari kumwedzi,

⁷ usikaangiridzi munhu, asi unohwirinza chibatiso kunounokwereta, usikabiri, unopa kudya kwake kunevanenzara, nokufukidza vari mititinini ngechokufuka,

⁸ usikakweretesi kuti auyirwe, nokuti kuashira kuuyirwa kunowanziswa, unopfinyisa nyara yake kubva kunezvakashata, unotonga ngokururamisa pakati pomunhu nomunhu umweni,

⁹ unoteera muzviemeso zvangu nokunasa kungwarira zvitongero zvangu, unoita ngokugondeka, uwo wakadaro wakarurama, ngegwinyiso unozorarama,” unoronza Mambo Mwari, Mwari.

¹⁰ “Kudai anemukororo uri dzongoni nomuparadzi wengazi, unoita zvakadai ngechimwe cheizvi zviro,

¹¹ (kunyazwi aaiti nachimwe chazvo) unodya padera pemitunhu, unosvipisa mukadzi womuakirwana wake,

¹² unotambudza varombo nevatami, unoita mbavha, aapetudzira chibatiso, unomirudza madziso ake kuringira kunemiedzaniso yokudira, unoita zvinonyangadza,

¹³ unokweretesa kuti auyirwe ngezvakawanda, unozopona here? Aazoponi. Waita zviro izvi zveshe zvinonyangadza; ngegwinyiso unozofa; ngazi yake inozogara padera pake.

¹⁴ “Asi kudai munhu uyu anemukororo uwo unoona zvishaishi zveshe zvaitwa ndibaba ake, unozvipinimidza naye aaiti zvakadaro,

¹⁵ uwo usikadyi padera pemitunhu, nokuti kumirudza madziso ake kuringira kunemiedzaniso yokudira yemhatso yaIsuraeri, usikasvipisi mukadzi womuakirwana wake,

¹⁶ usikashaishiri munhu, usikatori chibatiso, usikabiri, asi unopa kudya kwake kunevanenzara, nokufukidza vari mutitinini ngechokufuka,

¹⁷ unopfinyisa nyara yake kubva kunezvakashata, usikakweretesi kuti auyirwe ngezvakawanda, unongwarira zvitongero zvangu, nokuteera muzviemeso zvangu, iye aazofi ngendaa yokushata kwababa ake, ngegwinyiso unozorarama.

¹⁸ Ngendaa yababa ake, ngokuti wakachengedzera, akabira hama yake, akaita izvi zvisikazi kunaka pakati pevanhu vake, ringirai, unofa ngokushaisha kwake.

¹⁹ “Asi munoti, ‘Ngenyi mukororo asikaororwi ngokushaisha kwababa?’ Apo mukororo aita zvinotenderwa nokururama, wanasa kungwarira zviemeso zvangu zveshe nokuzviita, ngegwinyiso unozorarama.

²⁰ Mweya uwo unoshaisha unozofa. Mwana aazotwari kushaisha kwomubereki, mubereki aazotwari kushaisha kwemwana; kururama kwewakarurama kunozoita kwake, nokushata kwewakashata kunozoita kwake.

²¹ “Asi kudai wakashata echizotenderuka kubva kunezvishaishi zvake zveshe zvaakaita, nokungwarira zviemeso zvangu zveshe, nokuita izvo zvinotenderwa nezvakarurama, ngegwinyiso unozorarama, aazofi akadi.

²² Apana nachimwe chezvishaishi zvaakaita, chinozokarakadzwa kumuitira ndaa; ngendaa yezvakarurama zvaakaita unozorarama.

²³ Ndine kudakara here mukufa kwouwo wakashata, ” unoronza Mambo Mwari, Mwari: “Haiwa kuti atenderuke kubva munjira dzake, apone?

²⁴ Asi apo wakarurama echitenderuka kubva mukururama kwake nokuita zvakashata, nokuita zvakatodzana zvinonyangadza zviro, zvinoitwa ngomunhu wakashata, ungazopona here? Apana nachimwe chezviito zvakanaka zvaakaita zvichakarakadzwa; ngendaa yokupauka kwake kwaakapauka nokushaisha kwake kwaakashaisha, unozofa.

²⁵ “Asi imwimwi munoti, ‘Njira yaMambo Mwari aizi kururama.’ Izwai zvino, O mhatso yaIsuraeri: Njira yangu aizi kururama here? Adzisiri njira dzenyu dzisikazi kururama here?

²⁶ Naapo wakarurama echikunukuka kubva mukururama kwake, echiita kushata, unozofa ndikwo; ngendaa yokushata kwaaita unozofa.

²⁷ Zve, apo wakashata echizotenderuka kubva mukushata kwake kwaakaita, nokuita izvo zvinotenderwa ngomutemo nezvakarurama, unozoponesa mweya wake.

²⁸ Ngokuti wakakarakadza akakunukuka kubva mukupauka kwake kweshe kwaakaita, ngegwinyiso unozorarama, aazofi.

²⁹ Asi mhatso yaIsuraeri inoti, ‘Njira yaMambo Mwari aizi kururama.’ O mhatso yaIsuraeri, njira dzangu adzizi kururama here? Adzisiri njira dzenyu dzisikazi kururama here?

³⁰ “Ndizvo ndinozokutonga, O mhatso yaIsuraeri, weshe kudai ngenjira dzake, unoronza Mambo Mwari, Mwari. Tenderuka, ukunukuke pachako kubva muzvishaishi zvako zveshe; pamweni kushata kunozoita kupedzwa kwako.

³¹ Rasha kubva kwouri kweshe kushaisha kwako, kwewakandishaishira; udziitire mwoyo mutsva nomweya mutsva. Ngenyi wechizofa, O mhatso yaIsuraeri?

³² Ngokuti andina kudakara ngorufu rweweshe,” unoronza Mambo Mwari, Mwari. “Ndizvo tenderukai mupone.”