Ezek. 13 - Bhaibheri Rakachena muChindau

Chiprofeti Chinoitira Ndaa Vaprofeti voKunyepa veVamuna

¹ Izwi raMambo Mwari rakauya kwendiri rechiti,

² “Mukororo womunhu, profeta kuitira ndaa vaprofeti vemhatso yaIsuraeri, avo vanoprofeta, uronze kwevari avo vanoprofeta zvinobva mumwoyo yavo, ‘Izwai izwi raMambo Mwari.’

³ Izvi ndizvo zvinoronza Mambo Mwari, Mwari: Ihehe kwevari vaprofeti mapenzi, avo vanoteera mweya yavo, navo avazi kuona chiro!

⁴ Vaprofeti vako, O Isuraeri, vakadai ngehava pakati pematongo.

⁵ Amuzi kukwira pakaondomoka nokuti kunasirisa rukumbati rwemhatso yaIsuraeri kuti ikone kuema mukurwa ngezuva raMambo Mwari.

⁶ Vaona zvinochengedzera nokuprofeta manyepo, vechironza kuti, ‘Mambo Mwari unoronza izvi,’ apo Mambo Mwari asikazi kuvatuma; asi vanogarira kuitika kweizwi ravo.

⁷ Amuzi kuona zvioniso zvokunyepa here, nokuti kuereketa kwokunyepa, apo waronza kuti, ‘Mambo Mwari wazvironza;’ kunyazwi andizi kuzviereketa?

⁸ “Ndizvo izvi zvinoronza Mambo Mwari, Mwari: Ngokuti mwakaereketa manyepo, mwechiona manyepo, ndizvo ringirai, ndinorwisana nemwi, unoronza Mambo Mwari, Mwari.

⁹ Nyara yangu inozorwa nevaprofeti vanoona zvinochengedzera, nokuereketa manyepo; avazopindi mumbungano yevanhu vangu, avazonyorwi mubhuku remazina evemhatso yaIsuraeri, nokuti kupinda munyika yaIsuraeri; nemwi munozozia kuti inini ndini Mambo Mwari, Mwari.

¹⁰ Ngokuti, mugwinyiso vakapaukisa vanhu vangu vechiti, ‘Kunyarara,’ apo paiya pasina kunyarara; ngokuti apo vanhu vaaka rukumbati rusikazi kugwinya ava vaprofeti vanoruseta ngesuko,

¹¹ ronza kwevari avo vanoruseta ngesuko kuti runozoondomoka.Kuchauya ndambi yokunaya, matsanza makuru anozowa, nedutu rinomubvumo rinozoruputsa.

¹² Naapo rukumbati rwawa, akuzoronzwi here kwomuri kuti, ‘Suko remwakaseta ndiro riri pari?’ ”

¹³ “Izvi ndizvo zvinoronza Mambo Mwari, Mwari: Muushungu hwangu ndinozoruputsa ngomubvumo wedutu, nomuushungu hwangu kuchauya ndambi nematsanza makuru kurupedza muushungu hwangu kuruparadza.

¹⁴ Ndinozopwanyira pashi rukumbati rwomwakaseta ngemasuko, nokuruputsira pashi, kuti matsikiro arwo aoneke; apo perunowa, munozopereramwo nemwi munozozia kuti inini ndini Mambo Mwari.

¹⁵ Ngokudaro ndinozopedza ushungu hwangu padera porukumbati, nepadera paavo vakaruseta ngesuko, neni ndinozoti kwomuri, ‘Rukumbati apachina, nokuti avo vakaruseta,

¹⁶ vaprofeti vaIsuraeri avo vakaprofeta ngendaa yeJerusarema, nokuona zvioniso zvokunyarara kwaro, apo paiya pasina kunyarara,’ ” unoronza Mambo Mwari, Mwari.

Chiprofeti Chinoitira Ndaa Vaprofeti voKunyepa veVakadzi

¹⁷ “Asi iwewe, mukororo womunhu, emesa hope yako kuti irwe nevanasikana vevanhu vako, avo vanoprofeta zvinobva mumwoyo yavo; uprofete kuvaitira ndaa

¹⁸ wechiti, ‘Izvi ndizvo zvinoronza Mambo Mwari, Mwari: Ihehe kwevari vakadzi vanosona mazango omumioko, vanoita mavheri masoro evanhu vourebu hweshe mukuvhima mweya yevanhu! Munozovhima mweya yevanhu vangu here, nokuponesa mweya yenyu?

¹⁹ Mwandisvipisa pakati pevanhu vangu kuti muone tsimba yebhare nezvigurwa zvezvingwa, kuuraya mweya isakasisiri kuti ife, nokuponesa mweya isikasisiri kuti ipone, ngokunyepa kwenyu kunevanhu vangu vanopurutana manyepo enyu.’

²⁰ “Ndizvo izvi zvinoronza Mambo Mwari, Mwari: Ringirai, andidakariri mazango enyu, yomunovhima ndiyo kupona kwevanhu vangu, neni ndinozoibaura kubva kumioko yenyu, ndinozoita kuti mweya isunhurike iende, mweya yomunovhima kudai ngeshiri.

²¹ Ndinozobaura mavheri enyu, ndinunure vanhu vangu kubva munyara dzenyu; avachazotambudzwizve munyara dzenyu; nemwi muchazia kuti inini ndini Mambo Mwari.

²² Ngokuti mwatsamwisa mwoyo wewakarurama ngemanyepo enyu, kunyazwi andizi kumutsamwisa; nemwi mwagwinyisa nyara dzewakashata, kuti asakunukuka kubva kunjira yake yakashata nokuponeswa,

²³ ndizvo amuchazoonizve zvioniso zvokunyepa, nokuti kubudirwa ngezvokubudirwa; ngokuti ndinozonunura vanhu vangu kubva munyara dzenyu. Zvino munozozia kuti inini ndini Mambo Mwari.”