EKISEDHUSI 8 - Bhaibheri Rakachena muChindau

Mitanja

¹ Zvino Mambo Mwari wakati kunaMosi, “Potera kunaFaro, wechiti kwaari, ‘Mambo Mwari unoronza izvi, Tendera vanhu vangu vaende, vandidire.

² Asi kuti ukaramba kuvatendera kuti vaende, ringira, ndinozochaya nyika yako yeshe ngemitanja.

³ Norwizi Naire runozozara ngemitanja, nayo inozokwira nokupotera mumhatso mwako nomukamera rako nepadera pomubhedhi wako nomumhatso yevaranda vako nepadera pevanhu vako nomukati mwezvoto zvako nomukati mwezvidziyo zvako zvokukanyira zvingwa.

⁴ Nemitanja inozokwira padera pako nepadera pevanhu vako nepevaranda vako veshe.’ ”

⁵ Mambo Mwari wakati kunaMosi, “Ronza kunaAroni, ‘Tambanudza nyara yako ine ndonga padera pemvura, pemikova, pemakandwa, uite kuti mitanja ikwire padera penyika yeEgipite.’ ”

⁶ Ndizvo Aroni wakatambanudza nyara yake padera pemvura yeEgipite; nemitanja yakakwira, ikazadza nyika yeEgipite.

⁷ Nevasaramusi vakaita kudaro ngemasaramuso avo, vakakwidza mitanja padera penyika yeEgipite.

⁸ Naapo Faro wakadaidza Mosi naAroni, akati, “Potai kunaMambo Mwari kuti aduse mitanja kubva kwendiri nokune vanhu vangu; neni ndinozotendera vanhu kuti vaende, vapire midiro kunaMambo Mwari.”

⁹ Mosi wakati kunaFaro, “Ndapota ndironzere panguvanyi yaunoda kuti ndizokukumbirira ngendaa yako, nenduna dzako nevanhu vako kuti mitanja iparadzwe kubva kwouri nokumhatso dzako, isare muNaeri mwega?”

¹⁰ Iye wakati, “Mangwani.” Mosi wakati, “Ngazviitike kudai ngeizwi rako, kuti uzie kuti akuna wakadai ndiMambo Mwari, Mwari wedu.

¹¹ Nemitanja inozobva kwouri, kumhatso dzako, kunduna dzako nokuvanhu vako, nayo inozosara muNaeri mwega.”

¹² Zvino Mosi naAroni vakabuda kubva kunaFaro; naMosi wakachemera Mambo Mwari ngendaa yemitanja yaakaunza padera paFaro.

¹³ NaMambo Mwari wakaita kudai ngeizwi raMosi; nemitanja yakafa yaiya mumhatso, yaiya mumaruwanze neyaiya muminda.

¹⁴ Navo vakaiunganidza pamwepo kuita mirwi; nenyika yakanuhwa.

¹⁵ Asi apo Faro aona kuti zvanaka, wakakonzesa mwoyo wake, akaramba kupurutana kwavari, kudai ngezvaakaereketa Mambo Mwari.

Nhata

¹⁶ Zvino Mambo Mwari wakati kunaMosi, “Ronzera Aroni kuti, ‘Tambanudza ndonga yako, uchaye bukuta remavhu, kuitira kuti riite nhata munyika yeshe yeEgipite.’ ”

¹⁷ Vakaita kudaro; Aroni wakatambanudza nyara yake ine ndonga, akachaya bukuta renyika, kwakabuda nhata padera pevanhu nemhuka; bukuta reshe renyika rakapinduka kuita nhata munyika yeshe yeEgipite.

¹⁸ Nevasaramusi vakaita kudaro ngemasaramuso avo kuti dzibudepo nhata, asi avazi kukona. Dzakaapo nhata padera pevanhu nepemhuka.

¹⁹ Naapo vasaramusi vakati kunaFaro, “Ichi chinwe chaMwari!” Asi mwoyo waFaro wakakonzeswa, wakaramba kupurutana kwavari, kudai ngezvaakaereketa Mambo Mwari.

Nhunzi

²⁰ Zvino Mambo Mwari wakati kunaMosi, “Fumira kumiruka mangwanani, ueme pamberi paFaro, apo paanobuda kuenda kumvura, wechiti kwaari, ‘Mambo Mwari unoronza izvi: Tendera vanhu vangu vaende, vandidire.

²¹ Nokuti kudai wechiramba kuti vanhu vangu vaende, ringira, ndinozotuma mitanda yenhunzi padera pako, padera penduna dzako nepevanhu vako nomumhatso dzako; nemhatso dzevaEgipite dzinozozara ngemitanda yenhunzi, nepadera pemavhuwo apo pedziri.

²² Asi ngeiro zuva ndinozoparadzanisa nyika yeGosheni inogarwa ngevanhu vangu, kuti kusazoapo mitanda yenhunzi kuitira kuti uzie kuti ndini Mambo Mwari mukati mwenyika.

²³ Neni ndinozoisa muparadzaniso pakati pevanhu vangu nepevanhu vako. Ichi chioniso chinozoitika kuti chiwepo mangwani.’ ”

²⁴ Mambo Mwari wakaita kudaro, nemitanda yenhunzi mikurutu yakauya mumhatso yaFaro, mumhatso dzenduna dzake nomunyika yeshe yeEgipite; nyika yakashaishirwa ngendaa yemitanda yenhunzi.

²⁵ Zvino Faro wakadaidza Mosi naAroni, akati, “Endai, mupire midiro kunaMwari wenyu munyika iyi.”

²⁶ Mosi wakati, “Azvizi kunaka kuita kudaro; ngokuti tinozopira kuita mudiro kunaMambo Mwari, Mwari wedu, zvinonyangadza vaEgipite. Ringira, dai echizopira kuita midiro zvinonyangadza vaEgipite mukuona kwavo, avazotipondi here ngemapuwe?

²⁷ Tinozoenda rwendo rwemazuva matatu mushango, tinozopira midiro kunaMambo Mwari, Mwari wedu, kudai ngezvaanozotipanga.”

²⁸ Ndizvo Faro wakati, “Ndinozomutendera kuti muende mupire midiro kunaMambo Mwari, Mwari wenyu mushango; asi musazoenda kuretu. Mundikumbirire.”

²⁹ Mosi wakati, “Ringirai, ndinobuda kubva kwouri, ndinozokumbira kunaMambo Mwari kuti mitanda yenhunzi mangwani ibve kunaFaro, nokubva kune nduna dzake nokubva kune vanhu vake; asi kwega Faro asachatichengedzerazve ngokusikatendera vanhu kuti vaende koopira midiro kunaMambo Mwari.”

³⁰ Ndizvo Mosi wakabuda kubva kunaFaro, akakumbira kunaMambo Mwari.

³¹ Mambo Mwari wakaita kudai ngeizwi raMosi; wakabvisa mitanda yenhunzi kubva kunaFaro, kubva kune nduna dzake nokubva kune vanhu vake; akuzi kusara naimwe.

³² Asi Faro wakakonzesa mwoyo wake panguva iyiwo, naye aazi kutendera vanhu kuti vaende.