EKISEDHUSI 9 - Bhaibheri Rakachena muChindau

Kufa kweMhuka

¹ Zvino Mambo Mwari wakati kunaMosi, “Potera kunaFaro, umuronzere uti, ‘Unoronza izvi Mambo Mwari, Mwari wevaHebheru: Tendera vanhu vangu vaende, vandidire.

² Ngokuti kudai wechiramba kuvatendera kuti vaende, nokuangira kuvabata,

³ ringira, nyara yaMambo Mwari iri padera pezvifuyo zvako zviri mushango, padera pamahachi, pembongoro, pemakamera, pen'ombe, nepemakwai; inozoapo nhenda yakashata kakurutu.

⁴ Asi Mambo Mwari unozoisa muparadzaniso pakati pezvifuyo zvavaIsuraeri nezvevaEgipite, kuitira kuti chisazoapo nechimwe chinozofa cheizvo zveshe zvevana vaIsuraeri.’ ”

⁵ Mambo Mwari wakaemesa mukuwo echiti, “Mangwani Mambo Mwari unozoita chiro ichi munyika.”

⁶ Ngezuva raiteera Mambo Mwari wakaita ichi chiro; zvifuyo zveshe zvevaEgipite zvakafa, asi akuna nachimwe chezvifuyo zvevana vaIsuraeri chakafa.

⁷ Faro wakatuma vanhu, ringira, apana nachimwe chezvifuyo zvevaIsuraeri chakafa. Asi mwoyo waFaro wakatindiara, naye aazi kutendera vanhu kuti vaende.

Mota

⁸ Zvino Mambo Mwari wakati kunaMosi naAroni, “Torai tsimba yemarota epachoto, naMosi ngaakushire mudenga mukuona kwaFaro.

⁹ Nayo inozoita bukuta rakamotseka padera penyika yeshe yeEgipite. Rinozoita mota dzinoputika kuita mabandwa padera pevanhu nepadera pemhuka munyika yeshe yeEgipite.”

¹⁰ Ndizvo vakatora marota kubva pachoto, vakaema pamberi paFaro; naMosi wakaakushira mudenga; akaita mota dzinoputika kuita mabandwa padera pevanhu nepadera pemhuka.

¹¹ Nevarombi vasaikona kuema pamberi paMosi ngendaa yemota; ngokuti mota dzaiya padera pevarombi nepadera pevaEgipite veshe.

¹² Asi Mambo Mwari wakakonzesa mwoyo waFaro, naye aazi kupurutana kwavari, kudai ngezvaakaereketa Mambo Mwari kunaMosi.

Matsanza

¹³ Zvino Mambo Mwari wakati kunaMosi, “Fumira kumiruka mangwanani, ueme pamberi paFaro, wechiti kwaari, ‘Unoronza izvi Mambo Mwari, Mwari wevaHebheru: Tendera vanhu vangu vaende, vandidire.

¹⁴ Ngokuti ngouyu mukuwo ndinozotuma nhenda dzangu dzeshe padera pomwoyo wako, padera penduna dzako nepevanhu vako kuitira kuti uzie kuti akuna wakadai ndini munyika yeshe.

¹⁵ Ngokuti zvino ndingadai ndatotambanudza nyara yangu, ndikakuchaya iwewe nevanhu vako ngenhenda, newe waizodai wagurwa kubva panyika.

¹⁶ Asi ngeiyi ndaa, ngegwinyiso ndakakuemesa kuti ndikuonise simba rangu, kuti zina rangu riteketeswe munyika yeshe.

¹⁷ Uchandodzikudza here kurwisana nevanhu vangu, newe usikavatenderi kuti vaende?

¹⁸ Ringira, mangwani panguva yakadai ngeino ndinozoita kuti matsanza akashata kakurutu anaye, asikazi kumboapo akadaro muEgipite kubvira pazuva rokuemeswa kwayo metsa nanyamashi.

¹⁹ Ndizvo zvino tuma, kasira kupotedza pandau pakangwaririka zvifuyo zvako zveshe zvounazvo zviri mushango; ngokuti munhu weshe nezvifuyo zveshe zvinozooneka mushango zvisikazi kuunzwa kanyi matsanza anozonaya padera pazvo, nazvo zvinozofa.’ ”

²⁰ Zvino uwo wakatya izwi raMambo Mwari pakati penduna dzaFaro wakaita kuti hloko dzake nezvifuyo zvake zvitizire mumhatso.

²¹ Asi uwo usikazi kupinimidza ngeizwi raMambo Mwari wakarekera hloko dzake nezvifuyo zvake zviri mushango.

²² Mambo Mwari wakati kunaMosi, “Tambanudzira nyara yako mudenga, kuti matsanza awe panyika yeshe yeEgipite, padera pevanhu nepemhuka nepezvakamera zveshe zvomushango, panyika yeshe yeEgipite.”

²³ Mosi wakatambanudzira ndonga yake mudenga naMambo Mwari wakatuma kutinhira nematsanza, nomuriro wakadzaka panyika. Mambo Mwari wakanayisa matsanza padera penyika yeEgipite;

²⁴ zvakaapo matsanza nemheni, dzaiangira kuvaima, nematsanza akakura kakurutu, izvo zvisikazi kumboapo munyika yeshe yeEgipite kubvira mukuwo weyakaita dzinza.

²⁵ Matsanza akarigira pashi chiro cheshe chaiya mushango munyika yeshe yeEgipite, zveshe vanhu nemhuka; nematsanza akarigira pashi mapfiba eshe omushango, akavhunira pashi miti yeshe yomushango.

²⁶ Kwega munyika yeGosheni umwo mwaigara vaIsuraeri, mwaiya musina matsanza.

²⁷ Faro wakatuma, akadaidza Mosi naAroni, akati kwavari, “Ndashaisha nguva ino; Mambo Mwari wakarurama, inini nevanhu vangu takashata.

²⁸ Kumbira kunaMambo Mwari! Ngokuti zvakwana uku kutinhira ngesimba nematsanza; neni ndinozomutendera kuti muende, amuchazogari.”

²⁹ Mosi wakati kwaari, “Apo ndabuda kubva kudhorobha, ndinozotambanudza nyara dzangu kunaMambo Mwari; kutinhira kunozonyarara, akuchazoapopi matsanza, kuti uzie kuti nyika ngeyaMambo Mwari.

³⁰ Asi iwewe nenduna dzako, ndinozia kuti amusati mwamutya Mambo Mwari.”

³¹ Rukangaza nebhari zvakarigwa, ngokuti bhari raiya rootumbuka, norukangaza rwaiya rwaane maruwa.

³² Asi koroni nesipereti azvizi kurigwa, ngokuti zvaiya zvisati zvakura.

³³ Ndizvo Mosi wakabuda kubva kudhorobha nokubva kunaFaro, akatambanudza nyara dzake kunaMambo Mwari; nokutinhira nematsanza zvakanyarara, nemvura yaiya isikachatsvotsvomi panyika.

³⁴ Asi apo Faro aona kuti mvura nematsanza nokutinhira zvakanyarara, wakaphinda kushaishazve, akakonzesa mwoyo wake, iye nenduna dzake.

³⁵ Ndizvo mwoyo waFaro wakakonzeswa, naye aazi kutendera vanhu vaIsuraeri kuti vaende, kudai ngezvaakaereketa Mambo Mwari kubudikidza ndiMosi.