Ezek. 12 - Bhaibheri Rakachena muChindau

Muprofeti Unodziita Kudai ngoMubatwa

¹ Izwi raMambo Mwari rakauya kwendiri rechiti,

² “Mukororo womunhu, unogara pakati pemhatso inomukira, avo vanemadziso okuona, asi avaoni, vanenzee dzokuzwa, asi avazwi, ngokuti imhatso inomukira.

³ Ndizvo, mukororo womunhu, dzirongedzere nhunduru dzoubatwa, uende muubatwa masikati mukuona kwavo; unozoenda kudai ngomubatwa kubva kundau yako uende kundau imweni mukuona kwavo. Pamweni vangazozwisisa, kunyazwi imhatso inomukira.

⁴ Unozobudisa nhunduru dzako masikati mukuona kwavo, kudai ngenhunduru dzousungwa; unozobuda pachako madeekoni mukuona kwavo, kudai ngavanhu vanoenda kuusungwa.

⁵ Utse kupotya rukumbati mukuona kwavo, utware kubudisa nhunduru dzako ndipo.

⁶ Mukuona kwavo unozomirudza nhunduru papfudzi rako nokuitwara muchidima; unozofukidza hope yako, kuti usaona nyika; ngokuti ndakakuita chioniso kunevemhatso yaIsuraeri.”

⁷ Ndakaita kudai ngezvendakapangwa. Ndakabudisa nhunduru dzangu masikati, kudai ngenhunduru dzoubatwa, nomumadeekoni ndakatsa kupotya rukumbati ngenyara dzangu; ndakadzibudisa kwasvipa, ndakadzitwara pafudzi rangu mukuona kwavo.

⁸ Mumangwanani izwi raMambo Mwari rakauya kwendiri rechiti,

⁹ “Mukororo womunhu, mhatso yaIsuraeri, mhatso inomukira, aizi kuronza here, kuti, ‘Unoitenyi?’

¹⁰ Ronza kwevari kuti, ‘Izvi ndizvo zvinoronza Mambo Mwari, Mwari: Chiprofeti ichi chinoereketa ngendaa yomutongi uri muJerusarema, nevemhatso yeshe yaIsuraeri iri mukati mwaro.’

¹¹ Ronza kuti, ‘Inini ndiri chioniso chenyu.’ Kudai ngezvendaita, ndizvo zvinozoitwa kwevari; vanozoenda muubatwa.

¹² Nomutongi uri pakati pavo unozotwara mutwaro pamapfudzi ake kwootitsvaa, unozobuda kuenda; unozotsa kupotya rukumbati kuti autware kubuda ndipo, unozofukidza hope yake kuti asazoona pashi ngamadziso ake.

¹³ Ndinozotambanudza padera pake mumbure wangu, naye unozobatwa mumurau wangu; ndinozomuunza Bhabhuroni, nyika yevaKharadhea; asi aazoioni, naye unozofireyo.

¹⁴ Ndinozoparadzira kumadutu eshe avo vanomutendenedza, vadetseri nevangwariri vake veshe; ndinozovhomora shoti sure kwavo.

¹⁵ Navo vanozozia kuti inini ndini Mambo Mwari, apo pendichavaparadzira pakati pemadzinza, nokuvadzingira pakati penyika.

¹⁶ Asi ndinozoita kuti vashomani vavo vapokonyoke kubva kushoti, kubva kunzara, nokunhenda, kuti vazoronza kunyangadza kwavo kweshe pakati pemadzinza kweshe kwevanoenda; zvino vanozozia kuti inini ndini Mambo Mwari.”

Chioniso choMuprofeti Unohuta

¹⁷ Izwi raMambo Mwari rakauya kwendiri rechiti,

¹⁸ “Mukororo womunhu, idya chingwa chako wechihuta, umwe mvura yako wechitetemera nokutyiswa,

¹⁹ uti kunevanhu venyika, ‘Izvi ndizvo zvinoronza Mambo Mwari, Mwari ngendaa yevagari veJerusarema munyika yaIsuraeri: Vanozodya chingwa chavo mukutyiswa, nokumwa mvura yavo mukupera simba, ngokuti nyika yavo inozotorerwa zveshe zviri mukati mwayo, ngendaa yokugebenga kwavo veshe vanogara mukati mwayo.

²⁰ Madhorobha anogarwa anozoparadzwa nenyika inozoita matongo, nemwi munozozia kuti inini ndini Mambo Mwari.’ ”

Chinai Chine Mbiri neIzwi Risina Mbiri

²¹ Izwi raMambo Mwari rakauya kwendiri rechiti,

²² “Mukororo womunhu, chinoronzenyi chinai chako ngendaa yenyika yaIsuraeri chinoti, ‘Mazuva anorebeswa, nechioniso cheshe chinoita chisina shwiro?’

²³ Ndizvo varonzere, ‘Izvi ndizvo zvinoronza Mambo Mwari, Mwari: Ndinozoita kuti ichi chinai chipere, navo avachazochishandisizve kudai ngechinai muIsuraeri,’ Asi ronza kwevari uti, ‘Mazuva aa pasinde, nokuitika kwezvioniso zveshe.

²⁴ Ngokuti akuchazoapo zvioniso zvisina shwiro nokuti kubudirwa kwokunyepera mukati mwemhatso yaIsuraeri.

²⁵ Asi inini Mambo Mwari ndinozoereketa izwi rendinoereketa, naro rinozoitika. Arichazononoswi, asi mumazuva enyu, O mhatso inomukira, ndinozoereketa izwi nokuriita,’ ” unoronza Mambo Mwari, Mwari.

²⁶ Izwi raMambo Mwari rakauya kwendiri rechiti,

²⁷ “Mukororo womunhu, ringira, mhatso yaIsuraeri inoti, ‘Chioniso icho chaanoona ngechemakore mazhinji arimberi; unoprofeta ngemikuwo ichindori kuretu.’

²⁸ Ndizvo ronza kwevari uti, ‘Izvi ndizvo zvinoronza Mambo Mwari, Mwari: Akuna narimwe remazwi angu richazononoswa, asi izwi rendinoereketa rinozoitika,’ ” unoronza Mambo Mwari, Mwari.