Esita 9 - Bhaibheri Rakachena muChindau

VaJudha Vanoparadza Magaa avo

¹ Zvino mumwedzi wegumi nemiiri, romwedzi waAdha, ngezuva regumi nematatu rawo, apo mupango wamambo nechironzo chake zvakwedzera kuti zviitike, ngeiro zuva apo magaa evaJudha aiya negonda kuti vanozoa nesimba padera pavo, asi zvakashandurwa ngezuva rimwe, apo vaJudha pevakaita simba padera paavo vaivanyenya,

² vaJudha vakaungana pamwepo mumadhorobha avo mukati mwenyika dzeshe dzamambo Ahasuerusi, kuti vaise nyara dzavo padera paavo veshe vaitsvaka kuvaparadza; apana naumwe waishinga kuemesedzana navo, ngokuti kutyisa kwavo kwaiya kwaguma padera pevanhu veshe.

³ Vatongi veshe venyika, madzimambo avo, nduna dzavo nevakuru vamambo, vakarwira vaJudha, ngokuti kutyisa kwaMordhekhai kwakawira padera pavo.

⁴ Ngokuti Mordhekhai waiya nesimba guru mumhatso yamambo, nembiri yake yakazwika munyika dzeshe, apo mwamuna uyu Mordhekhai paakaangira kukura kuita simba.

⁵ Ndizvo vaJudha vakauraya magaa avo eshe ngokubaya ngeshoti, nokuuraya nokuvaparadza, vakaita kudai ngezvaivadakadza kwevari avo vaivanyenya.

⁶ Mungome yomuSusa vaJudha vakauraya nokuparadza vamuna mazana mashanu (500).

⁷ Vakauraya Pharshandhatha, Dharifoni, Aspatha,

⁸ Phoratha, Adharia, Aridhatha,

⁹ Pharmashita, Arisai, Aridhai naVhaizatha,

¹⁰ vakororo gumi vaHamani mukororo waHamedhatha, gaa revaJudha; vakavauraya, asi avazi kubata zvakachakatwa zvavo.

¹¹ Ngeiro zuva uwandu hweavo vakaurawa mungome yomuSusa hwakaziiswa kunamambo.

¹² Namambo wakati kunaEsita vahosi, “Mungome yomuSusa vaJudha vakauraya vamuna mazana mashanu (500), nevakororo vaHamani gumi. Chiinyi chevaita kunyika dzimweni dzamambo? Zvino chiinyi chichemo chako? Chinozoitwa kwouri. Chiinyizve chikumbiro chako? Chinozoitwa.”

¹³ Esita wakati, “Kudai zvechimudakadza mambo, ngavatenderwe vaJudha vari muSusa, kuti vaitezve mangwani kudai ngechironzo chanyamashi, tenderazve kuti vakororo vaHamani gumi vasungirwe pamuti.”

¹⁴ Ndizvo mambo wakapanga kuti izvi zviitike; nechironzo chakabuda muSusa, nevakororo vaHamani gumi vakasungirwa.

¹⁵ VaJudha vaiya muSusa vakaunganazve ngezuva regumi nemarongomuna romwedzi unozwi Adha, navo vakauraya vamuna mazana matatu (300) muSusa, asi avazi kubata pfuma yavo.

¹⁶ Zvino vaJudha vamweni vaiya kumarutii enyika yamambo vakaunganawo pamwepo, kurwira kupona kwavo, navo vakaona kuzorora kubva kumagaa avo, vakauraya magaa avo makumi manomwe nemashanu emakumi emazana (75,000), asi avazi kubata pfuma yavo.

¹⁷ Iri raiya zuva regumi nematatu romwedzi unozwi Adha; ngezuva regumi nemarongomuna rawo vakazorora, vakariita zuva redhiri nerokudakara.

¹⁸ Asi vaJudha vaiya muSusa vakaungana ngezuva regumi nematatu rawo, nangezuva regumi nemarongomuna, navo vakazorora ngezuva regumi nemashanu, vakariita zuva redhiri nokudakara.

