EKISEDHUSI 34 - Bhaibheri Rakachena muChindau

Marusamba Echipiri eMapuwe

¹ Mambo Mwari wakati kunaMosi, “Tsetsa marusamba mairi emapuwe akadai ngeokutanga; neni ndinozonyora pamarusamba mazwi aiya pamarusamba okutanga, ewakaputsa.

² Udzinasirire mangwanani, ukwire mangwanani kuMutunhu weSinai, udziemese pamberi pangu padera pomutunhu.

³ Apana munhu unozokwira newe, usatendera munhu kuti azooneka kumutunhu weshe; makwai nekuti n'ombe zvisazofura pamberi pouwo mutunhu.”

⁴ Ndizvo Mosi wakatsetsa marusamba mairi emapuwe akadai ngeokutanga; naye wakafumira kumiruka mangwanani akakwira Mutunhu weSinai, kudai ngezvaakamupanga Mambo Mwari, wakatora marusamba mairi munyara dzake.

⁵ Mambo Mwari wakadzaka ari mumvumi, akaemapo naye, akadaidzira zina raMambo Mwari.

⁶ Mambo Mwari wakapinda ngepamberi pake, wakadaidzira echiti, “Mambo Mwari, Mambo Mwari, Mwari, wakazara ngokukungurira nenyasha, unononoka kutseneka, unowanza rudo negwinyiso.

⁷ Unongwarira nyasha dzine rudo kune makumi emazana, unokungurira kushata, kupauka nokushaisha; uwo usikapembedzi vane ndaa, echiunzidzira kushata kwemadzibaba padera pevana nepadera pevana vevana, metsa padera pomubarirwana wechitatu nepewechirongomuna.”

⁸ Mosi wakakasira, akatsikitsira soro rake pamavhu, akadira.

⁹ Wakati, “Zvino, kudai ndaona nyasha mukuona kwako, A Mambo Mwari, ndapota, hambai pakati pedu. Kunyazwi vanhu vane mitsipa yakakukutara, ukungurire kushata kwedu nokushaisha kwedu, utitore kuita nhaka yako.”

Chitenderano Chinogwinyiswazve

¹⁰ Naye wakati, “Ringira, ndinoita chitenderano. Pamberi pevanhu vako veshe ndinozoita zvishamiso, zvisikazi kumboitwa zvakadaro munyika mweshe, nokuti kuneiri dzinza; nevanhu veshe vouri pakati pavo vanozoona mushando waMambo Mwari, ngokuti chiri chiro chinotyisa chendinozoita newe.

¹¹ “Ngwarira izvo zvendinokupanga nyamashi. Ringira ndinozodzinga kubva pamberi pako vaAmori, vaKhenani, vaHiti, vaPherizi, vaHivhi nevaJebhusi.

¹² Ngwara kuti usazoita chitenderano nevagari venyika younoenda kweiri, kuti chisazoita murau pakati pako.

¹³ Asi unozoputsa maarita avo, upwanye sika dzavo, unozotemera pashi miedzaniso yavo yokudira yaashera wavo;

¹⁴ ngokuti usazodira zvimwari zvimweni: ngokuti Mambo Mwari uwo zina rake ndiNdurumwa, ndiMwari une ndurumwa.

¹⁵ Usazoita chitenderano nevagari venyikayo, ngokuti naapo voohura ngokuteera zvimwari zvavo nokupira mudiro kuzvimwari zvavo, noumwe wavo unozomukoka, nemwi munozodya mudiro wake

¹⁶ nemwi munozotora vanasikana vavo kuroodza vakororo venyu, nevanasikana vavo vanodzihurisa kuzvimwari zvavo vanozoita kuti vakororo venyu vaitewo vahuri kuzvimwari zvavo.

¹⁷ “Usazodziitira zvimwari zvakanyunguruswa.

¹⁸ Unozongwarira mushongano wokudya chingwa chisina mumera. Unozodya chingwa chisina mumera mazuva manomwe kudai ngezvendakakupanga, ngomukuwo wakaemeswa ngomwedzi Abhibhi: ngokuti ngomwedzi Abhibhi ndiwo womwakabuda ndiwo kubva Egipite.

¹⁹ “Eshe matangwe ngaangu; nezvifuyo zvako zveshe zviri zvemikono, matangwe en'ombe neemakwai.

²⁰ Nedangwe rembongoro unozoriripira ngegwai: usikariripiri, unozogura mutsipa waro. Unozoripira eshe matangwe evakororo vako. Akuna naumwe unozouya pamberi pangu asina chiro.

²¹ “Unozoshanda mazuva matanhatu, asi ngezuva rechinomwe unozozorora; ngomukuwo wokurima nowokucheka unozozorora.

²² Newe unozongwarira dhiri remavhiki, ndiro rokucheka koroni, rokuunganidza koroni ngokupera kwegore.

²³ Katatu ngegore vamuna venyu veshe vanozooneka pamberi paMambo Mwari, Mwari waIsuraeri.

²⁴ Ngokuti ndinozodzinga madzinza kubva pamberi pako, ndikudze migano yako; akuna munhu unozoemura nyika yako apo wookwira kuoneka pamberi paMambo Mwari, Mwari wako, katatu ngegore.

²⁵ “Usazopira ngazi yomubairo wangu pamwepo nechingwa chinomumera; nokuti mubairo wedhiri rePhasika auzosiiwi metsa mangwanani.

²⁶ Unozounza yokutanga yemichero yemitanguro yeminda yenyu kumhatso yaMambo Mwari, Mwari wenyu. Usazobika chimbudzana mumukaka wamai acho.”

²⁷ Mambo Mwari wakati kunaMosi, “Nyora aya mazwi; ngokuti kudai ngokuteererana kwaaya mazwi ndaita chitenderano newe naIsuraeri.”

²⁸ Naye waiyapo naMambo Mwari mazuva makumi marongomuna nousiku makumi marongomuna; aazi kudya chingwa nokuti kumwa mvura. Wakanyora pamarusamba mazwi echitenderano, mipango gumi.

Mosi Unodzaka kubva paMutunhu weSinai

²⁹ Naapo Mosi adzaka kubva paMutunhu weSinai, ane marusamba mairi echitenderano munyara yake, aazi kuzia kuti ganda rehope yake rakan'anikira ngokuti waiya echiereketa naMwari.

³⁰ Naapo Aroni nevana veshe vaIsuraeri vaona Mosi, wona, ganda rehope yake rakan'anikira; navo vakatya kukwedzera kwaari.

³¹ Asi Mosi wakadaidzira kwavari; naAroni nevakuru veshe vembungano vakahwirira kwaari naMosi wakaereketa kwavari.

³² Ngesure kwazvo vana vaIsuraeri veshe vakakwedzera pasinde: wakavapa ngokupanga zveshe zvaakaereketa naye Mambo Mwari paMutunhu weSinai.

³³ Naapo Mosi apedza kuereketa navo, wakaisa vheri padera pehope yake.

³⁴ Asi apo Mosi apotera pamberi paMambo Mwari kuereketa naye, waidusa vheri, metsa abudemwo; naapo akabuda nokuronzera vana vaIsuraeri izvo zvaakapangwa.

³⁵ Vana vaIsuraeri vakaona hope yaMosi, kuti ganda rehope yaMosi rain'anikira, naMosi wakafukidzazve hope yake ngevheri, metsa apotera kuereketa naye.