EKISEDHUSI 7 - Bhaibheri Rakachena muChindau

¹ Mambo Mwari wakati kunaMosi, “Wona, ndakuita kudai ndi Mwari kunaFaro naAroni mukoma wako unozoita muprofeti wako.

² Iwewe unozoereketa zveshe zvendinokupanga, naAroni mukoma wako unozoronzera Faro kuti atendere vana vaIsuraeri kuti vabude kubva munyika yake.

³ Asi neni ndinozokonzesa mwoyo waFaro, kunyazwi ndikanyawanza mioniso yangu nemishamiso yangu munyika yeEgipite.

⁴ Faro aazopurutani kwouri, naapo ndinozoisa nyara yangu padera peEgipite, ndibudise hondo dzangu, vanhu vangu vana vaIsuraeri, kubva munyika yeEgipite ngokutonga kukuru.

⁵ VaEgipite vanozozia kuti ndini Mambo Mwari, apo pendinozotambanudza nyara yangu padera peEgipite, ndibudise vana vaIsuraeri kubva pakati pavo.”

⁶ Mosi naAroni vakaita kudaro; vakaita kudai ngezvaakavapanga Mambo Mwari.

⁷ Mosi waiya nemakore makumi masere (80), naAroni waiya nemakore makumi masere namatatu (83), apo pevakaereketa kunaFaro.

Ndonga yaAroni

⁸ Mambo Mwari wakaereketa kunaMosi naAroni echiti,

⁹ “Naapo Faro paanozoereketa kwomuri echiti, ‘Itai mushamiso’ zvino unozoti kunaAroni, ‘Tora ndonga yako, uikandire pashi pamberi paFaro, kuti ipinduke kuita nyoka.’ ”

¹⁰ Mosi naAroni vakapotera kunaFaro, vakaita kudai ngezvaakavapanga Mambo Mwari; Aroni wakakandira pashi ndonga yake pamberi paFaro nevaranda vake, nayo yakapinduka kuita nyoka.

¹¹ Naapo Faro wakadaidzawo vanhu vakangwara nevarombi; navowo, vasaramusi veEgipite, vakaitawo kudai ngemasaramuso avo.

¹² Ngokuti munhu weshe wakakandira pashi ndonga yake, nadzo dzakapinduka kuita nyoka; asi ndonga yaAroni yakamedza ndonga dzavo.

¹³ Zvakanyadaro mwoyo waFaro wakakonzeswa, naye aazi kupurutana kwavari, kudai ngezvaakaronza Mambo Mwari. Ngozi Yakawira Egipite.

Ngazi

Ngozi Yakawira Egipite.

¹⁴ Mambo Mwari wakati kunaMosi, “Mwoyo waFaro watindiara; unoramba kutendera vanhu kuti vaende.

¹⁵ Enda kunaFaro mangwanani, paanobuda kuenda kumvura; newe unozomuemera pahumbikumbi yorwizi kuti ushongane naye; unozotora ndonga munyara yako iyo yakapinduka kuita nyoka.

¹⁶ Newe unozoti kwaari, ‘Mambo Mwari, Mwari wevaHebheru, wakandituma kwouri echiti, “Tendera vanhu vangu kuti vaende, vandidire mushango. Wona, metsa zvino auzi kupurutana.”

¹⁷ Mambo Mwari unoronza izvi, “Ngeizvi unozozia kuti ndini Mambo Mwari.” Ringira, ndinozochaya mvura iri murwizi, rweNaire ngendonga iri munyara yangu nayo inozopinduka kuita ngazi,

¹⁸ nehove dziri murwizi dzinozofa, norwizi runozonuhwa; nevaEgipite vanozonyenya kumwa mvura yorwizi.’ ”

¹⁹ Mambo Mwari wakati kunaMosi, “Ronza kunaAroni, ‘Tora ndonga yako, utambanudze nyara yako padera pemvura yeEgipite, padera pendwizi dzavo, pemikova yavo, pemakandwa avo nepemadziya eshe avo kuti zviite ngazi; nengazi inozoapo munyika yeshe yeEgipite kunyazwi mukati mwezvidziyo zvemiti nomwezvidziyo zvemapuwe.’ ”

²⁰ Mosi naAroni vakaita kudai ngezvaakapanga Mambo Mwari; wakamirudza ndonga, akachaya mvura yaiya murwizi Naire, mukuona kwaFaro nevaranda vake; nemvura yeshe yaiya murwizi yakapinduka kuita ngazi.

²¹ Hove dzaiya murwizi dzakafa; norwizi rwakanuhwa, nevaEgipite avazi kukona kumwa mvura kubva murwizi; nengazi yaiya panyika yeshe yeEgipite.

²² Nevasaramusi veEgipite vakaita kudaro ngemasaramuso avo: nomwoyo waFaro wakakonzeswa, naye aazi kupurutana kwavari kudai ngezvaakaronza Mambo Mwari.

²³ Faro wakakunukuka, akapotera mumhatso yake, aazi kukarakadza ngeichi mumwoyo mwake.

²⁴ NevaEgipite veshe vakatsa muhumbikumbi dzorwizi kutsvaka mvura yokumwa; ngokuti avazi kukona kumwa mvura yomurwizi.

²⁵ Mazuva manomwe akapera kubva pakachaiwa rwizi Naire ndi Mambo Mwari.