EKISEDHUSI 5 - Bhaibheri Rakachena muChindau

Mosi NaAroni pamberi paMambo Faro weEgipite

¹ Ngesure kweizvi Mosi naAroni vakaenda kunaFaro vakati, “Unoronza izvi Mambo Mwari, Mwari waIsuraeri, ‘Tendera vanhu vangu kuti vaende, kuti vandiitire dhiri mushango.’ ”

² Asi Faro wakati, “Ndiani Mambo Mwari, kuti ndipurutane izwi rake nokutendera vaIsuraeri kuti vaende? Andimuzii Mambo Mwari, kupinda izvi zveshe, andizotenderi vaIsuraeri kuti vaende.”

³ Navo vakati, “Mwari wevaHebheru wakashongana nesu; titendere tiende, tinokupota, muhambo wemazuva matatu mushango, tipire mibairo kunaMambo Mwari, Mwari wedu; kuti asazotiunzira nhenda nokuti shoti.”

⁴ Asi mambo weEgipite wakati kwavari, “Imwimwi Mosi naAroni, ngenyi mwechitora vanhu kubva kumishando yavo? Endai kumishando yenyu!”

⁵ NaFaro wakati, “Ringira, vanhu vawanda kupinda vomunyika muno, nemwi munoita kuti vazorore kubva kumitwaro yavo!”

⁶ Ngezuva rimwero Faro wakapanga nduna huru dzemishando yevanhu nenduna dzavo echiti,

⁷ “Musazopa vanhu tsengwe kuita zvidhina, kudai ngekare: ngavaende vadziunganidzire tsengwe vemene.

⁸ Nouwandu hwezvidina hwevaiita karetu, munozovaemesera; amuzozvitsonzi nepadokodoko; ngokuti vane nungo; ndizvo vanochema vechiti, ‘Titendere tiende tipire mibairo kunaMwari wedu.’

⁹ Mushando wakapinda kurema ngautwikiswe padera pevanhu, kuti vaushande; musavatendera kuti vapurutane mazwi okunyepa.”

¹⁰ Ndizvo nduna huru dzemishando yevanhu vakabuda, nenduna dzavo, vakaronzera vanhu vechiti, “Faro unoronza izvi, ‘Andichazomupi tsengwe.

¹¹ Endai mwemene, mutonhere tsengwe apo pomungadziona; ngokuti mushando wenyu auzotsonzwi nepadodoko.’ ”

¹² Ndizvo vanhu vakapararira munyika yeshe yeEgipite kutonhera zvitsotso pandau yetsengwe.

¹³ Nduna dzemishando dzakavakasirisa, dzechiti, “Pedzai mishando yenyu, mishando yenyu yezuva ngezuva, kudai ngaapo pomwaiya netsengwe.”

¹⁴ Nenduna dzevana vaIsuraeri, idzo dzakaemeswa padera pavo ngenduna huru dzemishando yaFaro, dzakachayiwa, dzikabvunzwa kuti, “Ngenyi musikazi kupedza mushando wenyu wezuro nanyamashi, wokuita zvidhina kudai ngekaretu?”

¹⁵ Naapo nduna dzevana vaIsuraeri dzakauya, dzechichema kunaFaro dzechiti, “Ngenyi wechiita kudai kunevaranda vako?

¹⁶ Akuna tsengwe dzinopuwa kuvaranda vako, navo vanoti kwetiri, ‘Itai zvidhina!’ Penya varanda vako vanorohwa; asi ndaa iri kuvanhu vako.”

¹⁷ Asi iye wakati, “Mune nungo, mune nungo; ndizvo munoti, ‘Titendere kuti tiende tipire mubairo kunaMambo Mwari.’

¹⁸ Ndizvo endai zvino, mushande; ngokuti akuna tsengwe dzinozopuwa kwomuri, asi munozobudisa uwandu hwezvidhina zvakaemeswa.”

¹⁹ Nenduna dzevana vaIsuraeri dzakaona kuti vapinda mungozi yakashata, apo pevakaronzerwa kuti, “Amuzotsonzi nepadoodoko uwandu hwezvidhina zvenyu, zvezuva ngezuva.”

²⁰ Dzakashongana naMosi naAroni, avo vaiya vakavaemera munjira, vechiuya kubva kunaFaro.

²¹ Nadzo dzakati kwavari, “Mambo Mwari ngaamuringire, amutonge! Ngokuti mwakaita kuti gwema redu riite chinuho mukuona kwaFaro nomukuona kwevaranda vake, navo vaisa shoti munyara dzavo kuti vatiuraye ndiyo.”

Mosi Unogunun'una kunaMambo Mwari

²² Zvino Mosi wakahwirirazve kunaMambo Mwari, akati, “Mambo Mwari, ngenyi mwaitira vanhu ava zvakashata? Mwakanditumirenyi?

²³ Ngokuti kubvira mukuwo wendakaguma kunaFaro kuereketa ngezina renyu, iye wakaitira vanhu ava zvakashata; nemwi amusati mwanunura vanhu venyu nepadoodoko.”