Ezek. 16 - Bhaibheri Rakachena muChindau

Jerusarema Risikagondeki

¹ Izwi raMambo Mwari rakauya kwendiri rechiti,

² “Mukororo womunhu, ita kuti Jerusarema rizie zvinonyangadza zvaro

³ wechiti, ‘Izvi ndizvo zvinoronza Mambo Mwari, Mwari kuneJerusarema: Kuamba kwako nokubarwa kwako kwaiya munyika yeKhenani; baba ako vaiya muAmori, namai ako vaiya muHiti.

⁴ Ngendaa yokubarwa kwako, pazuva rewakaberekwa, mukumvu wako auzi kuchekwa, auzi kuhambwa ngemvura kukuchenesa nokuti kukukutwa munyu, nokuti kuputirwa mumachira.

⁵ Akuna nedziso rakakuzwira urombo, kukuitira chimwe cheizvi zviro, kuti akuitire nyasha; asi iwewe wakarashwa kubanze murubaya, ngokuti wakanyenywa ngezuva rewakaberekwa.’

⁶ “Inini ndakapinda ngepouri, ndakakuona wechiburukuta mungazi yako. Uri mungazi yako ndakati kwouri, ‘Pona!’

⁷ Ndakaita kuti ukure kudai ngechisimwa chomumunda.Ukakura, ukareba; ukaguma kuita mukadzi wakaperera; mazamo ako akanasa kuturikwa, nebvudzi rako rakakura, asi waiya mupunu nomutitinini.

⁸ “Ndakapindazve ngepowaiya, ndikakuringira padera pako, ringira, mukuwo wako waiya mukuwo worudo. Ndakatambanudza magumo echokufuka changu padera pako, nokufukidzira upunu hwako: ndakapika kwouri, ndikapinda mukuita chitenderano newe, unoronza Mambo Mwari, Mwari, newe wakaita wangu.

⁹ “Zvino ndakakushamba ngemvura; ndakanasa kukushambidza kubva mungazi yako, ndikakudzodza ngemafuta.

¹⁰ Ndakakusimidza ngezvokusimira zvakanemeswa, ndikakupfekesa magwada ematoo akanakisa; ndakakusimidza ngemachira akanaka orukangaza, ndikakufukidza ngejira resirika.

¹¹ Ndakakunemesawo ngezvinemeso, ndikaisa mabhengera munyara dzako, neketani muhuro mwako.

¹² Ndakaisa ndandazi mumiro yako, nemativhera munzee dzako, nedzungudza rakanaka padera pesoro rako.

¹³ Waiya wakanemeswa ngomukore nesirivha; nezvokusimira zvako zvaiya zvorukangaza rwakanaka, nesirika, nemachira akanemeswa. Newe wakadya ufu hwakamotseka, nouchi, nemafuta. Waiya nounaku kakurutu, wakaita wakabudirira kuita umambokadzi.

¹⁴ Mbiri yako yakateketeswa pakati pemadzinza ngendaa younaku hwako, ngokuti hwaiya hwakaperera ngendaa youthende hwangu hwendakaisa padera pako,” unoronza Mambo Mwari, Mwari.

¹⁵ “Asi wakagonda muunaku hwako, wakaita uhure ngendaa yembiri yako, newe wakadurura uhure hwako kuneumwe ngaumwe waipinda ndipo.

¹⁶ Wakatora zvimweni zvokusimira zvako, ukadziitira ndau dzako dzakakwirira ukadzinemesa ngemiara yakaparadzana, ukaita uhure hwako padera padzo; akuzi kumboapo chiro chakadaro, nokuti zvichazodaro.

¹⁷ Wakatorazve zvinemeso zvako zvakapinda kunaka zvomukore wangu nezvesirivha yangu zvendakakupa, wakadzinasirira miedzaniso yevamuna, wakaita uhure nayo;

¹⁸ newe wakatora zvokusimira zvako zvakanemeswa kuifukidzira, ukaisa mafuta angu nemitombo yangu inegwema rakanaka pamberi payo.

¹⁹ Zve, kudya kwangu kwendakakupa, ndakakugutisa ngoufu hwakamotseka, mafuta, nouchi, iwewe wakazviisa pamberi payo kuita gwema rakanaka; ndizvo zvezvakaita,” unoronza Mambo Mwari, Mwari.

²⁰ “Wakatora vakororo vako nevanasikana vako, vewakabarira inini, naavo wakavatora kuvapira kweiri kuita mubairo kuti vapedzwe. Ingatei uhure hwako huri chiro chidoko!

²¹ Wakauraya vana vangu, nokuvapira kuti vaite mudiro wokupisha kweiri.

²² Nomukati mwezvinonyangadza zvako zveshe nezvouhure hwako auzi kukarakadza mazuva outsva hwako, apo waiya mupunu nomutitinini, wechibinyauka mungazi yako.

