Ezek. 14 - Bhaibheri Rakachena muChindau

Mwari Unoitira Ndaa Vanodira Zvimwari

¹ Vakuru vamweni vevaIsuraeri vakauya kwendiri, vakagara pamberi pangu.

² Neizwi raMambo Mwari rakauya kwendiri rechiti,

³ “Mukororo womunhu, vanhu ava vatora miedzaniso yavo mumwoyo yavo, nokuisa kushata kwavo kuita chipumhuniso pamberi pehope dzavo; ndingadzitendera kubvunzwa ndivo here?

⁴ Ndizvo ereketa kwevari wechiti, ‘Izvi ndizvo zvinoronza Mambo Mwari, Mwari: Munhu weshe waIsuraeri unotora miedzaniso yake mumwoyo mwake, nokuisa kushata kwake pamberi pake kuita chipumhuniso pamberi pehope yake, asi echiuya kunomuprofeti, inini Mambo Mwari ndinozopingura uwo unouya kudai ngouwandu hwemiedzaniso yake,

⁵ kuitira kuti ndibate mwoyo yemhatso yaIsuraeri, veshe avo vakaparadzaniswa kubva kwendiri kubudikidza ngemiedzaniso yavo yokudira.’

⁶ “Ndizvo ronza kunevemhatso yaIsuraeri kuti, ‘Izvi ndizvo zvinoronza Mambo Mwari, Mwari: Tenderukai imwimwi, mukunukuke mwemene kubva kumiedzaniso yenyu yokudira; mutenderudze hope dzenyu kubva kunezvinonyangadza zvenyu.’

⁷ Ngokuti munhu weshe wemhatso yaIsuraeri, nokuti mupara unogara muIsuraeri, unodziparadzanisa kubva kwendiri, echiemesa miedzaniso yokudira mumwoyo mwake, nokuisa kushata kwake kuita chinopumhunisa pamberi pehope yake, asi echiuya kunomuprofeti kuti abvunze kwaari ndini, inini Mambo Mwari ndinozomupingura pachangu.

⁸ Ndinozoemesa hope yangu kurwa nomunhu uwo, ndimuite chioniso nechinai, ndinozomugura kubva pakati pevanhu vangu; nemwi munozozia kuti inini ndini Mambo Mwari.

⁹ “Kudai muprofeti echizochengedzerwa nokuereketa izwi, inini Mambo Mwari ndini ndachengedzera uwo muprofeti, neni ndinozotambanudza nyara yangu kurwa naye, ndinozomuparadza kubva pakati pevanhu vangu Isuraeri.

¹⁰ Navo vanozotwara kuororwa kwokushata kwavo, kuororwa kwounobvunza nokuororwa kwomuprofeti uwo kunozotodzana,

¹¹ kuti mhatso yaIsuraeri isachazopauka nakamwe kubva kwendiri, nokuti isachazodzisvipisa ngezvishaishi zvayo. Asi kuti izoita vanhu vangu, neni ndinozoita Mwari wayo,” unoronza Mambo Mwari, Mwari.

Noa, Dhanieri naJobe

¹² Izwi raMambo Mwari rakauyazve kwendiri rechiti,

¹³ “Mukororo womunhu, apo nyika yechishaisha kwendiri ngokusikagondeka kukurutu, neni ndinozotambanudza nyara yangu kurwa nayo, ndigure mudondoro wechingwa chayo, ndiunze nzara padera payo, nokuuraya vanhu nemhuka kubva kweiri,

¹⁴ kunyazwi ava vanhu vatatu, Noa, Dhanieri naJobe, vaiya mukati mwayo, vaizoponesa mweya yavo yega ngokururama kwavo, unoronza Mambo Mwari, Mwari.

¹⁵ “Kudai ndechitumira zvikara zvinotyisa kuiparadza nyika, kuita matongo, pasina naumwe ungahamba ndimwo ngendaa yezvikara,

¹⁶ kunyazwi vamuna vatatu ava vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa vakororo nokuti vanasikana; ivo vega vaizoponeswa, asi nyika yaizoita matongo.

¹⁷ “Nokuti kudai ndechiunza shoti padera penyika iyo ndechiti, ‘Shoti ngaihambe kupinda ngomunyika;’ nokuuraya vanhu nemhuka kubva kweiri,

¹⁸ kunyazwi ava vamuna vatatu vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa vakororo nokuti vanasikana, asi ivo pachavo vega vaizoponeswa.

¹⁹ Nokuti kudai ndechitumira nhenda munyikemwo, nokudurura ushungu hwangu padera payo ngokuparadza ngazi, ngokuuraya kubva kweiri vanhu nemhuka,

²⁰ kunyazwi kudai Noa, Dhanieri naJobe, vaiya mukati mwayo, kudai ngezvendinopona, unoronza Mambo Mwari, Mwari, vasaizokona kuponesa mukororo nokuti mwanasikana; kwega vaizokona kuponesa mweya yavo ngokururama kwavo.

²¹ “Ngokuti izvi ndizvo zvinoronza Mambo Mwari: Kunozopinda kwakaitawani kukura apo ndinozotumira kuita kwangu kunouraya kwokutonga kwangu kurongomuna kunotyisa padera peJerusarema, shoti, nzara, zvikara zvinotyisa, nenhenda, kuuraya kubva kweiri vanhu nemhuka!

²² Asi, ringirai, mukati mwaro kunozosara avo vanopona, vakororo nevanasikana avo vanozobudiswa; vanozobuda kweuri. Naapo waona njira dzavo nezviito zvavo, munozoembedzerwa ngendaa yokushata kwendakaunza padera peJerusarema, ngeizvo zveshe zvendakaunza padera paro.

²³ Vanozomuembedzera, apo munoona njira dzavo nezviito zvavo; nemwi munozozia kuti andizi kuzviita pasina ndaa izvo zveshe zvendakaita mweriri,” unoronza Mambo Mwari, Mwari.