EKISEDHUSI 4 - Bhaibheri Rakachena muChindau

Mwari Unopa Mosi Simba Rinoshamisa

¹ Mosi wakapingura, akati, “Asi, wonai, pamweni avazondigondi nokuti kupurutana izwi rangu, ngokuti vanozoti, ‘Mambo Mwari aazi kuoneka kwouri.’ ”

² Mambo Mwari wakati kwaari, “Chiinyi icho chiri munyara yako?” Wakati, “Indonga.”

³ Wakati, “Ikandire pashi.” Naye wakaikandira pashi, nayo yakapinduka kuita nyoka; naMosi wakaitiza.

⁴ Mambo Mwari wakati kunaMosi, “Tambanudza nyara yako, uibate ngomuswe,” naye wakatambanudza nyara yake, akaibata, nayo yakapindukazve kuita ndonga munyara yake,

⁵ “Kuitira kuti vatende kuti Mambo Mwari wemadzibaba avo, Mwari waAbrahama, Mwari waIsaka naMwari waJakobe wakaoneka kwouri.”

⁶ Mambo Mwari wakatizve kwaari, “Isa nyara yako mukati mwegauni paditi rako.” Ndizvo wakaisa nyara yake mukati mwegauni paditi rake; naapo aibudisa, wona, nyara yake yaiya yaane mapere, yachena kudai ngechando.

⁷ Naapo wakati, “Isazve nyara yako mukati mwegauni paditi rako.” Ndizvo wakaisazve nyara yake mukati mwegauni paditi rake, naapo aibudisa kubva muditi rake, wona, yakatsandukazve ikadai ngenyama yake.

⁸ “Kuti vasikazokutendi nokuti kupurutana izwi romushamiso wokutanga, vanozotenda izwi romushamiso wechipiri.

⁹ Kuti vasikazotendi iyi mishamiso miiri nokuti kupurutana izwi rako, unozotora mvura yomurwizi rweNaire, uidururire padera pemavhu akaoma; nemvura younozotora kubva murwizi inozoita ngazi padera pemavhu akaoma.”

¹⁰ Asi Mosi wakati kunaMambo Mwari, “A Mambo Mwari, andisiri gamba rokuereketapi, karetu nokuti kubvira apo pewatanga kuereketa kumuranda wako; ngokuti ndiri mbeveve, ndine chirimi.”

¹¹ Zvino Mambo Mwari wakati kwaari, “Ndiani wakaita muromo womunhu? Nokuti ndiani unoita munhu chimbungumbungu, nokuti dziiranzee, nokuti aone, nokuti bofu? Andinipi here Mambo Mwari?

¹² Ndizvo zvino, enda, neni ndinozoa nomuromo wako, ndikudzidzise chounozoereketa.”

¹³ Asi wakati, “A Mambo Mwari, tuma, ndapota ngenyara youmweni wounozotuma.”

¹⁴ Zvino ushungu hwaMambo Mwari hwakabaka kunaMosi, wakati, “Apana Aroni muRevhi, mukoma wako here? Ndinozia kuti iye uri gamba rokuereketa. Zve, ringira, unouya kooshongana newe; naapo akuona unozodakara mumwoyo mwake.

¹⁵ Unozoereketa kwaari, uise mazwi mumoromo wake; neni ndinozoa nomuromo wako nomuromo wake, ndinozokudzidzisa icho chounozoita.

¹⁶ Unozoita muereketeri wako kuvanhu: naye unozoita muromo wako, newe unozoita kudai ndiMwari kwaari.

¹⁷ Newe unozotora ndonga iyi munyara yako, iyo younozoita mioniso ndiyo.”

Mosi Unopetuka Egipite

¹⁸ Mosi wakahwirira kunaJethuro muzvere wake, akati kwaari, “Nditendere kuti ndihwirire kuhama dzangu dziri muEgipite, ndoona kuti vachapona here.” Jethuro wakati kunaMosi, “Enda mukunyarara.”

¹⁹ Mambo Mwari wakati kunaMosi ari muMidhiani, “Hwirira Egipite; ngokuti vanhu veshe vaitsvaka kukuuraya vakafa.”

²⁰ Mosi wakatora mukadzi wake nevakororo vake, akavakwidza pambongoro, wakahwirira kunyika yeEgipite: Mosi wakatora ndonga yaMwari munyara yake.

²¹ Mambo Mwari wakati kunaMosi, “Naapo wohwirira Egipite, ngwara kuti uite mishamiso yeshe yendakaisa munyara yako, pamberi paFaro; asi inini ndinozokonzesa mwoyo wake, kuitira kuti asazotendera vanhu kuti vaende.

²² Unozoti kuna Faro, ‘Mambo Mwari unoronza izvi; Isuraeri mukororo wangu, idangwe rangu.’

²³ Neni ndakati kwouri, ‘Tendera mukororo wangu kuti aende, andidire. Ukaramba kumutendera kuti aende; penya, ndinozouraya mukororo wako, dangwe.’ ”

²⁴ Vachiri munjira pandau pevakaata, Mambo Mwari wakashongana naye, akatsvaka kumuuraya.

²⁵ Zvino Ziphora wakatora buwe rinopinza, akacheka ganda repamberi pomukororo wake, akarigwamisa patsoka dzaMosi; wakati, “Ngegwinyiso uri mwamuna wengazi kwendiri!”

²⁶ Ndizvo wakamurekera. Zvino wakati, “Uri mwamuna wengazi, ngendaa yokuchekwa.”

²⁷ Mambo Mwari wakati kunaAroni, “Enda mushango kooshongana naMosi.” Ndizvo wakaenda, akashongana naye pamutunhu waMwari, akamuchingamidza ngomuromo.

²⁸ Mosi wakaronzera Aroni eshe mazwi aMambo Mwari, aakamutuma nawo, nemioniso yeshe yaakamupanga kuti aite.

²⁹ Zvino Mosi naAroni vakaenda, vakaunganidza vakuru veshe vevana vaIsuraeri.

³⁰ Aroni wakaereketa eshe mazwi aakaereketa Mambo Mwari kunaMosi, wakaita mioniso mukuona kwevanhu.

³¹ Nevanhu vakatenda; naapo vazwa kuti Mambo Mwari wakahambira vana vaIsuraeri nokuti wakaona kutambudzwa kwavo, vakakotamisa masoro avo vakadira.