Esita 8 - Bhaibheri Rakachena muChindau

VaJudha Vanoronzerwa Kudzirwira

¹ Pazuva iro mambo Ahasuerusi wakapa Esita vahosi mhatso yaHamani gaa revaJudha; naMordhekhai wakauya pamberi pamambo, ngokuti Esita waiya aronza kuti iye waiya anani kwaari.

² Zvino mambo wakatora ndandazi yake yaakadusa kubva kunaHamani, akaipa kunaMordhekhai. Ndizvo Esita wakaemesa Mordhekhai padera pemhatso yaHamani.

³ Zvino Esita wakaereketazve kunamambo; wakadzikandira pashi petsoka dzake, wakamupota ngemasodzi kuti aduse zano rakashata raHamani muAgagi, nezano raakaronga kurongera vaJudha.

⁴ Mambo wakamirudzira Esita ndonga yomukore, naEsita wakamiruka, akaema pamberi pamambo.

⁵ Wakati, “Kudai zvechimudakadza mambo, nokudai ndaona nyasha mukuona kwake, nokudai ichi chiro chechioneka chakarurama pamberi pamambo, neni ndikaita unoashirika mukuona kwake, ngaunyorwe mupango unokunukudza tsamba idzo dzakarongwa zano ndiHamani mukororo waHamedhatha muAgagi, idzo dzaakanyora echipanga kuti vaJudha vaparadzwe, avo vari munyika dzeshe dzamambo.

⁶ Ngokuti ndingaita maemerenyi kuona kushata ukwo kwechiuya padera pevanhu vangu? Nokuti ndingaita mashingirenyi kuona kuparadzwa kwehama dzangu?”

⁷ Zvino mambo Ahasuerusi wakati kunaEsita vahosi nokunaMordhekhai muJudha, “Ringira, ndapa Esita mhatso yaHamani, navo vamusungira pamuti, ngokuti wakaronga kuisa nyara yake padera pevaJudha.

⁸ Nyorai kudai ngezvomunoda ngendaa yevaJudha muzina ramambo, uise chidhindo chendandazi yamambo; ngokuti kunyorwa ukwo kwakanyorwa ngezina ramambo nokuiswa chidhindo chendandazi yamambo, akuna munhu ungachikunukudza.”

⁹ Vanyori vamambo vakadaidzwa ngouwo mukuwo womwedzi wechitatu, unozwi Sivhani, ngezuva remakumi mairi nematatu rawo; nomupango wakanyorwa, kudai ndizvo zveshe zvaakapanga Mordhekhai, kuvaJudha, kuvatongi, kunduna nokuvangwariri venyika kubvira India metsa kuguma Ethiopia, nyika dzaiya zana nemakumi mairi nenomwe (127), kunyika imwe ngaimwe kudai ngokunyora kwayo, nokuvanhu veshe kudai ngendimi dzavo, nokuvaJudha kudai ngokunyora kwavo nendimi yavo.

¹⁰ Wakanyora tsamba muzina ramambo Ahasuerusi, akadziisa chidhindo chendandazi yamambo, wakatumira tsamba ngenyara dzevakatumwa vaigadha mahachi, airumbisa, akaberekwa ngezvifuyo zvamambo.

¹¹ Ngeidzi tsamba mambo wakatendera vaJudha vaiya mumadhorobha eshe kuti vaungane varwire kupona kwavo, kuparadza, kuuraya, nokupedza reshe simba rokurwa revanhu nokuti nyika yaizovarwisa, veshe nevana vavo nevakadzi, nokuchakata upfumi hwavo,

¹² pazuva rimwe munyika dzeshe dzamambo Ahasuerusi, pazuva regumi nematatu romwedzi wegumi nemiiri unozwi Adha.

¹³ Tsamba imweni yetsambayo yakanyorwa kuti ibudiswe kuita mupango munyika dzeshe, nokudaidzirwa kuvanhu veshe, nevaJudha kuti vadzinasirire ngeiro zuva kuunzidzira magaa avo.

¹⁴ Ndizvo vatumwa avo vakagadha mahachi airumbisa oumambo vakabuda vechikasirisiswa nokusundwa ngomupango wamambo. Mupango wakabudiswa kubva mungome yeSusa.

¹⁵ Zvino Mordhekhai wakabuda kubva pamberi pamambo akapfeka zvokusimira zvoumambo, zvakasvipirika nezvakachena, nedzungudza guru romukore nechokusimira chorukangaza rwakanaka rwakatsvukuruka; naapo vedhorobha reSusa vakadaidzira nokudakadzwa.

¹⁶ VaJudha vaiya nokujeka, nokudakadzwa, nokudakara, nokuremeredzwa.

¹⁷ Munyika imwe ngaimwe nomudhorobha rimwe ngarimwe, apo peshe perakaguma izwi romupango wamambo, vaJudha vaiya nokudakara nokudakadzwa, nedhiri, nokuane zuva rokuzorora. Ndizvo vazhinji vevanhu venyika vakadziita vaJudha, ngokuti kutyisa kwevaJudha kwakavagumira.