Kupona kweJerusarema Kwakadai ngekweHure

²³ “Ngesure kwokushata kwako kweshe (ihehe, ihehe kwouri! Unoronza Mambo Mwari, Mwari,)

²⁴ wakadziakira ndau yokuhurira, nokudziitira pachako ndau yakakwirira mundau dzokushongana dzeshe.

²⁵ Wakadziakira ndau yako yakakwirira dera kwepato reshe, ukasvipisa unaku hwako, ukafukurira mahasva ako kuneavo veshe vaipinda ndipo, nokuwandisa uhure hwako.

²⁶ Wakaita uhure nevaEgipite, kuemura kwenyama kwevaakirwana vako, ukawanzisa uhure hwako, kundimusira ushungu.

²⁷ Ringira, ndizvo ndakatambanudza nyara yangu kurwa newe, ndakatsonza zvokudya kwako kwezuva ngezuva, ndakakupira mukuda kwemagaa ako, vanasikana vevaFiristia, avo vakatsveruka ndiwe, ngendaa yenjira yako yokuemura kwenyama.

²⁸ Wakaita uhure nevaAsiria, ngokuti waiya usikagutiswi; wakaita uhure navo, asi auzi kugutiswa.

²⁹ Wakawanzisa uhure hwako nevaKharadhea, nyika yevatengesi; kunyazwi neizvi auzi kugutiswa.

³⁰ “Ngenjiranyi mwoyo wako unopera simba, unoronza Mambo Mwari, Mwari, wechiita izvi zviro zveshe, zviito zvinoitwa ngehure risikatsveruki ngouhure.

³¹ Unoaka ndau yako youhure dera kwemapato eshe, nokuita ndau dzako dzakakwirira mundau dzokushongana. Asi auzi kudai ngehure ngokuti iwewe unoshoora kuthuswa.

³² Mukadzi unoomba, uwo unoashira vapara pandau yemwamuna wake!

³³ Zvipo zvinopuwa kumahure eshe; asi iwewe wakapa zvipo zvako kunevadikani vako, nokuvabhadhara kuti vauye kwouri kubva kumarutii eshe ngendaa youhure hwako.

³⁴ Ndizvo iwewe wakasiyana nevakadzi vamweni mukuhura kwako, ngokuti akuna naumwe wakakukumbira kuti uhure; iwewe wakavabhadhara pasina chakabhadharwa kweuri; wakasiyana navo.

Kutonga kwaMwari padera peJerusarema

³⁵ “Ndizvo, O hure, izwa izwi raMambo Mwari:

³⁶ Izvi ndizvo zvinoronza Mambo Mwari, Mwari: Ngokuti kuemura kwako kwakadururwa, noutitinini hwako hwakaoneka mukuhura kwako nevadikani vako; ngendaa yezveshe zvemiedzaniso zvako zvinonyangadza, nendaa yengazi yevana vako, yowakapa kwevari,

³⁷ ndizvo, ringira, ndinozounganidza veshe vadikani vako, avo vewakadakara ndivo, veshe vewakada, naavo veshe vewakazonda; ndinozovaunganidza kurwa newe kubva kumarutii eshe, ndinozofukura utitinini hwako kwevari, kuti vaone utitinini hwako hweshe.

³⁸ Inini ndinozokutonga kudai ngokutongwa kunoitwa vakadzi vanoomba, nevanoparadza ngazi, nokuunza ngazi padera pako muushungu hwangu hukuru nomundurumwa.

³⁹ Ndinozokupira munyara dzavo, navo vanozoparadza ndau yako yokukurira, nokuputsira pashi ndau dzako dzakakwirira; vanozokhumurazve machira ako, nokudusa zvinemeso zvako zvakanaka, nokukusiya uri mupunu nomutitinini.

⁴⁰ Vanozounza mbungano kurwa newe, nokukuponda ngemapuwe, nokukutematema kuita zvigurwa ngeshoti dzavo.

⁴¹ Vanozopisha mhatso dzako ngomuriro, nokukutonga mukuona kwevakadzi vazhinji; ndinozokuita kuti urekere uhure hwako, newe auchazobhadhari chiro nakamwe.

⁴² Ndizvo ndinozogutisa ushungu hwangu hukuru hunyarare kwouri, nendurumwa yangu inozobva kwouri; ndinozonyarara, andichazonyangadzwi.

⁴³ Ngokuti iwewe auzi kukarakadza ngamazuva outsva hwako, asi wandinesa ngeizvi zviro zveshe; ndizvo ndapetudza zviito zvako padera pesoro rako, unoronza Mambo Mwari, Mwari. Auzi kuita uku kuemura kwenyama kututsira padera pezvinyangadzo zvako zveshe here?

