Ezek. 10 - Bhaibheri Rakachena muChindau

Uthende hwaMambo Mwari Hunobva muMhatso yaMwari

¹ Zvino ndakaringira, nepadera pomukana waiya padera pemasoro emakherubhi pakaoneka padera pawo chiro chinemuemo webuwe resafire, chakadai ngokuringirika kunoita muemo wedendemaro.

² Wakaereketa kunomunhu uwo waiya akafuka jira rorukangaza echiti, “Potera pakati pemavhiri pashi pemakherubhi, uzadze nyara dzako ngemasimbe omuriro anobaka kubva pakati pemakherubhi, uaparadzire padera pedhorobha.” Wakapoteramwo mukuona kwangu.

³ Zvino makherubhi akaema ngokurutii rwokubani rwemhatso, apo munhu uwo pakapotera mukati, negore rakazadza ruwanze rwomukati.

⁴ Zvino uthende hwaMambo Mwari hwakakwira kubva pakherubhi, rwakaema padera pedimba remhatso, nemhatso yakazara ngegore, noruwanze rwakazara ngokun'anikira kwouthende hwaMambo Mwari.

⁵ Bope remaphaphiro emakherubhi rakazwika metsa kuruwanze rwokubanze, rakadai ngeizwi raMwari Une-simba-reshe, apo echiereketa.

⁶ Naapo apanga munhu wakafuka jira rorukangaza echiti, “Tora muriro kubva pakati pemavhiri, kubva pakati pemakherubhi,” wakapotera mukati, akaema pasinde pevhiri.

⁷ Nekherubhi rimwe rakatambanudza nyara yaro kubva pakati pamakherubhi, kumuriro uwo waiya pakati pemakherubhi rakautora, rakauisa munyara dzouwo waiya akafuka jira rorukangaza, uwo wakautora kubuda kubanze.

⁸ Makherubhi akaoneka anenyara inechiemo chenyara yomunhu iri pashi pemaphaphiro awo.

⁹ Ndakaringira, ringira, ndakaonapo mavhiri marongomuna pasinde pemakherubhi, vhiri rimwe raiya pasinde pakherubhi rimwe ngarimwe; nokuringirika kwemavhiri kwaiya kwakadai ngomuara webuwe rethopazi rinon'anikira.

¹⁰ Ngendaa yokuringirika kwawo marongomuna aiya nomuemo wairingirika wakadai ngechiro chakadai ngevhiri riri pakati pevhiri rimweni.

¹¹ Naapo oohamba, aikona kuhamba kumarutii eshe marongomuna, asikakunukuki apo echihamba; kunyazwi murutii rwakadini kwakaringira vhiri remberi, amweni eshe aiteera asikakunukuki apo echihamba.

¹² Muiri wawo weshe, magomo awo, simbi dzepakati pegomo, maphaphiro awo nemavhiri, mavhiri emarongomuna awo aiya akazara ngemadziso kweshe kweshe.

¹³ Ngendaa yemavhiri, akadaidzirwa mukuzwa kwangu, kuti, “A mavhiri.”

¹⁴ Rimwe ngarimwe rawo raiya nehope murongomuna: hope yokutanga yaiya hope yekherubhi, hope yechipiri yaiya hope yomunhu, hope yechitatu yaiya hope yemhondoro, nehope yechirongomuna yaiya hope yegodzi.

¹⁵ Makherubhi akamiruka. Aya ndiwo zvisikwa zvinopona zvendakaona ndiri parwizi Khebhari.

¹⁶ Naapo makherubhi akaenda, nemavhiri akaenda ari pasinde pawo; naapo makherubhi akatambanudza maphaphiro awo kumiruka kubva panyika, nemavhiri aazi kupauka kubva parutii pawo.

¹⁷ Naapo makherubhi aema, nawo aiema; naapo awo amiruka, nemavhiri aimirukawo; ngokuti mweya wezvisikwa zvinopona waiya mukati mwawo.

¹⁸ Zvino uthende hwaMambo Mwari hwakabva padera pedimba remhatso, ukaema padera pemakherubhi.

¹⁹ Makherubhi akatambanudza maphaphiro awo, akamiruka kubva panyika mukuona kwangu, apo aibuda, nemavhiri parutii pawo. Akaema akamata pokupotera pamusiwo wokumabvazuva wemhatso yaMambo Mwari; nouthende hwaMwari waIsuraeri hwaiya padera pawo.

²⁰ Izvi ndizvo zvisikwa zvinopona zvendakaona zviri pashi paMwari waIsuraeri ndiri pasinde perwizi Khebhari; neni ndakazia kuti ndiwo makherubhi.

²¹ Rimwe ngarimwe rawo raiya nehope murongomuna, rimwe ngarimwe raiya nemaphaphiro marongomuna; nepashi pemaphaphiro awo paiya nechiro chaiya nechiemo chenyara dzomunhu.

²² Miemo yehope dzawo yaiya yehope dzakatodzana kuringirika kwadzo, kudai ngedzendakaona ndiri pasinde porwizi Khebhari. Rimwe ngarimwe rakahamba rakatitwasa mberi.