EKISEDHUSI 40 - Bhaibheri Rakachena muChindau

Kuemeswa noKupirwa kweTende Rokuwapo kwaMambo Mwari

¹ Mambo Mwari wakaereketa kunaMosi echiti,

² “Ngezuva rokutanga romwedzi wokutanga unozoemesa thabhenakeri retende romushongano.

³ Unozoisa mukati mwaro bhokisi rechitenderano, unozositira bhokisi ngevheri.

⁴ Unozopotedza tafura, nokurongedza zviro zviri padera paro; unozopotedza chigadzikiro chechibani, nokujekisa zvibani zvacho.

⁵ Unozoisa arita romukore rokupishira mutombo pamberi pebhokisi rechitenderano, uise jira rokusitira pamusiwo wethabhenakeri.

⁶ Unozoisa arita rokupishira mudiro pamberi pomusiwo wethabhenakeri retende romushongano.

⁷ Unozogadzika chidziyo chokushambiramwo pakati petende romushongano nearita, nokuisa mvura mukati mwacho.

⁸ Unozonasira ruwanze kuritendenedza, nokuturika machira okusitira epamusiwo woruwanze.

⁹ Zvino unozotora mafuta okudzodza, udzodze thabhenakeri nazvo zveshe zviri mukati mwaro, urichenese, nezvidziyo zvaro zveshe; naro rinozoita rakachena.

¹⁰ Unozodzodza arita rokupishira midiro, nezvidziyo zvaro zveshe, uchenese arita; nearita rinozoita rakapindisisa kucheneswa

¹¹ Unozodzodzawo chidziyo chokushambiramwo, nechigadzikiro chacho, uchichenese.

¹² Zvino unozounza Aroni nevakororo vake pamusiwo wetende romushongano, uvashambidze ngemvura.

¹³ Unozosimidza Aroni zvokusimira zvakacheneswa; unozomudzodza, umuchenese, kuti andishandire mumushando woupristi.

¹⁴ Unozounza vakororo vake, uvapfekedze zvokupfeka zvavo,

¹⁵ uvadzodze kudai ngezvewakadzodza baba avo, kuti vandishandire mumushando woupristi; nokudzodzwa kwavo kunozoita kwoupristi hwemhera nariini kumibarirwana yavo yeshe.”

¹⁶ Mosi wakaita kudaro; kudai ndizvo zveshe zvaakapangwa ndiMambo Mwari, wakaita kudaro.

¹⁷ Ndizvo ngomwedzi wokutanga, wegore rechipiri, ngezuva rokutanga romwedzi, kuti thabhenakeri rakaemeswa.

¹⁸ Mosi wakaemesa thabhenakeri, akagadzika zvigadzikiro zvaro, akaemesa mwamba yaro, akaisa marukasha aro, akaemesa sika dzaro.

¹⁹ Naye wakafukidza ngetende padera pethabhenakeri, akaisa chifukidziro chetende padera paro, kudai ngezvaakapanga Mambo Mwari kunaMosi.

²⁰ Wakatora, akaisa marusamba emapuwe mairi mubhokisi rechitenderano, akaisa mipingo padera pebhokisi rechitenderano, akaisa chigaro chenyasha padera pebhokisi rechitenderano.

²¹ Naye wakapotedza bhokisi rechitenderano muthabhenakeri, akaemesa machira okusitira, wakasitira bhokisi rechitenderano, kudai ngezvaakapanga Mambo Mwari kunaMosi.

²² Wakaisa tafura mutende romushongano, ngeparutii rwethabhenakeri rwedera, ngokubanze kwevheri;

²³ wakaronga zvakanaka chingwa padera paro pamberi paMambo Mwari, kudai ngezvaakapanga Mambo Mwari kunaMosi.

²⁴ Wakaisa chigadzikiro chezvibani mutende romushongano, pakaringirana netafura, kurutii rwokubani rwethabhenakeri.

²⁵ Wakabasa zvibani pamberi paMambo Mwari, kudai ngezvaakapanga Mambo Mwari kunaMosi.

²⁶ Wakaisa arita romukore mutende romushongano pamberi pevheri,

²⁷ wakapishirapo mutombo unegwema rakanaka padera paro, kudai ngezvaakapanga Mambo Mwari kunaMosi.

²⁸ Wakaisa jira repamusiwo wethabhenakeri.

²⁹ Wakaisa arita rokupishira mudiro pamusiwo wethabhenakeri retende romushongano, akapirapo padera paro mudiro wokupisha newezviyo, kudai ngezvaakapanga Mambo Mwari kunaMosi.

³⁰ Wakagadzika chidziyo chokushambiramwo pakati petende romushongano nearita, naye wakaisamwo mvura yokushamba ndiyo,

³¹ iyo Mosi naAroni nevakororo vake vakashamba nyara dzavo netsoka dzavo.

³² Apo voopotera mutende romushongano, naapo vookwedzera kuarita vaishamba kudai ngezvaakapanga Mambo Mwari kunaMosi.

³³ Wakaemesa ruwanze kutendenedza thabhenakeri nearita, akaisa machira epamusiwo woruwanze. Ndizvo Mosi wakapedza mushando.

Gore padera peTende roKuwapo kwaMambo Mwari

³⁴ Naapo gore rakambonya tende romushongano nouthende hwaMambo Mwari hwakazadza thabhenakeri.

³⁵ Mosi aazi kukona kupotera mutende romushongano, ngokuti gore rakagara padera paro, nouthende hwaMambo Mwari hwakazadza thabhenakeri.

³⁶ Zvino naapo gore rakwidzwa kubva padera pethabhenakeri, vana vaIsuraeri vaihamba kuendamberi murwendo rwavo rweshe.

³⁷ Asi kudai gore risikazi kukwidzwa, vasaihamba kuendamberi metsa zuva reraikwidzwa.

³⁸ Ngokuti gore raMambo Mwari raiyapo padera pethabhenakeri masikati, nomuriro waiyamwo mukati mwaro usiku, mukuona kwevemhatso yeshe yaIsuraeri, murwendo rwavo rweshe.