EKISEDHUSI 36 - Bhaibheri Rakachena muChindau

¹ “Bhezareri naOhoriabhi nomunhu weshe unoungwaru, mwaari Mambo Mwari wakaisa ungwaru nokuzwisisa kuzia njira yokushanda mishando yeshe yendau yakachena, vanozoshanda kudai ndizvo zveshe zvaakapanga Mambo Mwari.”

Vanhu Vanounza Zvipo Zvakawanda

² Mosi wakadaidza Bhezareri naOhoriabhi, nomunhu weshe unoungwaru, mwaari Mambo Mwari waakaisa ungwaru hwokukona kuita, munhu weshe wakasundwa ngomwoyo wake, kuuya kumushando nokuuita.

³ Vakaashira kubva kunaMosi zvipo zveshe zvakaunzwa ngokuda ngevana vaIsuraeri zvokuita mushando wendau yakachena. Vakaangirira kuunza kwaari zvipo zvokupa ngokuda mangwanani eshe.

⁴ Ndizvo vanhu veshe vakangwara vakashanda mushando weshe wendau yakachena, vakauya munhu weshe kubva kumushando wake waaiya echiita,

⁵ navo vakati kunaMosi, “Vanhu vanounza zvakanyanya kuwanda kupinda zvinodikanwa kuita mushando, waakatipanga Mambo Mwari kuita.”

⁶ Mosi wakapa mupango, navo vakauteketesa mumatende vechiti, “Mwamuna nokuti mukadzi asachaunza zvipo zvomushando wendau yakachena.” Ndizvo vanhu vakapingwa kuti vasachaunza;

⁷ ngokuti zvipo zvevaiya vaanazvo zvaikwana mushando weshe kuuita nezvakanyanya kuwanda.

Kuaka Tende roKuwapo kwaMambo Mwari

⁸ Vanhu veshe vakangwara pakati pavo vaiita mushando vakaita thabhenakeri rine machira okusitira gumi orukangaza rwakanaka, rwakakoshwa, akasvipirika, akatsvukuruka, akatsvuka; wakaemesa ngemakherubhi, mushando wengwazi.

⁹ Urebu hwejira rimwe ngarimwe hwaiya hwakaedzana, mamitha gumi namairi, noupamhu hwejira rimwe ngarimwe hwaiya mamitha mairi; machira okusitira eshe aiya nechipimo chimwecho.

¹⁰ Naye wakasungira machira mashanu pamwepo rimwe pane rimweni, neamweni machira mashanu wakaasungira rimwe pane rimweni.

¹¹ Wakaita magangiro ezvakarukwa zvakasvipirika pamupendero wejira rimwe rokupedzisira reakasungirwa pamwepo okutanga; wakaitazve kudaro pamupendero wejira rokupedzisira kubanze reakasungirwa pamwepo echipiri.

¹² Wakaita magangiro makumi mashanu pajira rimwe, naye wakaita magangiro makumi mashanu pajira rokubanze reakasungirwa pamwepo echipiri; magangiro aiya akaringirana rimwe kune rimweni.

¹³ Wakaita zvikoreko makumi mashanu zvomukore, akasunganidza machira rimwe pane rimweni ngezvikoreko; ndizvo thabhenakeri rakaita rimwero.

¹⁴ Wakaita machira okusitira ngemavhiri embudzi, emutende padera pethabhenakeri; wakaita machira gumi narimwe.

¹⁵ Urebu hwejira rimwe ngarimwe hwaiya hwakaedzana mamitha gumi namatatu, noupamhu hwejira rimwe ngarimwe hwaiya mamitha mairi; machira gumi narimwe aiya nechipimo chimwecho.

¹⁶ Wakasungira machira mashanu ega, nemachira matanhatu ega.

¹⁷ Wakaita magangiro makumi mashanu pamupendero wejira rokupedzisira reakasungirwa pamwepo okutanga, wakaitazve magangiro makumi mashanu pamupendero wejira rokupedzisira reakasungirwa pamwepo echipiri.

¹⁸ Wakaita zvikoreko makumi mashanu zvethusi zvokusunganidza tende pamwepo, kuti riite chiro chimwe.

¹⁹ Naye wakaita chifukidziro chetende ngematoo emagondohwe akatsvukiswa, nechifukidziro chematoo emadenhe ngepadera.

²⁰ Wakaita sika dzehlofunga dzokuemesa.

²¹ Urebu hwesika imwe ngaimwe hwaiya mamitha marongomuna, noupamhu hwesika imwe ngaimwe hwaiya masendimitha makumi matanhatu namatanhatu.

²² Sika imwe ngaimwe yaiya nemhanda mbiri, dzokurimbanidza ndidzo imwe pane imweni; wakaita izvi pasika dzeshe dzethabhenakeri.

²³ Wakaita sika dzethabhenakeri; sika makumi mairi orutii rwokubani;

²⁴ naye wakaita zvigadzikiro zvesirivha makumi marongomuna pashi pesika makumi mairi; zvigadzikiro zviiri pashi pesika imwe nemhanda dzayo mbiri, zvigadzikiro zviiri pashi pesika imweni nemhanda dzayo mbiri.

²⁵ Kurutii rwethabhenakeri, kurupande rwedera, wakaita sika makumi mairi,

²⁶ nezvigadzikiro zvadzo zvesirivha makumi marongomuna; zvigadzikiro zviri pashi pesika imwe, nezvigadzikiro zviiri pashi pesika imweni.

²⁷ Kurupande rwesure rwethabhenakeri ngokumabirirazuva wakaita sika nhanhatu.

²⁸ Wakaita sika mbiri dzepamakhona ethabhenakeri kurupande rwesure.

²⁹ Nawo aiya akaparadzana ngepashi, asi akabatana padera, pandandazi yokutanga; ngokudaro wakaita mairi awo emakhona mairi.

³⁰ Dzaiyapo sika sere, nezvigadzikiro zvadzo zvesirivha; zvaiyapo zvigadzikiro gumi nazvitanhatu; pashi pesika imwe ngaimwe paiya nezvigadzikiro zviiri.

³¹ Wakaita marukasha mashanu omuhlofunga, mashanu esika dzorupande rumwe rwethabhenakeri,

³² nemarukasha mashanu esika dzorupande rumweni rwethabhenakeri nemarukasha mashanu esika dzethabhenakeri dzorupande rwesure kumabirira-zuva.

³³ Wakaita rukasha rwepakati kuti rupinde ngepakati pesika kubva pamagumo amwe kuguma pamagumo amweni kuenda pakati pesika.

³⁴ Wakaseta sika ngomukore, akaita ndandazi dzadzo ngomukore kuita panobata ndipo marukasha, akaseta marukasha ngomukore.

³⁵ Wakaita vheri ngemachira akasvipirika, akatsvukuruka, akatsvuka akarukwa, ngorukangaza rwakanaka rwakakoshwa; wakarinemesa ngemakherubhi, mushando wengwazi.

³⁶ Naye wakariitira sika murongomuna dzehlofunga, akadziseta ngomukore; nezvikoreko zvadzo zvaiya zvomukore; wakadziumbira zvigadzikiro zvirongomuna zvesirivha.

³⁷ Wakaita machira okusitira epamusiwo petende, ngemachira akasvipirika, akatsvukuruka, akatsvuka, akarukwa ngorukangaza rwakanaka rwakakoshwa, mushando womunemesi;

³⁸ nesika dzawo shanu nezvikoreko zvadzo. Wakaseta zvipanda zvadzo nezvinemeso zvadzo ngomukore; asi zvigadzikiro zvadzo zvishanu zvaiya zvethusi.