Kudai ndiMai, Kudai ngeMwanasikana

⁴⁴ “Ringira, weshe unoshandisa zvinai unozoereketa ichi chinai ndiwe echiti, ‘Mwanasikana wakadaiwo ndimai ake.’

⁴⁵ Iwewe uri mwanasikana wamai ako, uwo wakanyenya mwamuna wake nevana vake; newe uri hurwani wevanun'una vako, avo vakanyenya vamuna vavo nevana vavo. Mai ako vaiya muHiti nababa ako vaiya muAmori.

⁴⁶ Hurwani ako vakuru vaiya Samaria, avo vaigara nevanasikana vavo ngedera kwako; nomunun'una wako mudoko waigara ngokubani kwako Sodhoma nevanasikana vake.

⁴⁷ Iwewe auzi kuhamba ngenjira dzavo kwega, nokuita kudai ngezvinyangadzo zvavo; mukamukuwo kadoko, iwewe waiya wapinda kushata kupinda ivo ngenjira dzako dzeshe.

⁴⁸ Kudai ngezvendinopona, unoronza Mambo Mwari, Mwari, Sodhoma munun'una wako nevanasikana vake avazi kuita kudai ngezvewaita iwewe nevanasikana vako.

⁴⁹ Ringira, uku ndikwo kushata kwomunun'una wako Sodhoma: Iye nevanasikana vake vaiya nokudzikudza, nokushadaya ngokudya, nokuwanda kwokugarisika, asi avazi kudetsera varombo nevanotama.

⁵⁰ Vaidzitunhumadza vechiita zvinonyangadza pamberi pangu; ndizvo ndakavadusa kudai ngezvendakaona.

⁵¹ Samaria arizi kushaisha norupande rwezvishaishi zvako; iwewe wakawanzisa zvinonyangadza zvako kupinda ivo, wakapembedza vanun'una vako mukati mwezvinonyangadza zvako zveshe zvewakaita.

⁵² Twara kutsveruka kwako, iwewewo wakatonga vanun'una vako ngenjira yakanaka; ngendaa yezvishaishi zvako zvewakaita zvinonyangadza kupinda zvavo, vakarurama kupinda iwewe. Ndizvo iwewe ita unotsverudzwa; iwewewo udzitwarire kutsveruka kwako, ngokuti wakapembedza vaunun'una vako.

Sodhoma neSamaria Zvinopetudzwa

⁵³ “Ndinozovapetudza kubva muuhloko hwavo, uhloko hweSodhoma nevanasikana vake, nouhloko hweSamaria nevanasikana vake, naapo ndinozopetudzazve uhloko hwehloko dzako pakati pavo,

⁵⁴ kuitira kuti iwewe udzitwarire kutsveruka kwako, nokutsverudzwa ngendaa yeizvo zveshe zvewakaita, ngeiyi ndaa iwewe uri muembedzeri kwevari.

⁵⁵ Ngendaa yevanun'una vako, Sodhoma nevanasikana vake vanozopetuka kuugaro hwavo hwokutanga. Samaria nevanasikana vake vanozopetuka kuugaro hwavo hwokutanga, naapo iwewe nevanasikana vako munozopetuka kuugaro hwenyu hwokutanga.

⁵⁶ Munun'una wako Sodhoma aazi kureiwa ngomuromo wako muzuva rokudzikudza kwako,

⁵⁷ kushata kwako kusati kwaoneka here? Zvino waa chishekedzo kuvanasikana veEdhomu, nevaakirwana vake veshe, nokuvanasikana vevaFiristia veshe vanokutendenedza avo vanokushoora.

⁵⁸ Iwewe unosisira kutwara kuororwa kwokuemura kwenyama yako nezvinonyangadza zvako, unoronza Mambo Mwari.

⁵⁹ “Eya, izvi ndizvo zvinoronza Mambo Mwari, Mwari: Inini ndinozoita kweuri kudai ngezvewakaita, iwewe wakashoora mhiko wechigura chitenderano;

⁶⁰ asi ndinozokarakadza chitenderano changu newe mumazuva outsva hwako, neni ndinozoemesa newe chitenderano chemhera nariini.

⁶¹ Zvino iwewe unozokarakadza ngenjira dzako, utsveruke apo unozoashira vanun'una vako, veshe pamwepo vakuru vako, nevadoko vako, nokuvapa kwouri kuita vanasikana, asi haiwa ngendaa yechitenderano chendakaita newe.

⁶² Ndinozoita chitenderano changu newe; newe unozozia kuti inini ndini Mambo Mwari,

⁶³ kuitira kuti iwewe ukarakadze nokutsveruka, kuti usachazobeura muromo wako nakamwe ngendaa yokutsveruka kwako, apo pendinokukungurira zveshe zvowakaita,” unoronza Mambo Mwari.