Ezek. 11 - Bhaibheri Rakachena muChindau

Jerusarema Rinotongwa

¹ Mweya wakandimirudza padera, ukandiunza kumusiwo wokumabvazuva kwemhatso yaMambo Mwari, unoringira kumabvazuva. Apo panopindwa ndipo pamusiwo vaiyapo vamuna makumi mairi nevashanu; pakati pavo ndakaona Jaazania mukororo waAzuri, naPheratia mukororo waBhenaia, vatongi vevanhu.

² Wakati kwendiri, “Mukororo womunhu, ava ndivo vanhu vanoronga zvakashata naavo vanopanga zvakashata mudhorobha iri.

³ Vanoti, ‘Nguva aisati yaapasinde yokuaka mhatso; dhorobha iri ihari, isusu tiri nyama.’

⁴ Ndizvo profeta kuvaitira ndaa, profeta, O mukororo womunhu.”

⁵ Zvino Mweya waMambo Mwari wakadzaka padera pangu, wakati kwendiri, “Ronza, kuti izvi ndizvo zvinoronza Mambo Mwari: Izvi ndizvo zvounopinimidza, O mhatso yaIsuraeri; ndinozia zviro zvinouya mumupinimidzo wako.

⁶ Wauraya vakawanda mudhorobha iri, nokuzadza mapato aro ngevakaurawa.

⁷ “Ndizvo izvi zvinoronza Mambo Mwari, Mwari: Avo vakaurawa vewakaradzika mukati mwaro inyama, neiri dhorobha ihari; asi uchabudiswa kubva mukati mwaro.

⁸ Watya shoti, neni ndichaunza shoti padera pako, unoronza Mambo Mwari, Mwari.

⁹ Ndichakubudisa kubva mukati mwaro, nokukupira munyara dzevapara, ndiite zvitongero zvangu padera pako.

¹⁰ Uchaurawa ngeshoti; ndichakutonga mumigano yaIsuraeri; uchazia kuti inini ndini Mambo Mwari.

¹¹ Iri dhorobha arizoiti hari yako akadi, newe akuzoiti nyama mukati mwaro. Ndichakutonga mumigano yaIsuraeri.

¹² Zvino unozozia kuti ndini Mambo Mwari, uwo wousikazi kuhamba muzviemeso zvake, uwo wousikazi kungwarira zvitongero zvake, asi wakaita kudai ngemiitiro yamadzinza awo anomutendenedza.”

¹³ Zvino, apo ndechiprofeta, Pheratia mukororo waBhenaia wakafa. Zvino ndakawa pashi ngehope yangu, ndikachema ngeizwi guru ndikati, “A, Mambo Mwari Mwari! Unozopedzisa yaamho here vakasara vaIsuraeri?”

Chigondiso chaMwari kune Vakabatwa

¹⁴ Zvino izwi raMambo Mwari rakauya kwendiri rechiti,

¹⁵ “Mukororo womunhu, hama dzako, hama dzako dzemene, vanhu vedzinza rako, avo veshe vemhatso yaIsuraeri, veshe vavo, ndivo avo vevakazwi ngevagari veJerusarema, ‘Vakaenda kuretu kubva kunaMambo Mwari; iyi nyika yakapuwa kwetiri kuita nhaka.’

¹⁶ Ndizvo ronza kuti: Izvi ndizvo zvinoronza Mambo Mwari, Mwari: Kunyazwi ndakavatarausira kuretu pakati pevamadzinza, kunyazwi ndakavaparadzira pakati penyika, asi ndakaita kwevari ugaro hwakachena kwenguva doko munyika dzevakaguma.

¹⁷ Ndizvo ronza kuti: Izvi ndizvo zvinoronza Mambo Mwari, Mwari: Ndinozomuunganidza kubva kuvanhu vemadzinza, nokumuunganidza kubanze kwenyika dzemwakaparadzirwa, neni ndinozomupa nyika yaIsuraeri.

¹⁸ Naapo vagumapo, vanozodusa kubva kweriri zviro izvo zveshe zvinonyenyesa, nazvo zveshe zvinonyangadza zvayo.

¹⁹ Ndinozovapa mwoyo umwe, nokuisa mweya mutsva mukati mwavo; ndinozodusa mwoyo webuwe kubva munyama yavo, ndivape mwoyo wenyama,

²⁰ kuitira kuti vahambe muzviemeso zvangu, nokungwarira zvitongero zvangu, vazvipurutane. Zvino vanozoita vanhu vangu, neni ndinozoita Mwari wavo.

²¹ Asi ngendaa yaavo, avo mwoyo yavo inoteera zviro zvavo zvinonyenyesa nezvinonyangadza zvavo, ndinozounza zviito zvavo padera pemasoro avo,” unoronza Mambo Mwari, Mwari.

Uthende hwaMwari Hunobuda Kubva Jerusarema

²² Zvino makherubhi akamirudza maphaphiro awo, nemavhiri parutii pawo; nouthende hwaMwari waIsuraeri hwaiya padera pawo.

²³ Nouthende hwaMambo Mwari hwakakwira kubva pakati pedhorobha, hwakaema padera pomutunhu uri ngokumabvazuva kwedhorobha.

²⁴ Mweya wakandikwidza padera, ukandiunza muchioniso choMweya waMwari muKharadhea kunevabatwa. Zvino chioniso chendakaona chakakwira kubva kwendiri.

²⁵ Neni ndakaronzera vabatwa zviro zveshe izvo zvaakandionisa Mambo Mwari.