¹⁹ Ndizvo vaJudha vaigara mumaguta asikazi kushosherwa ngorukumbati rwemapuwe, vakaemesa zuva regumi nemarongomuna romwedzi unozwi Adha kuti riite zuva rokudakadara nokudya, zuva rokuzorora revaipana zvipo zvokudya umwe kunoumweni.

Dhiri rePhurimu

²⁰ NaMordhekhai wakanyora izvi zviro, wakatumira tsamba kuvaJudha veshe, vaiya kumarutii enyika dzeshe dzamambo Ahasuerusi, veshe vaiya pasinde nevaiya kuretu,

²¹ echipanga kuti vagwinyisise ichi pakati pavo, kuti varingwarire zuva regumi nemarongomuna romwedzi unozwi Adha, neregumi nemashanu romwedzi umwewo, gore ngegore,

²² kudai ngaawo mazuva evakazorora ndiwo vaJudha kubva kumagaa avo, nokudai ngomwedzi uwo wakatsandudzwa kwevari, kubva mukutambudzika kuenda mukudakara, nokubva mukutsumba kuita zuva rokuzorora; kuti vaaite mazuva okudya nokudakara, mazuva okutumirana zvipo zvokudya umwe kunoumweni, nokupa zvipo kunevarombo.

²³ Ndizvo vaJudha vakatenda kuita kudai ngomuitiro izvo zvevakatanga kuita, kudai ngezvaakanyora Mordhekhai kwevari.

²⁴ Hamani mukororo waHamedhatha muAgagi, gaa revaJudha veshe, waiya aronga zano rokuparadza vaJudha, naye waiya akaita Phurimu ndiwo mabhigidha, kuti avapedze nokuvaparadza.

²⁵ Asi apo Esita auya pamberi pamambo, wakapanga ngetsamba kuti zano rake rakashata raakapanganirana vaJudha riwire padera pesoro rake, kuti iye nevakororo vake vasungirwe pamuti.

²⁶ Ndizvo mazuva aya akadudzwa kuti Phurimu, kuteera zina rinozwi Phuri. Ndizvo ngendaa yemazwi eshe akanyorwa mutsamba iyi, nendaa yeizvo zvevakaona muiyi ndaa, neizvo zvakaitika kwevari,

²⁷ vaJudha vakaemesa, nokuashira kuita muitiro wavo, nokumibarirwana yavo, navo veshe vakabatana pamwepo navo, kuti pasina kukorera, vaangire kungwarira mazuva awo mairi ngegore gore, kudai ngezvezvakanyorwa, nokudai ngenguva yakaemeswa pagore ngegore.

²⁸ Aya mazuva anosisira kucherechedzwa nokungwarirwa kumibarirwana yeshe, mumhuri yeshe, munyika yeshe, nomudhorobha reshe; nemazuva aya ePhurimu asazokorera kungwarirwa pakati pevaJudha, nokuti kucherechedzwa kwawo mazuva aya kusazopera pakati pemibarirwana yavo.

²⁹ Esita vahosi mwanasikana waAbhihairi, pamwepo naMordhekhai muJudha, vakanyora ngokutenderwa kweshe, nokugwinyisisa tsamba iyi yechipiri yePhurimu.

³⁰ Wakatumira tsamba idzi kuvaJudha veshe, kunyika dziri zana nemakumi mairi nenomwe (127) dzoumambo hwaAhasuerusi, dzinemazwi okunyarara neokungwaririka,

³¹ nokupanga mazuva aya ePhurimu kuti ngaangwarirwe ngenguva dzawo dzakaemeswa, kudai ngezvevakapangwa vaJudha ndiMordhekhai naEsita vahosi, kudai ngezvevakadziemesera pachavo nemibarirwana yavo mipango ngendaa yokuera kudya nokutsumba kwavo.

³² Mupango waEsita wakagwinyisisa idzi ndaa dzePhurimu, nazvo zvakanyorwa mutsamba.