EKISEDHUSI 6 - Bhaibheri Rakachena muChindau

Mambo Mwari Unopikira Kuvabudisa kubva Egipite

¹ Zvino Mambo Mwari wakati kunaMosi, “Zvino uchaona zvendinozoita kunaFaro, ngokuti ngenyara yakagwinya unozovatendera kuti vaende, ngenyara yakagwinya unozovadzinga kubva munyika yake.”

Mwari Unodaidza Mosi

² Mwari wakaereketa kunaMosi echiti, “Ndini Mambo Mwari.

³ Ndakaoneka kunaAbrahama, kunaIsaka nokunaJakobe, ndini Mwari Une-simba-reshe, asi ngezina rangu Mambo Mwari andizi kuita kuti ndiziikanwe pachangu kwavari.

⁴ Ininiwo, ndakaemesa chitenderano changu navo, kuvapa nyika yeKhenani, nyika yevakagaramwo vari zvigarandimo.

⁵ Ndakazwa kugomera kwavana vaIsuraeri, avo vanoitwa hloko ngevaEgipite, neni ndakarakadza chitenderano changu.

⁶ Ndizvo ronzai kune vana vaIsuraeri, kuti, ‘Ndini Mambo Mwari, ndinozomubudisa kubva pashi pemitwaro yevaEgipite, ndinozomusunhura kubva muuhloko hwavo, ndinozomuripira ngomuoko wakatambanudzwa nezvitongero zvikuru.

⁷ Ndinozomutora kuita vanhu vangu, neni ndinozoita Mwari wenyu. Nemwi munozozia kuti ndini Mambo Mwari, Mwari wenyu, uwo unomubudisa kubva pashi pemitwaro yevaEgipite.

⁸ Ndinozomupotedza munyika yendakamirudza nyara yangu kupika kuti ndinozoipa kunaAbrahama, kunaIsaka nokunaJakobe; ndinozoipa kwomuri kuita nhaka yenyu. Ndini Mambo Mwari.’ ”

⁹ Mosi wakaereketa kudaro kuvana vaIsuraeri; asi avazi kupurutana kunaMosi ngendaa yokutambudzika kwomweya yavo, ngendaa youhloko hunorunya.

¹⁰ Zvino Mambo Mwari wakaereketa kunaMosi echiti,

¹¹ “Potera, uronzere Faro mambo weEgipite kuti atendere vana vaIsuraeri kuti vabude kubva munyika yake.”

¹² Asi Mosi wakaereketa pamberi paMambo Mwari echiti, “Ringira, vana vaIsuraeri avazi kundipurutana; zvino Faro ungazopurutana kwendiri ngenjiranyi, ndiri uwo une miromo isikazi kuchekwa?”

¹³ Asi Mambo Mwari wakaereketa kunaMosi naAroni, akapa mupango kunevana vaIsuraeri nokunaFaro mambo weEgipite, kuti vabudise vana vaIsuraeri kubva munyika yeEgipite.

Mhuri yaMosi naAroni

¹⁴ Ava ndivo vakuru vemhatso dzemadzibaba avo: vakororo vaRubheni, dangwe raIsuraeri: Hanokhi, Paru, Hezironi, naKhami; ava ndivo vemhatso dzaRubheni.

¹⁵ Vakororo vaSimeoni: Jemueri, Jamini, Ohadhi, Jakhini, Zoha naShauri, mukororo wakabarwa ngomukadzi muKhenani; ava ndivo vemhatso dzaSimeoni.

¹⁶ Aya ndiwo mazina evakororo vaRevhi kudai ngokuteererana kwemibarirwana yavo: Gershoni, Kohathi naMerari. Makore okupona kwaRevhi aiya zana nemakumi matatu nemanomwe (137).

¹⁷ Vakororo vaGershoni vaiya Ribhini naShimei, kudai ngokuteererana kwemhatso dzavo.

¹⁸ Vakororo vaKohathi vaiya Amiramu, Izha, Hebroni naUzieri. Makore okupona kwaKohathi aiya zana nemakumi matatu nematatu (133).

¹⁹ Vakororo vaMerari vaiya Mahiri naMushi. Ava ndivo vemhatso dzaRevhi kudai ngokuteererana kwemibarirwana yadzo.

²⁰ Amiramu wakaroora Jokhebhedhi mukunda wababa ake; iye wakamubarira Aroni naMosi. Makore okupona kwaAmiramu aiya zana nemakumi matatu nemanomwe (137).

²¹ Vakororo vaIzha vaiya Khora, Nefegi naZikhiri.

²² Vakororo vaUzieri vaiya Mishaeri, Erizafani naSithiri.

²³ Aroni wakaroora Erishebha, mwanasikana waAminadhabhi mukunda waNashoni; iye wakamubarira Nadhabhi, Abhihu, Ereaza naIthama.

²⁴ Vakororo vaKhora vaiya Asiri, Erikana naAbhiasafi; ava ndivo vemhatso dzaKhora.

²⁵ Ereaza mukororo waAroni wakaroora umwe wevanasikana vaPutieri; iye wakamubarira Finehasi. Ava ndivo vakuru vemhatso dzemadzibaba evaRevhi, kudai ngokuteererana kwemhatso dzavo.

²⁶ Ava ndivo Aroni naMosi vaakaronza Mambo Mwari kwavari, kuti, “Budisai vana vaIsuraeri kubva munyika yeEgipite, kudai ngokuteererana kwezvikwata zvavo.”

²⁷ Ndivo vakaereketa kunaFaro, mambo weEgipite, kuti vabudise vana vaIsuraeri kubva muEgipite, uyu Mosi nouyu Aroni.

Mupango waMambo Mwari kunaMosi naAroni

²⁸ Ngezuva iro raakaereketa Mambo Mwari kunaMosi munyika yeEgipite,

²⁹ Mambo Mwari wakati kunaMosi, “Ndini Mambo Mwari; ronzera Faro mambo weEgipite zveshe zvendinoereketa kwouri.”

³⁰ Asi Mosi wakati pamberi paMambo Mwari, “Ringirai, ndiri mbeveve, ungazopurutana kwendiri Faro ngenjiranyi?”