Ezek. 17 - Bhaibheri Rakachena muChindau

Muedzaniso weGodzi noMuvhini

¹ Izwi raMambo Mwari rakauya kwendiri rechiti,

² “O Mukororo womunhu, ereketa chinai, uerekete muedzaniso kunevemhatso yaIsuraeri

³ wechiti, ‘Izvi ndizvo zvinoronza Mambo Mwari: Godzi guru rinemaphaphiro makuru, akareba, akazara ngemanhenga, rinemaara akawanda, rakaguma Rhebanoni. Rakatora padera pemusedhare,

⁴ rakagura mwoyo ngedera kwawo, rakatora kuenda nawo kunyika yokutengesera, rakauemesa mudhorobha revatengesi.

⁵ Zvino, rakatora mbeu kubva panyika, rakaisima mumunda unendimo; rakaiisa pasinde pemvura yakawanda, rakaiemesa kuti iite kudai ngomuti womusambangwena.

⁶ Yakakura, ikaita muvhini unotambarara wechiemo chiri pashi; matai awo akakotamira pashi kwaari, nzinde dzawo dzakaramba dziri pashi pawo. Ndizvo wakaita muvhini, ukamerera matai, ukabudisa mharikirwa.’

⁷ “Raiyapo godzi rimweni guru raiya nemaphaphiro makuru, anemanhenga akawanda. Ringira! Uyu muvhini wakakotamisa nzinde dzawo kweriri; wakatungira matai awo kweriri, kuti rinaise mvura pandau yokusimwa kwawo.

⁸ Wakaduswa ukasimirwa mumavhu akanaka panemvura zhinji, kuti ubudise matai, ubereke michero yakawanda, uite muvhini wakanaka.

⁹ Ronza, ‘Izvi ndizvo zvinoronza Mambo Mwari, Mwari: Unozobudirira here? Arizobviti here ngenzinde dzawo, nokugura michero yawo, kuti ifote, kuti mashakani awo eshe matsva afote? Haiwa muoko unesimba guru, nokuti vanhu vakawanda vanozodiwa kuubvita ngenzinde dzavo.

¹⁰ Naapo wasimirwa, unozobudirira here? Naapo dutu rokumabvazuva rauvhuvhuta auzofoti yaamho here, kufota uri pandima pounokurira?’ ”

Muedzaniso Unodudzirwa

¹¹ Zvino izwi raMambo Mwari rakauya kwendiri rechiti,

¹² “Ronza zvino kunemhatso inomukira wechiti, ‘Amuzii here kuti izvi zviro zvinoronzenyi?’ Varonzere: Ringira, mambo weBhabhuroni wakaguma Jerusarema, wakatora mambo waro nevatongi varo, wakavatora kupetuka navo Bhabhuroni.

¹³ Wakatora umwe wemibarirwana youmambo, akaita chitenderano naye, wakaita kuti apike mhiko; waiya atora vanesimba venyika,

¹⁴ kuti umambo hupfaiswe pashi, kuti hurekere kudzikudza ngokwawo, asi hueme ngokungwarira chitenderano icho.

¹⁵ Asi wakamumukira ngokutumira vaemereri vake kunyika yeEgipite, kuitira kuti vamupe mahachi nevanhu vehondo vakawanda. Unozobudirira here? Unozopokonyoka here, uwo unoita zviro zvakadai? Unozopokonyoka here apo echigura chitenderano?

¹⁶ “Kudai ngezvendinopona,” unoronza Mambo Mwari, Mwari, “Ngegwinyiso mundau yaanogara mambo, uwo wakamuita mambo, uwo mhiko yake yaakashoora, nechitenderano chake naye chaakagura, muBhabhuroni unozofa.

¹⁷ Faro nehondo yake inesimba, nechiunga chake chikuru achizomudetseri mukurwa, apo vechitutira mirwi yemavhu nokuaka masvingo makuru, nokuaka marukumbati kuuraya vanhu vazhinji.

¹⁸ Ngokuti wakashoora mhiko nokugura chitenderano, ngokuti wakapa nyara yake, asi wakaita izvi zviro zveshe aatongozopokonyoki.”

¹⁹ Ndizvo izvi ndizvo zvinozoronza Mambo Mwari, Mwari: “Kudai ngezvendinopona, ngegwinyiso ndinozopetudza padera pesoro rake mhiko yangu iyo yaakashoora, nechitenderano changu icho chaakagura.

²⁰ Ndinozotambanudza mambure angu padera pake, naye unozobatwa mumurau wangu; ndinozomuunza Bhabhuroni, ndinozotongana naye apo ngendaa yokushaisha kwake mukurwa neni.

²¹ Veshe vanotiza vehondo yake vanozowa ngeshoti, naavo vanozosara vanozoparadzirwa kudutu reshe; nemwi munozozia kuti ndini Mambo Mwari, wakachiereketa.”

Chigondiso chaMwari choKugonda

²² Izvi ndizvo zvinoronza Mambo Mwari, Mwari: “Inini pachangu ndinozotora mwoyo wedai romusedhare kubva padera pawo, ndinozousima. Ndinozoripazura kubva kumatai achaburukira riri dai mbishi kubva padera pawo pemene; inini pachangu ndinozousima padera pomutunhu wakareba, wakaturama.

²³ Padera pemutunhu wakareba waIsuraeri, ndinozousima, nawo unozobudisa matai, kuitira kuti ubereke michero, nokuita musedhare wakakura wakanaka. Pashi pawo panozogara shiri dzembeu dzeshe; mumabvute ematai dzinozoaka zvisaki, zvisikwa zvinemaphaphiro zvembeu dzeshe.

²⁴ Miti yeshe yomushango inozozia kuti inini ndini Mambo Mwari. Ndinofupisa pashi muti uwo wakareba, nokurebesa muti uri pashi; ndinozoomesa muti muushi wakasvipira, ndinoita kuti muti wakaoma uburukire. Inini Mambo Mwari ndachiereketa, ndichachiita.”