EKISEDHUSI 35 - Bhaibheri Rakachena muChindau

Mipango yeSabatha

¹ Mosi wakaunganidza mbungano yeshe yevana vaIsuraeri, akati kwavari, “Izvi ndizvo zviro zvaakapanga Mambo Mwari kuti muzviite.

² Mazuva matanhatu munozoshanda, asi ngezuva rechinomwe rinozoita kwomuri zuva rakacheneswa, Sabatha rokuzorora kunaMambo Mwari; kunyazwi ndiani unozoita mushando ngeiro zuva unozourawa.

³ Musazobasa muriro muugaro hwenyu hweshe ngezuva reSabatha.”

Zvipo zveTende Rakacheneswa

⁴ Mosi wakaereketa kumbungano yeshe yevana vaIsuraeri echiti, “Ichi ndicho chiro chaakapanga Mambo Mwari.

⁵ Torai kubva pakati penyu zvipo zvokuita mudiro kunaMambo Mwari; kunyazwi ndiani uno mwoyo unenyasha, ngaaunze zvipo: mukore sirivha nethusi;

⁶ zvakarukwa zvakasvipirika, zvakatsvukuruka, zvakatsvuka, zvakarukwa ngerukangaza rwakanaka, nezvemamviri embudzi;

⁷ matoo emagondohwe akatsvukiswa nematoo emadenhe, mapuranga ehlofunga;

⁸ mafuta ezvibani nemaka emafuta okudzodza neomutombo wokupisha une gwema rakanaka;

⁹ mapuwe eonikisi, nemapuwe omunemo eefodhi, neechokungwarira diti.

Zvidziyo zveTende roKuwapo kwaMambo Mwari

¹⁰ “Nomwamuna weshe uri ngwazi wakangwara pakati penyu ngaauye nokuita zveshe zvaakapanga Mambo Mwari:

¹¹ thabhenakeri, tende raro nechifukidziro charo, zvikoreko zvaro, mapuranga aro, mwamba yaro, sika dzaro nemagadzikiro aro;

¹² bhokisi rechitenderano nemipingo yaro, chigaro chenyasha nevheri rokusitira;

¹³ tafura nemipingo yaro nezvidziyo zvaro zveshe, nezvingwa zvokuonisa;

¹⁴ nechigadzikiro chechibani chokujekisa nezvidziyo zvacho nezvibani zvacho nemafuta ezvibani zvokujekisa;

¹⁵ arita rokupishira mutombo nemipingo yaro, mafuta okudzodza nomutombo wokupisha une gwema rakanaka, jira rokusitira pamusiwo, pamusiwo wethabhenakeri;

¹⁶ arita rokupishira mudiro nejira rechisitiro charo chethusi, mipingo yaro nezvidziyo zvaro zveshe, chidziyo chokushambiramwo nechigadzikiro chacho;

¹⁷ machira okusitira ndiwo oruwanze nesika dzawo nezvigadzikiro zvadzo, machira okusitira ndiwo epamusiwo weruwanze;

¹⁸ hoko dzethabhenakeri nehoko dzoruwanze nemapote adzo;

¹⁹ zvokusimira zvakanasa kurukwa, zvokusimira mumushando wendau yakachena, zvokusimira zvakachena zvaAroni mupristi nezvokusimira zvevakororo vake, vechishanda mushando woupristi.”

Vanhu Vanounza Zvipo zvavo

²⁰ Zvino yeshe mbungano yevana vaIsuraeri yakapararira kubva kunaMosi.

²¹ Navo vakauya, munhu weshe wakasundwa ngomwoyo wake, nomunhu weshe wakasundwa ngomweya wake kuti atende, vakaunza zvipo kunaMambo Mwari, zvomushando wetende romushongano, nomushando waro weshe, nowokunasira zvokusimira zvakacheneswa.

²² Ndizvo vakauya, veshe vamuna nevakadzi; avo veshe vaiya nomwoyo unenyasha, vakaunza zvipeneti zvakanemeswa, mativera, ndandazi dzomunzee, mubeda nezvinemeso, zveshe zvaiya zvinemeso zvomukore. Munhu weshe uwo wakapa zvipo zvomukore zvakazunguzirwa kunaMambo Mwari.

²³ Nomunhu weshe wakaoneka anemachira akasvipirika, akatsvukuruka, akatsvuka, neorukangaza rwakanaka, emamviri embudzi, matoo akatsukiswa emagondohwe, matoo akatsukiswa emagotokoto nematoo emadenhe, vakazviunza.

²⁴ Munhu weshe wakapa zvipo zvesirivha nokuti zvethusi wakaunza zvipo zvaMambo Mwari; munhu weshe waiya nemapuranga ehlofunga aikona kushandiswa mumushando, wakaaunza.

²⁵ Nevakadzi veshe vaiya ngwazi dzokuruka vakaruka ngenyara dzavo, vakaunza izvo zvevakaruka, zvakasvipirika, zvakatsvukuruka, zvakatsvuka, nezvorukangaza rwakanaka.

²⁶ Vakadzi veshe vakasundwa mumwoyo yavo ngoungwazi, vakaruka mamviri embudzi.

²⁷ Nevakuru vakaunza mapuwe eonikisi nemapuwe omunemo eefodhi, neokuisa pachokungwarira diti,

²⁸ mitombo inonuhwira, nemafuta ezvibani, nemafuta okudzodza, neomutombo wokupisha unegwema rakanaka.

²⁹ Veshe vamuna nevakadzi, vana vaIsuraeri, vakasundwa ngomwoyo yavo vakaunza zvipo zvomushando waakapanga Mambo Mwari kubudikidza ndiMosi kuti uitwe, vakazviunza ngomwoyo inoda kunaMambo Mwari.

Vaaki veTende roKuwapo kwaMambo Mwari

³⁰ Zvino Mosi wakati kuvana vaIsuraeri, “Ringirai, Mambo Mwari wakadaidza ngezina Bhezareri mukororo waUri, mukororo waHuri, wedzinza raJudha.

³¹ Wakamuzadza ngomweya waMwari, unoungwazi hwokuita, kuzwisisa, kuzia nokuita mbeu dzeshe dzemishando,

³² nokuronga mishando youngwazi, mukushanda ngomukore, sirivha nethusi,

³³ mukucheka mapuwe omunemo, nomukutsetsa miti, kushanda mbeu dzeshe dzemishando youngwazi.

³⁴ Naye wakamufemera kuti adzidzise, veshe iye naOhoriabhi, mukororo waAhisamakhi, wedzinza raDhani.

³⁵ Wakavazadza ngoungwaru hwokukona, kushanda mbeu dzeshe dzemishando, wokunangura, newoungwazi, newomunemesi wezvakasvipirika, zvakatsvukuruka, zvakatsvuka, zvorukangaza zvakanaka, newomuruki, nowaavo vanoita mushando nokuti ngouri, nowaavo vanoronga mishando youngwazi.